Be Iikori ne Rapar?

Yesu ne ochokore gi osiepene mogeno ahinya e dwe mar Nisan tarik 13 e higa mar 33. Mano ne en odhiambo mogik ma nodhi bedo gi osiepenego kapok onege. Ne odhi timo kodgi sawo mogik mar Pasaka kae to ochako nyasi moro manyien miluongo ni Chiemo Modhiambo mar Ruodhwa. Ne dwarore ni gitim ikruok ne odiechieng’ makendeno. Omiyo, ne ooro Petro gi Johana mondo gidhi giik gik moko. (Luka 22:7-13) Chakre kindeno, higa ka higa Jokristo ma dwaro paro tho mar Yesu osebedo ka timo ikruok ne Raparno. (Luka 22:19) Gin ikruok mage monego watim ne Rapar ma ibiro tim April tarik 3?

Ikruok ma Jodongo Onego Otim:

Ikuru kama ubiro timoe Rapar, onyalo bedo e Od Romo kata kamoro machielo mowinjore. Kama uikono onego obed gi kombe moromo, taya ma kelo ler moromo, kendo kama ok othung’. Timuru chenro mondo olwok kama ubiro chokorueno chon.
Yieruru jagol-twak mowinjore, jakom, kod owete ma biro lemo ne makate kod divai.
Kapo ni nitie kanyakla machielo ma biro tiyo gi kama uchokorue, winjreuru e seche ma kanyakla ka kanyakla biro chakoe Rapar, kod kuonde ma kanyakla ka kanyakla onego odonjgo kendo wuokgo bang’ tieko.
Yieruru jorwak welo kod joma biro konyo e kadho mkate gi divai, kendo unyis ng’ato ka ng’ato kuomgi gima obiro timo.
Ikuru makate gi divai mowinjore, kaachiel gi sende, glese mag divai, mesa, kod kitamba mipedho e mesa.

Ikruok ma Jolendo Onego Otim:

Tim chenro mar riwo lwedo chuth kampen mar gwelo ji e Rapar.
Ndik nyinge mag jopuonjre Muma, wede, joskul weteni, jotich weteni, kod jomamoko ma diher gwelo e Rapar, kendo igwelgi.
Som kuonde moyangi e Muma misomo kinde Rapar kendo ipar matut kuomgi.
Ikri rwako welo mobiro e Rapar.