Jachuechwa ma Jahera Dewowa
1. JACHUECHWA MIYO CHIENG’ WUOK
Parie kaka ngima nyalo chalo e pinyni ka po ni chieng’ onge! Teko chieng’ e ma miyo yien bedo gi oboke, maupe, olembe, kod kodhi. Bende, teko mar chieng’ e ma miyo yien ywayo pi ma ni e lowo mi tergi e oboke kae to pigego wuok e oboke mi gi gidog e kor polo.
2. JACHUECHWA MIYO KOTH CHUE
Koth en mich makende ma Nyasaye chiwoga mondo piny onyag chiemo. Nyasaye keloga koth kod kinde keyo mondo wayud chiemo, kendo mondo wawinj mit ngima.
3. JACHUECHWA MIYOWA CHIEMO KOD LEWNI
Wuone mang’eny parorega ahinya kuom kaka ginyalo miyo joodgi chiemo kod lewni. Ne ane gima Ndiko Maler wacho: “Nonuru adimba winy manie polo; ok gichuo, ok gike, bende ok giken e deche. To pod Wuonu manie polo pidhogi. Donge un to nengou duong’ ahinya moloyogi?”—Mathayo 6:25, 26.
“Puonjreuru kaka maua mag pap dongo; . . . to awachonu ni, kata mana [Ruoth] Solomon e ber mar duong’ne duto, ok norwakore kaka achiel kuom maupego. Koro ka Nyasaye rwako yien ayiena manie papgo kamano . . . , donge obiro rwakou moloyo, koso?”—Mathayo 6:28-30.
Ka Nyasaye nyalo miyowa chiemo kod lewni, donge mano nyiso ni onyalo miyowa gik mamoko duto ma wadwaro e ngima. Ka watemo mondo watim dwach Nyasaye, onyalo guedho kinda ma watimo e pidho cham, kata onyalo konyowa yudo tich mondo wayud pesa ma wanyalo ng’iewogo gik ma dwarore e ngima.—Mathayo 6:32, 33.
Kuom adier, sama wanono chieng’, koth, winy, kod maupe, waneno gimomiyo onego waher Nyasaye. Sula ma luwo biro nyiso kaka Jachuech osebedo ka wuoyo gi dhano.