Rwakgiuru gi Mor!
1. Gin kinde mage ma wan gi thuolo maberie moloyo mar chiwo neno, to nikech ang’o?
1 Onge kinde mwanyalo yudoe thuolo maberie moloyo mar chiwo neno kaka ma wajoyudo e kinde Rapar ma watimoga higa ka higa. Parie wachni: Higani, wageno ni welo mokalo milion apar biro chopo e Rapar mondo giwinj kilero kaka Jehova gi Yesu nonyisowa hera kuom miyowa rawar. (Joh. 3:16; 15:13) Bende, gibiro puonjore gweth ma ginyalo yudo nikech mich ma Jehova nomiyowano. (Isa. 65:21-23) En adier ni weche mag jagol-twak biro konyo e chiwo neno chieng’no, kata kamano, waduto wabiro yudo thuolo mar chiwo neno maber kokalo kuom yo ma warwakogo welo.—Rumi 15:7.
2. Ang’o mwanyalo timo mondo warwak welo e yo maber?
2 Kar manyo mana kar bet kae to irito mondo program ochakre, donge nyalo bedo maber ka ikawo okang’ mar ng’eri gi welo? Welo nyalo bedo maluor luor kendo samoro digiher yudo ng’at ma leronegi kaka program biro chalo. Sama wabwonjo kodgi kendo mosogi gi mor, mano biro miyo giwinj ni orwakgi gadier. Mondo mi ing’e joma obiro nikech nogwelgi, inyalo penjo welo kapo ni ma e hangogi biro e chokruogewa, kata penjogi kapo ni ging’eyo owadwa kata nyaminwa moro. Bende inyalo kwayogi mondo gibed buti mondo uti gi Mumbi kod bugi mar wer. Kapo ni utimo Rapar e Od Romo, inyalo wuotho kodgi ging’e kaka Od Romo chalo. Bang’ program, bed thuolo kendo ikri mar dwoko penjo moro amora ma ginyalo bedogo. Kapo ni biro dwarore ni uwuog mapiyo bang’ tieko program nikech nitie kanyakla ma bende biro timo Rapar kanyo, inyalo nyiso ng’ama wendo ni: “Daher winjo paro ma in-go e wi chokruok ma kawuononi. Be wanyalo tudore kendo?” Kae to inyalo timo chenro mondo imanye. Jodongo biro temo ahinya jiwo jolendo ma odok chien ma oweyo tij lendo.
3. Ang’o momiyo dwarore ni wan ema wakaw okang’ mokwongo mar rwako joma obiro e Rapar?
3 Ne welo mathoth, chokruogni ema gibiro hangoe neno kaka jotich Jehova nigi mor kod kuwe e kindgi, machal mana ka gima gin e paradiso. (Zab. 29:11; Isa. 11:6-9; 65:13, 14) Ang’o ma welo biro parogo nyasini? Mano biro luwore gi okang’ ma wabiro kawo e rwakogi.