Luw Ranyisi mar Jonabi—Amos
1. Ang’o momiyo ranyisi mar janabi Amos nyalo miyowa jip e kindegi?
1 Be seche moko isewinjoga e chunyi ka gima ok iwinjori ne tij lendo nikech ne ipon e ngima mapiny kata nikech ionge gi somo maber? Ka en kamano, to kare ranyisi mar Amos nyalo jiwi ahinya. Ne en mana jakwadh rombe kendo notimo tije mamoko bende kinde ka kinde, to ema pod Jehova nomiye ote mapek mondo olandi. (Amos 1:1; 7:14, 15) Kamano bende, e kindegi Jehova pod tiyo gi jogo mobolore, kata mana joma odak e ngima mapiny kata ma sombgi ni piny. (1 Kor. 1:27-29) Gin puonj mage momedore ma wayudo kuom janabi Amos manyalo konyowa e tijwa mar lendo?
2. Ang’o ma nyiso ni wanyalo chung’ motegno sama waromo gi akwede e tijwa mar lendo?
2 Chung’ Motegno Sama Iromo gi Akwede: Ne nitie jadolo moro ma nyinge Amazia e pinyruoth ma masawa ma noriwo dhoudi apar mag Israel. Jadolono ne lamo nyaroya. Ka nowinjo weche ma janabi Amos nokoro, nothianone. Ne chal mana kagima nonyiso Amos ni: ‘Dhi thuru kendo iweri kodwa, wan-gi dinwa wawegi!’ (Amos 7:12, 13) Jadolono nogwenyo weche mag janabi Amos ka otemo semo Ruoth Jeroboam mondo oketh tij janabino. (Amos 7:7-11) Kata kamano, timbe jadolono ne ok onyoso chuny Amos. E kindegi bende, jotend din moko osesemo josiasa mondo osand jotich Jehova. Kata kamano, Jehova singonwa ni onge gir lweny moro amora mothedhi mar kedo kodwa mabiro loyowa chuth.—Isa. 54:17.
3. Wach maber ma walando e kindegi oriwo weche mage ariyo?
3 Land Odiechieng Jehova mar Bura kod Gueth mag Kinde Mabiro: En adier ni weche ma Amos nokoro ne wuoyo kuom kum ma ne idhi mi dhoudi apar mag Israel ma ne nie pinyruoth ma masawa. Kata kamano, notieko ndiko bug Muma miluongo gi nyingeno kowacho kaka bang’e Jehova ne dhi dwoko ogandano e pinygi kendo olonegi gueth mang’eny. (Amos 9:13-15) Wan be walando “chieng’ bura,” moriwo ote mar kum. Kata kamano, mano ok e wach kende ma walando sama wanyiso ji ‘wach maber mar pinyruoth.’ (2 Pet. 3:7; Math. 24:14) Wanyisogi bende ni bang’ ka Jehova oseketho jomaricho e lweny mar Har–Magedon, joma kare biro yudo thuolo mar dak e paradis e piny.—Zab. 37:34.
4. Ang’o momiyo wan gadier ni wabiro dhi nyime timo dwach Jehova?
4 Nikech walando wach Pinyruoth e piny mopong’ gi jo akwede, waromo gi tembe mang’eny sama watemo matek mondo wasik ka wachung’ motegno kendo timo dwach Jehova. (Joh. 15:19) Kata kamano, wan gadier ni Jehova biro miyowa gik ma dwarore mondo wadhi nyime timo dwache, mana kaka notimo ne janabi Amos.—2 Kor. 3:5.