Owete Man e Winjruok Achiel

KUOM higni ma dirom 1,500 kama, Jehova Nyasaye ne nigi oganda mar Jo-Israel kaka joge miluongo gi nyinge. Kae to Jehova “koro noparo jo ma oa e ogendni mamoko mondo okaw kuomgi jo ma iluongo gi nyinge.” (Tich 15:14) Jo ma ne idhi luong gi nying Jehovago ne dhi bedo Jonenone, kendo ne gidhi bedo gi winjruok achiel e paro kod timbegi, bed ni gidak kanye e piny. Mondo ochok oganda miluongo gi nying Nyasaye kamano, ne dhi dwarore ni ochop wach ma Yesu nochiko niya: “Kuom mano, dhiuru e ogendni duto mondo ulok ji obed jopuonjrena, kubatisogi e nying Wuoro, gi Wuoyi, gi roho maler, 20 kendo kupuonjogi timo gik moko duto ma asechikou.”​—Mat. 28:19, 20.

² Kichiwo ngimani ne Jehova mi obatisi, mano miyo ibedo japuonjre Yesu Kristo. Koro in e achiel gi riwruok me piny mangima mar owete ma Jokristo ma ok we mondo gik moko kaka pinygi, anyuolagi, yutogi, kata gik ma kamago opoggi. (Zab. 133:1) Nikech mano, ihero kendo imiyo Jokristo weteni luor e kanyakla. Nyalo bedo ni moko kuomgi oa e oganda machielo, piny machielo, sombgi opogore gi mari, kendo nyalo bedo ni chon ne ok iherogi nikech wechego. Kata kamano, gie sani, hera mar owete manie kindu otueyou matek moloyo hera moro amora ma ji nyalo bedogo e ngima mar joot, e kind osiepe, e din, kata e kind ji kuma gitiye.​—Mar. 10:29, 30; Kol. 3:14; 1 Pet. 1:22.

TIMO LOKRUOK E PACHWA

³ Ka po ni nitie jomoko ma nigi paro mag bwono ji nikech oganda ma jogo wuokie kata nikech gik mamoko, ber ka giparo ranyisi mar Jokristo machon ma ne gin Jo-Yahudi. Jokristogo ne nyaka were gi timbe mag akwede ma ne gikwedogo jo ma oa e ogendni mamoko. Ka ne oor Petro mondo odhi e dala Kornelio ma ne en jatend-askeche Rumi, gima ber en ni Jehova noiko pach Petro ne tijno komondi.​—Tich Joote, sula mar 10.

⁴ Ne onyis Petro e fweny moro mondo oneg kendo ocham kit le moko ma ne ok ler ka luwore gi chik Jo-Yahudi. Ka ne Petro otamore, dwol moro noa e polo ka wachone niya: “We wacho ni gik ma Nyasaye osepwodho gin gik ma ok ler.” (Tich 10:15) Petro noloko pache moyie dhi limo jal ma ne oa e ogendni mamokono mana nikech dwol ma nowinjo koa ka Nyasaye. Sa ma koro ne odhi mondo otim kaka Jehova ne ochike, Petro nolando ne jo ma ne ochokore niya: “Ung’eyo maber ni chik ok oyie ne Ja-Yahudi mondo oriwre gi ng’at moa e oganda machielo, kata sudo machiegni kode, to e ma Nyasaye osenyisa ni kik aluong ng’ato ang’ata ni, ng’at mochido kata ma ok oler. 29 Omiyo, adier ka ne oorna wach mondo abi, ok ne atamora.” (Tich 10:28, 29) Kuom mano, Petro ne oneno gik ma ne nyiso adier ni Jehova ne oyie gi Kornelio kod joode.

⁵ Saulo moa Tarso, ne en Ja-Farisai ma sombe ni malo ahinya. Kata kamano, nyaka ne obolre molok pache mondo oriwre gi jo ma chon ne ok onyal riworego. Nochopo kinde ma jo ma ne ochayo chon-go e ma koro ne chike kuom gik monego otim. (Tich 4:13; Gal. 1:13-20; Fil. 3:4-11) Onge kiawa ni kata mana Sajio Paulas, Dionisio, Damaris, Filemon, Onesmas, kod jo mamoko ne nyaka tim lokruoge madongo e pachgi mondo mi girwak wach maber kendo gibed jopuonjre Yesu Kristo.​—Tich 13:6-12; 17:22, 33, 34; File. 8-20.

