Goyo Erokamano Kuom Mich Maduong’ ma Nyasaye Nochiwo
1. Ang’o momiyo onego wagone Jehova erokamano ahinya?
1 Kuom “mich mabeyo” duto ma Jehova osechiwo, maduong’ moloyogi en rawar ma nochiwo kokalo kuom Wuode mohero. (Jak. 1:17) Rawarno miyo wayudo gweth ahinya kendo omiyo ing’wononwa richowa. (Efe. 1:7) Mano miyo kinde duto wagoyo erokamano. Kinde mag Rapar e maberie moloyo ka wakaw thuolo mar paro matut kuom mich maduong’ni.
2. Ere kaka wanyalo konyo joodwa kaachiel gi wan wawegi bedo joma goyo erokamano nikech rawar?
2 Kony Joodi Obed Joma Goyo Erokamano: Mondo ikony joodi obed joma goyo erokamano nikech rawar, donge unyalo keto tenge kinde matin e Lamo mar Joot maru kodong’ jumbe moko mondo otim Rapar mabiro bet Mach 30, mondo unon weche moko e wi rawar? Bende timuru Somo mar Muma mar odiechieng’ kodiechieng’ mar Rapar kanyachiel kaka joot. Ng’ato ka ng’ato onon kaka rawar osekonye kendo kaka osemiyo obedo gi paro maber kuom Jehova, kuome owuon, kuom joma moko kod kuom ndalo mabiro. Bende biro bedo maber ka upuonjoru wende ariyo manyien mibiro tigo e Rapar, ma gin wer namba 8 kod 109.—Zab. 77:12.
3. Ere kaka wanyalo bedo joma goyo erokamano?
3 Kaka Wanyalo Goyo Erokamano: Chuny mopong’ gi erokamano nikech rawar jiwowa mondo wawuo gi jomoko kuom Jehova kendo wuoyo kuom herane maduong’ ma nomiyo ooro Wuode. (Zab. 145:2-7) E dweche mag Mach, April, kod Mei, joot moko jogoyo erokamano nikech rawar kuom chano mondo achiel kuomgi obed painia makonyo. Ka mano ok nyalre, be unyalo manyo “kinde” mondo umed seche mutiyogo e lendo? (Efe. 5:16) Erokamano ma wan-go bende biro jiwowa mondo wakony jomoko obi e Rapar. (Fwe. 22:17) Chak ndiko nying joma ibiro gwelo moriwo joma idok limo, jopuonjre Muma, wedeni, jotich weteni, kod joma odak machiegni kodi, kendo itim duto minyalo e riwo lwedo kampen makende mar gwelo ji e Rapar.
4. Ere kaka wanyalo tiyo gi kinde mar Rapar e yo maber?
4 Kinde mar Rapar miyowa thuolo mang’eny mag goyo erokamano ne Jehova kuom mich ma nomiyo dhano. Mad wati gi kindeno e medo goyo erokamano nikech rawar kaachiel gi “mwandu mak por mag Kristo.”—Efe. 3:8.