Tim Duto Minyalo—Ka In-gi Chenro Modich
1. Ang’o momiyo jolendo moko oluoro tayo puonjruok mag Muma?
1 Nitie jomoko ma oluoro tayo puonjruok mar Muma nikech gin gi chenro modich. Tayo japuonjre Muma en gima kawo thuolo. Nyaka wati gi thuolowa e timo ikruok ne puonjruok, taye, koda konyo japuonjre mondo onyagre gi pek manyalo tame timo dongruok. Jaote Paulo nowacho ni nochiwo chunye e konyo joma ne ni Thessalonika mondo ong’e Jehova. (1 Thes. 2:7, 8) Ere kaka wanyalo tayo puonjruok mar Muma kata kapo ni wan-gi chenro modich?
2. Ere kaka hera mwaherogo Jehova otudore gi yo ma watiyogo gi thuolowa?
2 Tiyo ne Jehova Dwaro Kinde: En adier ni tiyo ne Jehova dwaro kinde. Kuom ranyisi, watiyo gi thuolo e dhi e chokruoge, lendo, somo Muma, koda lamo. Ka ng’at modich to ni e kend nyalo manyo thuolo mar bedo gi jaode, donge wan be wanyalo loso “kinde” mondo wati ne Jehova nikech wahere? (Efe. 5:15-17; 1 Joh. 5:3) Kaluwore gi weche ma Yesu nowacho, timo ji jopuonjre en achiel kuom yore madongo ma watiyonego Jehova. (Math. 28:19, 20) Keto wechego e paro biro konyowa kik waluor kawo ting’wa mar tayo puonjruok mag Muma.
3. Ere kaka wanyalo dhi nyime tayo puonjruok mar Muma kata ka dich moro ochocho chenrowa mar lendo?
3 To nade ka weche kaka tij andika, midekre, kata migepe ma wan-go e tij Nyasaye chocho chenrowa? Jolendo moko tiyo gi simo kata gige tudruok mamoko e tayo puonjruok mag Muma sama dich omakogi. Jolendo moko ma midekre oloko chenrogi jowuoyo gi jopuonjre mondo ema olimgi pacho gipuonjre kodgi. Moko to timo chenro gi jolendo mayudore mayot mondo otanegi puonjruok sama wach moro odiyogi.
4. Gweth mage ma wayudo ka watimo kinda e puonjo ji Muma?
4 Paulo noyudo mor ahinya kuom tiyo gi thuolo kod tekrene e konyo jomamoko opuonjre adiera. (Tich 20:35) Ka noparo matut kuom nyak ma noyudo e Thessalonika, nogoyo ne Jehova erokamano ahinya. (1 Thes. 1:2) Wan bende mor ma wan-go e tij lendo nyalo medore ka watemo matek mondo chenro modich kik monwa puonjo ji Muma.