“Timuru Ma” Rapar Mibiro Tim April 5
1. Ang’o momiyo Rapar en gima duong’ ahinya?
1 “Timuru ma, uparago.” (Luka 22:19) Magi e weche ma Yesu notiyogo kochiko jolupne mondo otim Rapar mar thone mar misango. Kaluwore gi gigo duto ma rawar nochopo, onge odiechieng’ ma Jokristo kawo mapek moloyo Rapar mitimo higa ka higa. Nikech Rapar ma higani ma nobed April 5 medo kayo, ere kaka wanyalo nyiso ni wagoyo ne Jehova erokamano?—Kol. 3:15.
2. Wanyalo nyiso nade ni wakawo Rapar mapek kokalo kuom puonjruok kod paro matut e wi gik ma wapuonjore?
2 Ikri: Kinde duto wajatimo ikruok ne gigo ma wakawo mapek e ngimawa. Wanyalo iko chunywa ne Rapar kuom nono kanyachiel kaka joot gik ma notimore ka koro ngima Yesu nochomo gikone e piny kendo kuom paro matut e wi wechego. (Ezra 7:10) Ndiko moko yudore e kalenda kod bug Nono Ndiko Pile, to kama iwuoyoe matut e wi wechego kod sula ma giyudore e bug Mtu Mkuu nie Mnara wa Mlinzi ma Februar 1, 2011 e ite mag 23-24.
3. Wanyalo nyiso nade ni wakawo Rapar mapek kuom lendo e okang’ momedore?
3 Lendi: Wanyalo nyiso bende ni wakawo Rapar mapek kuom lendo e okang’ momedore. (Luka 6:45) Chakre Ngeso Mach 17, wabiro bedo gi kampen mibiro tim e piny ngima mar gwelo jomamoko e Rapar. Donge inyalo timo lokruok moko e chenroni mondo ilend kuom thuolo momedore, kata ka nyalore to ibed painia makonyo? Donge nyalo bedo maber ka uwuoyo e wi wachno kaka joot e Lamo mar Joot maluwo?
4. Gin ber mage ma wayudo kuom dhi e Rapar?
4 Mano kaka wayudo ber ahinya ka wadhi e Rapar higa ka higa! Mor ma wan-go kod hera ma waherogo Nyasaye medore ka waparo matut kuom ng’wono ma Jehova nonyiso ka nochiwo Wuode ma miderma mondo obednwa rawar. (Joh. 3:16; 1 Joh. 4:9, 10) Mae miyo ok wadag ne wan wawegi. (2 Kor. 5:14, 15) Bende ojiwo gombo ma wan-go mar pako Jehova e lela. (Zab. 102:19-21) Kuom adier, jotich Jehova ma nigi chuny mar erokamano rito gi siso ahinya Rapar ma wabiro bedogo April 5 mondo waland ne jomoko ‘tho mar Ruoth.’—1 Kor. 11:26.