Ibiro Chiw Neno Maduong’ Ahinya
1. Mopogore gi twak migolo, ang’o kendo manyalo moro joma obiro e Rapar? Ler ane.
1 E kinde mage? E odhiambo mar Rapar. Osetim kinda ahinya mondo ogwel ji e rapar. Ok en mana gima welo winjo kende ema nyalo morogi. Miyo moro ma ne obiro e Rapar nowuoyo kuom gima ne oneno, hera madier ma ng’ato ka ng’ato ne nyiso kod od romo maber kendo maler ma joma ochiwore ema nogero. Omiyo waduto moriwo nyaka jagol-twak wachiwo neno e kinde mar nyasi maduong’ moloyoni matimore e higa.—Efe. 4:16.
2. Ere kaka ng’ato ka ng’ato kuomwa nyalo chiwo neno ne welo?
2 Mos Welo gi Ilo: Wachiwo neno seche ma wamoso welo gi ilo. (Joh. 13:35) Kata obedo ni ok inyal wuoyo gi ji duto, podi inyalo ng’eri gi joma obet machiegni kodi. (Hib. 13:1, 2) Welo ma nenore ni onge joma ong’eyogi ema onego item ng’eyo ahinya. Nyalo bedo ni gin bende nogwelgi e kinde kampen. Inyalo penjogi kama, “Dibed ni ma e bironi mokwongo?” Inyalo bet kodgi kendo dwoko penjo ma ginyalo bedogo. Kapo ni dwarore ni kanyaklau owe ne kanyakla machielo od romo mondo otimie rapar, inyalo wachone kama: “Daher winjo kaka ineno program ma wabedogo. Be wanyalo tudore kodi e odiechieng’ machielo?”
3. Ere kaka wanyalo rwako jogo modok chien e tij lendo?
3 Rwak Joma Odok Chien e Tij Lendo: Onge kiawa ni jolendo mosedok chien e tij lendo biro bedo e rapar, ma moko kuomgi jobiro mana e Rapar higa ka higa. Rwakgi kendo nyisgi ni imor kodgi gadier. (Rumi 15:7) Jodongo nyalo limogi e utegi bang’e mondo ojiwgi gidhi nyime biro e chokruoge. Walemo ni raparni biro jiwo joma biro bedoe mondo opak Nyasaye, ok nikech gik ma giwinjo kende, to bende nikech gik ma gineno ‘kuom tichwa maber.’—1 Pet. 2:12.