Wanyis Chuny mar Erokamano
Rapar Mibiro Tim April 17
1. Gin weche mage ma jandik-zaburi nowacho mowinjore ahinya e kinde mag Rapar?
1 Timbe Jehova mag ng’wono kod mag reso ji nomiyo jandik-zaburi openjo kama: “Nachul Jehova ang’o kuom werene duto momiya?” (Zab. 116:12) E kindegi bende jotich Nyasaye nigi gik mang’eny ahinya mamiyo gibedo gi chuny mopong’ gi erokamano. Higini mang’eny bang’ ka nosendik wechegi, Jehova nomiyo dhano mich maduong’ ahinya, michno en rawar. Seche mwaikore ne timo nyasi mar paro tho Kristo ma nobed April 17, wan gi gik mabeyo ahinya ma mimiyo wabedo gi chuny mopong’ gi erokamano.—Kol. 3:15.
2. Moko kuom gigo mamiyo wabedo gi erokamano nikech rawar gin mage?
2 Gweth Mwayudo Nikech Rawar: Kokalo kuom rawar, inyalo ‘wenwa richowa.’ (Kol. 1:13, 14) Mae miyo walamo Jehova ka wan gi chuny maler. (Hib. 9:13, 14) Wanyalo wuoyo gi Jehova e lamo ka wan gi chuny man thuolo. (Hib. 4:14-16) Jogo maketo yie kuom rawar nigi geno maduong’ ahinya mar yudo ngima mochwere!—Joh. 3:16.
3. Ere kaka wanyalo nyiso chuny mar erokamano ne Jehova kuom mich mar rawar?
3 Nyis Chuny mar Erokamano: Yo achiel mwanyisogo chunyno en somo kuonde monyis mag Muma motudore gi Rapar odiechieng’ kodiechieng’ kendo paro matut kuomgi. E Mnara wa Mlinzi ma Februar 1, 2011, sula ma wiye wacho ni “Je, Umejitayarisha kwa Ajili ya Siku Muhimu Zaidi Katika Mwaka?” noiki mondo okonywa e wachni. Bende wanyalo lamo Jehova ka wanyise gi chunywa duto kaka wageno mich mar rawar. (1 Thes. 5:17, 18) Bedo e Rapar kaka Yesu nochiko nyiso ni wan gi chuny mopong’ gi erokamano. (1 Kor. 11:24, 25) E wi mano, wanyalo luwo hera mar Jehova monyiso e okang’ malach kuom gwelo ji mang’eny kaka nyalore mondo obed kodwa e nyasini.—Isa. 55:1-3.
4. Ang’o monego wang’ad ni wabiro timo?
4 Jotich Jehova ma chunygi opong’ gi erokamano ok bi neno Rapar mana kaka chokruok ma wajobedogo. En e chokruok maduong’ie moloyo e higa mangima! Kaka odiechieng Rapar medo sudo machiegni, onego wang’ad ni wabiro timo kaka jandik-zaburi ma nondiko kama: “A chunya, pak Jehova, kendo kik wiya wil gi werene duto.”—Zab. 103:2.