“Timuru ma, Uparago” Rapar mar Tho Yesu ma Notimre April 2
1. Ang’o momiyo tarik 2 April 2007, nobed odiechieng’ maduong’?
1 Tarik 2 April 2007, ji tara gi tara e piny mangima biro chokore mondo gipar tho mar Yesu, ma ne en tho mar misango. Yesu ne otho nikech ne oriwo lwedo loch mar Wuon mare manie polo, kendo timo kamano ne onyiso ni Satan Jachien ne oriambo ni dhano tiyo ne Nyasaye mana nikech ber ma giyudoe. (Ayub 2:1-5) Chiemb Odhiambo mar Ruoth bende paronwa ni kokalo kuom thone kaka dhano makare chuth ma onge richo, Yesu ne ‘ochiwo ngimane odok rawar ne ji mang’eny.’ (Mat. 20:28) Kuom mano, Yesu ne ochiko jopuonjrene ni: “Timuru ma, uparago.” (Luka 22:19) Be erokamano ma in-go kuom mich majaberni mar Nyasaye osemiyo ichako timo ikruok mar paro hera maduong’ ma ne onyiswani?—Joha. 3:16.
2. Ere kaka wanyalo timo ikruok ei chunywa ne Rapar?
2 Ik Chunyi: Ka wanono gik ma ne otimore e odiechienge mogik kane Yesu pok otho, wanyalo timo ikruok ei chunywa ne nyasi mar Rapar-ni. (Ezra 7:10) Mondo wayud kony e timo kamano, nitie chenro makende mar somo Muma mayudore e Kuyachunguza Maandiko—2007 kod Kalenda ya Mwaka wa 2007. Chenro moketni mar somo, otudore ahinya gi gik ma ne otimore e kinde ma Yesu ne othoe, kendo oluwore gi kalenda ma watiyogo ndalogi. Odiechienge koda tarige mag gik ma Muma wuoyoe, luwore kod kalenda mar Jo-Yahudi ma ikwano odiechieng’ kochakore seche ma chieng’ podhoe nyaka podho chieng’ maluwoe. Pogruok mantiereno, onyisi e chenrono mar somo Muma e kinde mag Rapar. Nono weche ma kamago kendo lamo ka waparo matut kuom hera mar Nyasaye, biro miyo wayud kony chuth e nyasi mar Rapar.
3. Wanyalo timo nade ne jogo ma wagwelo koda ne jolendo mosedok chien mondo omi giyud kony kuom nyasi mar Rapar?
3 Gwel Jomoko Mondo Obi: Kalatas ma iye mar Tijwa mar Pinyruoth mar Februar, ne olando wach kampen makende mar gwelo ji e nyasi maduong’ni. Be isetimo chenro mar timo kampenni? Be isendiko piny nyinge jogo michano gwelo, to bende isechako wuoyo kodgi? Tim chenro mar chopo chon e odhiambo mar odiechieng’ Rapar mondo omi irwak jogo ma isegwelo kaachiel gi welo mamoko. Inyalo bet kodgi, mondo ine ni gin gi Muma kod bug wer. Konygi mondo ging’ere gi jomoko ei kanyakla. Bang’ nyasino, kaw thuolo mar dwoko penjo ma gin-go. Gwelgi mondo gibi giwinj twak makende mar ji duto ma nobedie April 15. To moloyo, jodongo onego one ni ogwel jogo mosebedo ka ni ei kanyakla to koro osedok chien moweyo tij lendo, mondo gibi e Rapar koda e twak makende.
4. Ere kaka wanyalo konyo ji bang’ nyasi mar Rapar mondo omed ng’eyo Nyasaye?
4 Kony Jogo Mosechako Rwako Wach koda Jolendo Mosedok Chien Otim Dongruok: Jal mabiro golo twak mar Rapar, biro lero e yo machuok chenro mar puonjruok Muma, kendo obiro jiwo jogo ma osechako rwako wach mondo odhi nyime gi puonjruok e wi Jehova. Inyalo tiyo gi wechenego e konyo kendo jiwo joma ne igwelo mondo gimed ng’eyo Nyasaye. Ka podi ok gipuonjore Muma gie sani, ne ni ilimogi mapiyo bang’ birogi e Rapar, kendo nyisgi chenrowa mar puonjruok gi ji Muma ma onge chudo. Mondo gitim dongruok e ng’eyo Nyasaye, biro dwarore mondo gibi e chokruoge mag kanyakla. (Hibr. 10:24, 25) Mondo mano otimre, jiwgi mondo gichak biro e chokruok ma ok gibare. Jodongo onego ochan limo Jokristo ma osedok chien to obiro e Rapar, mondo omi gimed jiwonegi paro ma ne ochiw e twak mar Rapar. Timo kamano nyalo jiwogi mondo gichak tiyo kanyachiel gi kanyakla kendo.
5. Bedo e nyasi mar Rapar nyalo konyowa nade?
5 Nyasi mar Rapar en gima miyowa thuolo mar paro matut kuom gima Jehova kod Yesu osetimonwa. Paro e yo ma kamano miyo waherogi matut kendo wabedo gi timbe mabeyo. (2 Kor. 5:14, 15; 1 Joha. 4:11) Sani ema onego wachak ikoree wan wawegi kaachiel gi jogo ma walendoni morwako wach, mondo wabi wabedi e nyasi maduong’ni ma en kinde ma walando kendo ‘nyiso tho mar Ruoth.’—1 Kor. 11:26.