RITO WINJRUOK ME KINDWA E PINY MANGIMA

⁶ Onge kiawa ni hera mar owete gi nyimine e kanyakla e ma ne oywayi ir Jehova kod riwruok mar ogandane. Ne ineno gik ma nyiso ni adier gin gi kido mar hera ma e ma ifwenyogo jopuonjre madier mag Yesu Kristo ma nowacho niya: “Amiyou chik manyien, ni ubed gi hera e kindu; mana kaka aseherou, un bende herreuru e kindu. Ma e ma nomi ji duto ong’e ni un jopuonjrena​—ka un gi hera e kindu uwegi.” (Joh. 13:34, 35) Kendo ne imedo hero Jehova kod riwruokne bang’ fwenyo ni hera manie kanyakla en gima konyowa ng’eyo kaka owete me piny mangima oherore. In bende in achiel kuom jo ma nyiso ni weche ma ne Muma okoro chopo. Weche ma Muma nokorogo nyiso ni ne idhi chok ji e ndalo mag giko mondo gilam Jehova gi kue kendo e winjruok achiel.​—Mika 4:1-5.

⁷ Nikech piny opong’ gi gik mang’eny ma pogo ji, ng’a ma ne nyalo ng’eyo ni ji “moa e ogendni duto, gi dhoudi duto, gi pinje duto, kendo gi dhok duto,” ne nyalo bedo e winjruok achiel? (Fwe. 7:9) Par ane pogruok maduong’ ma nitie e kind ogendni ma tiyo gi masinde ma nya sani kod ogendni ma pod omoko e chike kod timbe machon mag anyuola. To nade ywaruok kod piem ma nitie e kind jo ma wuok e oganda achiel to anyuolagi opogore? Bende, nikech ji nigi chuny mar hero pinygi moloyo pinje mamoko, pogruok mag siasa onya ahinya moloyo kinde moro amora. To nade pogruok ma nitie korka yuto kaachiel gi gik mamoko mang’eny ma keloga ywaruok e kind dhano? Kinono wechegi duto mifwenyo ni nitiere oganda moro ma nigi ji mowuok e ogendni duto, gi dhok duto, kendo ma yutogi opogore opogore, to koni gin gi hera ma tueyogi e winjruok achiel, donge mano nyaka bed mana ni en hono ma Nyasaye Manyalo Duto e motimo?​—Zek. 4:6.

⁸ Chieng’ ma ne ichiwo ngimani mi obatisi mibedo Janeno mar Jehova, ne idonjo e riwruok ma nigi winjruok ma jaberno. Nikech winjruogno en gima long’o, in gi ting’ mar neno ni irite maber. Gima nyalo konyi timo mano en luwo weche ma jaote Paulo nondiko e Jo-Galatia 6:10 niya: “Ka pod wan gi thuolo, watimuru gik mabeyo ne ji duto, to moloyo, ne jo ma wan-go e yie.” Bende, waluwo puonj ma wachonwa kama: “Kik utim gimoro mondo upiem kata kuparo ni ubeyo moloyo jomamoko, to bolreuru ka ukwano ni jomamoko oloyou gi ber. Kik ung’i mana gik ma kelonu ber un uwegi, to ung’i bende gik ma kelo ber ne jomamoko.” (Fil. 2:3, 4) Ka kinde duto watemo neno owete gi nyiminewa kaka Jehova nenogi to ok kaka gin e yor ringruok, wabiro dhi nyime bedo gi kue kod winjruok kodgi.​—Efe. 4:23, 24.

DEWRUOK NG’ATO GI NG’ATO

⁹ Mana kaka ranyisi maber ma jaote Paulo notiyogo, jo kanyakla onge kod gima pogogi. Kar mano, ji duto dewore ng’ato gi ng’ato. (1 Kor. 12:14-26). Kata obedo ni wadak mabor ahinya gi owetewa moko me piny mangima, pod wadewogi ahinya. Sa misando owetewa moko, mano wach ma chando chunywa waduto. Ka moko kuomgi ochando gige ringruok, masira omonjogi, kata ywaruok mag lwenje oyudogi, waduto wamanyo yore mag jiwogi e yie kaachiel gi konyogi e yor ringruok.​—2 Kor. 1:8-11.

