Ti gi Websaitwa e Puonjo Nyithindi
1. Wich mondik ni “Watoto” e Websaitwa oting’o weche ma konyowa e timo ang’o?
1 Websaitwa mar jw.org olosi mondo okony ji duto, kata bed mana ni gin johigni adi. E Websaitno, ka idiyo kama ondiki ni “Mafundisho ya Biblia” e Kiswahili, kae to e bwoye idiyo wich ma ondiki ni “Watoto,” ibiro yudo weche ma konyo nyithindo kod jonyuolgi mondo obed machiegni e kindgi giwegi koda gi Jehova. (Rapar 6:6, 7) Ere kaka inyalo tiyo gi wijno e puonjo nyithindi?
2. Ere kaka inyalo yiero weche mowinjore gi hik nyithindi mondo itigo e puonjogi?
2 Kony Nyithindi Kaluwore gi Hikgi: Gik ma nyalo konyo nyathi moro opogore gi manyalo konyo nyathi machielo. (1 Kor. 13:11) Kuom mano, ere kaka inyalo yiero gik mowinjore gi hik nyithindi mondo itigo e puonjogi? Penjri kama: ‘Ang’o manyalo moro nyithinda? Ginyalo winjo tiend weche mathoth marom nade? Ginyalo keto pachgi e puonjruok kuom thuolo marom nade?’ Ka in gi nyithindo ma johigni adek kadok chien, inyalo nono kodgi sigendni manie bwo wich mawacho ni “Masomo Yangu ya Biblia” e bwo kar “Watoto.” Joot moko bende yudo ber kuom tiyo gi wich mondiki ni “Wafundishe Watoto Wako.” E wi mago, nitie weche mamoko kaka maluwogi.
3. Ere kaka jonyuol nyalo tiyo gi sigana kod gige tiegruok manie bwo wich mawacho ni “Miradi ya Ibada ya Familia” e puonjo nyithindgi?
3 Gik Minyalo Non e Lamo mar Joot: Gigo yudore e wich mawacho ni “Miradi ya Ibada ya Familia” kendo olosgi mondo jonyuol oti kodgi e puonjo nyithindgi. Mondo ing’e kaka inyalo tiyo gi sigana kod gige tiegruok manie bwoye, di kar siganano kae to idi kama ondiki ni “Pakua” mondo isom “Mwongozo kwa Wazazi.” Ti gi pichni moket kanyo e puonjo nyithindi, kuom ranyisi, unyalo buko pichnigo. Nyithindo ma bet dito nyalo pong’o weche moketi kama ondiki ni “Mazoezi ya Kujifunza.” Gik mitimo e tiegruok ka tiegruok otudore gi sigana kata puonj miwuoye, omiyo, nyithindo duto nyalo nono sigana kata puonj achiel achielno kata obedo ni utimo tiegruok mopogore opogore e lamou mar joot.
4. Gin weche mage mayudore e bwo wich mawacho ni “Uwe Rafiki ya Yehova” ma jonyuol nyalo tiyogo e puonjo nyithindgi?
4 Bed Osiep Jehova: E kama wacho ni “Uwe Rafiki ya Yehova” e Websaitwa, nitie vidio, wende, kod weche mamoko molos mondo jonyuol otigo e rwako Wach Nyasaye e chuny nyithindgi matindo. (Rapar 31:12) Moro ka moro kuom vidio machuokgo oting’o puonj madongo. Weche mag tiegruok mayudore kidiyo kama ondik ni “Mazoezi” bende jiwo puonjgo. Nikech nyithindo matindo ohero wer, to wer bende konyo nyithindo e mako gik ma gipuonjore, nitie wende mag Pinyruoth ma olos ahinya-ahinya ne nyithindo kendo iketogiga e Websaitwa kinde ka kinde.
5. Ang’o momiyo jonyuol onego okwa Jehova mondo okonygi sama gipuonjo nyithindgi adiera?
5 Un jonyuol, Jehova dwaro ni ubed gi lony e tiego nyithindu. Kuom mano, kwayeuru mondo okonyu sama upuonjo nyithindu adiera. (Bura 13:8) Ka urwako kony ma Jehova chiwo, ubiro dhi maber e tiego nyithindu mondo gibed gi ‘rieko ma kelo warruok e yor yie kuom Kristo Yesu.’—2 Tim. 3:15; Nge. 4:1-4.