Ti gi Websaitwa e Lendo​—Dwoko Penjo ma Ji Nigo e Wi Muma

Ka wadonjo e Websaitwa mar jw.org e dho Swahili, nitie wich mawacho ni “Mafundisho ya Biblia,” to e bwo wijno nitie kama wacho ni “Majibu ya Maswali ya Biblia,” moting’o dwoko mag penjo ma ji nigo e wi Muma. Ber mondo wang’e penjo ma nitie kanyogo mondo kapo ni ng’ato openjowa achiel kuom penjogo, to wanyalo nyise kaka onyalo yudo dwoko e Websaitwa. Bende, wanyalo tiyo gi penjogo e chako mbaka gi ji sama walendo. Kuom ranyisi, wanyalo yiero penjo moro ma waparo ni nyalo mako pach ji e alworawa, kae to ka walendo ne ng’ato, wanyalo penje penjono. Ka osechiwo pache, wanyalo nyise gima Muma puonjo ka watiyo gi paro mochiw kuom penjono e jw.org. Bang’e, wanyalo lerone kata siemone kama wayudoe dwokono. To ka wahero, wanyalo tang’one Websaitwa kendo kwaye mondo osom dwoko moket kanyo achiel kachiel. Nitie chi jarit-alwora moro ma gologa weche momaki miwinjo mag dwokogo e Websaitwa e dho Kisungu, kae to oketogi e simbe. Ojachako mbaka kama: “Ji mang’eny penjorega ni, ‘Dibed ni Nyasaye e ma kelonwa chandruoge?’ Be diher yudo dwoko mar penjono mana kuom nyiriri 51 kende?” Kae to otugo ne wuon ot weche momaki ma dwoko penjono. Tiyo gi yorno osekelone nyak miwuoro. Sama otieko, onyisoga ji sula mar 11 e bug Muma Puonjo.