Paro Rawar e Yo Manyiso Erokamano

1, 2. Ang’o momiyo waparo rawar e yo manyiso erokamano?

¹ E luwo chik Yesu, Jokristo manie pinje duto biro chokre bang’ podho chieng’, Ngeso, Mach 22, 2008, mondo gipar tho mar Yesu Kristo. (Luka 22:19; 1 Kor. 11:​23-​26) Watimo mano nikech wanyiso erokamano matut kuom gima ne otim e odiechiengno higni 1,975 mosekalo. Yesu ne omiyo nying Wuon mare obedo maler, kuom chung’ motegno nyaka thone malit e yadh sand, mi ne ochiwo dwoko maber chuth kuom akwede mag Satan.​​—⁠Ayub 1:​11; Nge. 27:11.

² Remb Yesu ma ne ochwer ne omiyo singruok manyienno otiyo, mi omiyo dhano ma ok kare obedo kaka nyithind Nyasaye ka gin gi geno mar locho gi Kristo e Pinyruodhe manie polo. (Yere. 31:​31-​34; Mari. 14:24) E wi mano, hera ma Nyasaye ne oherogo dhano ne onyis maler kuom chiwo Wuode ma ne ohero ahinya kaka misango, mana kaka Yesu owuon ne olero ni Nikodemo.​​—⁠Joha. 3:​16.

3. Jogo mabiro dhi e Rapar biro yudo kony e yo mane?

³ Gwel Jomoko: Tijwa mar Pinyruoth ma Januar ne onyiso ni wandik piny nying joma wang’erego mondo wami ng’ato ka ng’ato kalatas mar gwelogi. Be isechako gwelo joma ne indiko nyinggi piny? Be itimo chenro mar timo kampen ma biro chakre Mach 1 mar gwelo ji e Rapar? Jogo mabiro dhi e Rapar biro winjo weche mogol e Ndiko manyalo gero yie e rawar, kendo yieno biro miyogi ngima mochwere.​​—⁠Rumi 10:17.

4. Ang’o momiyo onego wachop chon e Rapar?

⁴ Jogo manyalo onego oikore chopo chon mondo girwak e yo mamor joma ne oyie biro bang’ yudo kalatas makende mar gwelo ji. Odiechieng Rapar ji hinyo biro mang’eny omiyo dwarore ahinya ni wamany ji manyien ma obiro kod jogo ma biro e chokruok kinde moko.

5. Inyalo iko chunyi ne Rapar e yo mane?

⁵ Ik Chunyi: Kuyachunguza Maandiko Kila Siku​​—⁠2008 kod Kalenda ya 2008 nigi chenro makende mar somo Muma e kinde Rapar chakre Mach 17. Paro gik madongo ma ne otimore e kinde mogik mar ngima Yesu e piny biro konyi mondo iik chunyi ne Rapar. (Ezra 7:​10) Paro matut e yor lamo kuom weche manie Muma biro miyo inyis erokamano e yo matut ne hera ma Jehova kod Wuode onyiso kuom chiwo rawar.​​—⁠Zab. 143:5.

6. Nyiso erokamano kuom rawar biro konyowa nade?

⁶ Kaka kinde Rapar sudo machiegni, we waikre wan wawegi kod iko jomoko ne odiechieng’ maduong’ni. Keto rawar e paro e yo manyiso erokamano biro miyo winjruokwa gi Jehova kod Wuode obed motegno. (2 Kor. 5:​14, 15) Mano bende biro miyo waluw timgi e nyiso hera mar chiwruok ne jomoko.​​—⁠1 Joha. 4:​11.