Bed gi Chuny Moil Sama Itimo Ikruok ne Rapar
1. Kinde Rapar miyowa thuolo makende mar nyiso ang’o?
1 Rapar mibiro tim chieng’ Tich Ariyo, Mach 26, biro miyowa thuolo makende mar nyiso ni wail kata wamor gi chenro ma Nyasaye notimo mondo wayud warruok. (Isa. 61:10) Bedo gi chuny moil kata ka odiechieng’no pok ochopo biro miyo watim ikruok maber. E yo mane?
2. Ang’o momiyo watimo ikruok maber ne Rapar?
2 Ikruok ne Rapar: Kata obedo ni Rapar ma bende iluongo ni Chiemb Odhiambo mar Ruoth en nyasi maduong’, itimega e yo mayot. Kata obedo ni itime e yo mayot kamano, pod ikruok dwarore ahinya mondo chenro duto odhi kare. (Nge. 21:5) Kuom ranyisi, nyaka yier sa kod kama idhi timee. Nyaka many makate gi divai mowinjore chon. Kama ibiro timee nyaka ik maler. Jagol-twak, joting’ makate gi divai, kod jorwak welo nyaka ikre maber. En adier ni ikruok ma kamago chiegni mana rumo gie sani. Gimomiyo watimo ikruok maber kamano en nikech wamor gi misango mar rawar ma kelonwa resruok.—1 Pet. 1:8, 9.
3. Ere kaka wanyalo iko chunywa ne Chiemb Odhiambo mar Ruoth?
3 Ik Chunyi: Mondo mi wane Rapar kaka gimaduong’ e ngimawa, gimachielo ma dwarore en ni waik chunywa. (Ezra 7:10) Omiyo, onego wachan mondo wasom kuonde moyangi misomo e Muma e kinde Rapar, kae to wapar matut kuom gik ma notimore ne Yesu kochiegni tho. Paro matut kuom ranyisi ma Yesu noketo mar bedo gi chuny mar chiwruok biro jiwowa mondo wan be wabed gi chuny mar chiwruok.—Gal. 2:20.
4. Kuom ber duto mwayudo kokalo kuom rawar, mane ma mori moloyo?
4 Tho mar Kristo miyo Jehova duong’. Misangoneno resowa ae twech mar richo kod tho. (1 Joh. 2:2) Bende omiyo wabedo gi winjruok maber gi Nyasaye kendo bedo gi geno mar dak nyakachieng’. (Kol. 1:21, 22) E wi mago, ka waneno tho mar Kristo e yo mowinjore, wabiro dhi nyime dak kaluwore gi chiwruokwa ne Jehova, kendo chung’ motegno kaka jolup Kristo. (Math. 16:24) Kuom mano, bed gi chuny moil sama idhi nyime ikori ne Rapar ma koro okayoni!