Ti gi Websaitwa e Lendo

Websaitwa mar jw.org en gima konyowa ahinya lando wach maber nyaka kuonde maboyo mogik e “tung’ piny.” (Tich 1:8) Thoth joma walendonegi ok fwenyga Websaitno kigin. Kar mano, kinde mang’eny gifwenyega mana ka jolendo ema onyisogi.

Nitie jarit-alwora moro ma osekawo vidio mar Ang’o Momiyo Onego Ipuonjri Muma? e Websaitwa kendo kete e simbe, kendo onyise ji e thuolo moro amora moyudo. Kuom ranyisi, sama olendo ot ka ot, onyiso weg udi niya: “Kawuono walimo ji mondo wakonygi yudo dwoko mag penjo moko adek madongo: Ang’o momiyo chandruok opong’o piny? Ere kaka Nyasaye biro tieko chandruogego? To ere kaka wanyalo nyagore gi chandruogego gie sani? Vidio machuokni dwoko penjogo.” Kae to ochako tugonegi vidiono. Sama vidiono dhi nyime, orango wuon ot mondo one kabe wechego donjone. Vidiono olos e yo ma mako pach ji, kendo ka gichako nene, to gidwaro ni odhi nyime nyaka tung’. Ka wuon ot osetieko neno vidiono, jarit-alworano nyise kama: “Donge iwinjo ka owach kanyo ni inyalo pong’o fom e Websatwa mondo ikwa puonjruok Muma? To nikech koro an kae, anyalo nyisi mapiyo kaka inyalo puonjori Muma.” Ka wuon ot oyie, onyise kaka onyalo timo puonjruok kotiyo gi brosua mar Wach Maber. To ka wuon ot odich, oloso chenro mar timo kamano e limbe maluwo. Sama jarit-alworano odhi yueyo matin kama ichiemoe to ng’ato obet e bathe, ochako kode mbaka kae to onyise vidiono mana kaka otimoga seche ma olendo ot ka ot. To nade in? Be itiyo gi Websaitwa e lendo?