Ti gi Websaitwa e Lendo​—“Uwe Rafiki ya Yehova”

Ka idiyo kama wacho ni “Mafundisho ya Biblia” e Websaitwa mar jw.org e dho Swahili, kae to idiyo kama wacho ni “Watoto,” ibiro chopo kama nitie wich ma wacho ni “Uwe Rafiki ya Yehova.” Ka idiyo kanyo, ibiro yudo wende, vidio, kod gik mamoko ma nyithindo nyalo timo. Be isetemo nyiso joma ilendonegi weche mabeyogo ma yudore e Websaitwa? Kapo ni ipuonjori Muma gi janyuol ma nigi nyithindo matindo, donge inyalo nyise wechego? Mano nyalo jiwe nono weche mamoko manie Websaitwa.

Ka ne owadwa moro pogo trakt mar Wach Pinyruoth Na. 38, ne omiyo miyo moro trakno, kendo miyono ne ochako mana some gie sano. Miyono ne nigi nyithindo moko ma bende ne nigi siso mar somo trakno. Owadwano nowuoyo machuok kuom weche manie i trakno, kae to onyise adres mar Websaitwa ma ondik e tok trakno. Nikech miyono ne mor gi wechego, owadwano ne okawo thuolo mar tugo ne miyono kaachiel gi nyithindego achiel kuom vidio mag Kaleb kotiyo gi simbe.

Nyaminwa moro ne onyiso dhako moro ma gitiyogo ma nigi nyithindo matindo Websaitwa kod weche ma yudore e iye ma nyalo konyo joot. Dhakono ne odhi e Websaitwano kendo ng’iyo weche manie iye kanyachiel gi nyithinde. Bang’e, dhakono ne onyiso nyaminwa ni, nyithinde sani siko ka wero mana wer mar “Lihubiri Neno,” ma en achiel kuom wende ma yudore e wich mar “Uwe Rafiki ya Yehova.”

Donge inyalo temo mondo ing’e weche ma yudore e wich mar “Uwe Rafiki ya Yehova” ma yudore e Websaitwa mar jw.org, kendo golo vidio, wende, kod gik mamoko ma nyithindo nyalo timo? Timo kamano biro nyiso ni koro iikori mar tiyo gi weche manie Websaitwago e lendo. Mano kaka wan gi mich ma jaber ma konyowa tiyo ne Ruoth!​—Tich Joote 20:19.