Kik Iwe Gimoro Moni Puonjo Ji Muma!

1. En yo mane ma wanyiso godo ni ok ‘watuon ji gik mabeyo’?

¹ Ka walando wach maber mar Pinyruodh Nyasaye gi kinda, ok wabi ‘tuono ji’ modak e alwora momiwa “gik mabeyo.” (Nge. 3:27) Onge wach ma dibed maberie maloyo lando ne dhano wach kinde gweth manobedie e bwo loch Nyasaye. Kata ka nyalo bedo ni iriwo lwedo tij lando geno mar Pinyruoth, kilendo ne ji ma ok ne ichano, kata chiwo negi buge, donge nyalo bedo maber ka gombo mari en chako puonjruok gi ng’ato Muma, ka podi ok itim kamano?

2. Ang’o manyalo monowa chako puonjruok gi ng’ato Muma?

² Seche moko, achiel kuom gik mamonowa ahinya puonjruok gi ji Muma en paro ma wan-go wawegi. Jomoko ok chak puonjruok gi ji Muma nikech gionge chir ka giparo ni ok ginyal, kata nikech gidich. Paro michiwo piny kagi nyalo konyi loyo gik manyalo moni timo tij puonjruok gi ji Muma.—Math. 28:19; Tich 20:20.

3. Ang’o momiyo waromo puonjo ji Muma?

³ Bedo Ma Onge Chir: Nyalo bedo ni ne ok isomo ahinya e skul, kata nyalo bedo ni in gi kiawa kabe in gi nyalo mar puonjruok gi ng’ato Muma. Jokristo mokwongo ma ne olony e tij lendo, ne gin joma ikawo ni “jopoya gi jo makiya.” Ang’o ma ne konyogi puonjo jomoko adiera? Ne yande “gin kod Yesu.” (Tich 4:13) Ne gipuonjore kuom Yesu, Japuonj Maduong’, ma puonjne koda yorege mag puonjo osendiknwa ei Muma. Kata kapo ni sombi mar skul ok ni malo ahinya, gie sani iyudo puonj e wi Nyasaye, ma en puonj ma ok nyal pim gi puonj moro amora—Isa. 50:4; 2 Kor. 3:5.

4. Wanyalo puonjore ang’o kuom ranyisi mar Amos?

⁴ Seche moko Jehova ne tiyo gi jonabi e kwero joloch kata joma moko ma ne dongo. Moko kuom jonabigo, kaka Amos, ne wuok e anyuola ma ok nigi yuto ahinya. Amos wuon nowacho kama: “Ne ok an janabi, kata mana wuod janabi; to ne an jakwath, kendo jalos ng’ope.” (Amos 7:14) Kata kamano, mano ne ok omono Amos chiwo ote mag bura moa kuom Jehova ne Amazia, jadolo mane lamo roya. (Amos 7:16, 17) Kinde duto nyaka wang’e ni watiyo tij Nyasaye, kendo obiro miyo wabed jo molony chuth ne tich mosemiyowa mondo watim.—2 Timo. 3:17.

5. Ang’o momiyo onego watem wachak puonjruok gi ng’ato Muma kata kapo ni wan gi chenro modich?

⁵ Bedo Modich: Kata kapo ni in-gi chenro modich, nyaka bed ni iseketo thuolo tenge mar riwo lwedo tij lendo kinde ka kinde. Puonjruok gi ng’ato Muma nyalo bedo achiel kuom gigo makelo mor ahinya e tijwa mar lendo. Neno kaka Wach Jehova kelo lokruok e ngima ng’ato en gima ber ndi. (Hibr. 4:12) Jehova mor koneno kaka wachiwore mondo omi wakony ng’ato ‘ong’e adiera chuth.’ (1 Timo. 2:4) Kata malaike bende bedo mamor ndi ka ng’ato loko chunye koweyo yorege machon, kendo kotimo dongruok e bedo jatich Nyasaye.—Luka 15:10.

6. Wan gi thuolo mane makende e timo dwaro mar Nyasaye?

⁶ Dwaro mar Nyasaye en ni “ji duto okwo, kendo ging’e adiera chuth.” (1 Timo. 2:4) Mano kaka wan gi thuolo makende mar tiyo tich machopo dwaro mar Nyasaye, ma ok wawe gimoro omonwa puonjruok gi ji Muma!