¹⁰ Waduto onego walem ne owetewa pile ka pile. Jomoko nyagore gi tembe ma ywayogi mondo gitim gik maricho. Moko chandore gi gik ma nyalo bedo ni ji mang’eny ong’eyo. Jomoko to yudo akwede kowuok kuom jotich wetegi, joutegi, to inyalo yudo ni ji manok kende e mong’eyo mago. (Mat. 10:35, 36; 1 The. 2:14) Magi gin gik ma chando pachwa ahinya kaka owete me piny mangima. (1 Pet. 5:9) Nitie jogo ma tiyo matek e tij Jehova ka gitayo tij yalo kod tayo weche mag kanyakla. To nitie bende jogo ma nigi ting’ mar tayo tijwa mar piny mangima. Jogi duto onego walemnegi nikech kuom timo kamano, wanyiso ni waherogi kendo wadewogi gadier, kata bed mana ni onge kony moro ma wanyalo miyogi wawegi achiel kachiel.​—Efe. 1:16; 1 The. 1:2, 3; 5:25.

¹¹ Nikech tungni mopong’o piny e ndalo mag gikogi, oganda Jehova nyaka bed moikore konyore ng’ato gi ng’ato. Masiche ma tinde timore nya dinwoya, kaka yiengni mag piny kod koth maduong’ ma kelo ataro ma nego ji, nyalo miyo odwarre ni olos chenro mar chiwo kony mag gige ringruok e okang’ malach. Jokristo ma ndalo joote noketo ranyisi maber kuom wachni. Jopuonjre ma ne ni Antiokia noluwo kaka Yesu nopuonjogi mi ne gioro mich ne owete ma ne ni Judea e ndalo kech. (Tich 11:27-30; 20:35) Jaote Paulo nojiwo Jo-Korintho mondo oriw lwedo chenro mag chiwo kony ma ne timore e yo mochanore maber. (2 Kor. 9:1-15) E ndalowagi, sa ma masira oneno mi ochopo ka ma owetewa ochando gige ringruok, riwruok mar oganda Jehova kod Jokristo achiel achiel kawoga okang’ mapiyo mar konyogi kaka dwarore.

OWALWA NE TIMO DWACH JEHOVA

¹² Riwruokwa mar owete e piny mangima, ochan e yo ma miyo watimo dwach Jehova ka wan e winjruok achiel. Gie sani, dwarone en ni oyal wach maber mar Pinyruoth e piny mangima mondo ochiwgo neno ne ogendni duto. (Mat. 24:14) Sa ma watimo tijno, Jehova dwaro ni wabed gi timbe ma luwore gi puonjne manie rang’iny mamalo. (1 Pet. 1:14-16) Onego wabed jo moikore winjo jowetewa ka wabolorenegi, kendo wakony e miyo wach maber olandre. (Efe. 5:21) Moloyo kinde moro amora mosekalo, magi e kinde ma dwarore ahinya ni waket Pinyruodh Nyasaye e ma obed motelo e ngimawa, to ok dwachwa wawegi. (Mat. 6:33) Keto wachno e paro sa ma watiyo kanyachiel e lando wach maber miyowa mor gie sani kendo biro miyo wayud gueth mosiko e kinde ma biro.

¹³ Kaka Joneno mag Jehova, owalwa kendo wapogore gi jo mamoko nimar wan oganda maler ma nyiso kinda mana ne tij Nyasachwa. (Tito 2:14) Wapogore nikech walamo Jehova. Mano en nikech watiyo ka wan e winjruok achiel gi owetewa me piny mangima. To ok mano kende. Gima duong’ ma riwowa en ni wawacho dhok achiel mar adiera kendo watimo gik ma luwore gi adiera ma wawachono. Mano e gima Jehova nokoro kokalo kuom janabi Zefania niya: “Abiro loko dhok ma ji wacho mondo obed dhok maler, mondo giduto giluong nying Jehova, kendo gitine ka gin gi winjruok.”​—Zef. 3:9.

¹⁴ Kae to Jehova notayo Zefania gi roho mare mondo okor winjruok ma ne dhi betie e kind owete, ma e gima nitiere e kindegi. Zefania nokoro kama: “Jo-Israel modong’ biro timo mana gik makare; ok giniwach miriambo, kendo weche mag miriambo ok noyud e lewgi; gibiro chiemo kendo nindo ma onge ng’at ma bwogogi.” (Zef. 3:13) Nikech waseng’eyo adiera mar Wach Jehova mi waloko pachwa kendo wamakore gi kit ngima ma luwore gi puonj mag Jehova, koro wanyalo tiyo kanyachiel ka wan e winjruok. Gik ma watimo chal mana hono ne jo ma ng’iyo ang’iya gik moko kaka dhano. Ee, wan oganda mopogore adier nimar wan jo Nyasaye ma kelone duong’ e piny duto.​—Mika 2:12.