NGIMAWA KAKA JOKRISTO
Yud Mor e Tij Lando Wach Maber
Be isega winjo ka tij lendo tekni? Ng’eny ji biro dwoko ni lendo tek. Nikech ang’o? Samoro wajaromo gi joma ng’ich ng’ich, joma kwedowa e alwora kata nyalo bedo ni wan wawegi waluor wuoyo gi joma wakiya. En adier ni gigi nyalo dwoko morwa chien. Kata kamano walamo Nyasaye mamor madwaro ni watine ka wamor. (Za 100:2; 1Ti 1:11) Gin weche mage adek mamiyo wabedo mamor sama walendo?
Mokwongo, walando wach mamiyo ji geno. Kata obedo ni ji mang’eny sani onge gi geno, wanyalo pong’o chuny ji “gi weche mokow mabeyo mag gi maber.” (Isa 52:7) Bende, wach maber mar Pinyruodh Nyasaye nyalo morowa. Kapok idhi lendo, par matut e wi gweth ma Pinyruodh Nyasaye biro kelo e piny.
Mar ariyo, wach maber ma walando konyo ji e yor ringruok kendo e yor chuny. Gipuonjre weyo timbe maricho maketho ngimagi kendo gibedo gi geno mar yudo ngima ma nyaka chieng’. (Isa 48:17, 18; Rum 1:16) Tem ane paro ni in e tich mar manyo kendo reso ji. Kata obedo ni jomoko ok dwar mondo oresgi, pod wadhi nyime manyo jogo madwaro yudo resruok.—Mat 10:11-14.
Mar adek kendo maduong’ie moloyo, en ni tijwa mar lendo miyo Jehova duong’. Omor ahinya gi tijwa mar lendo. (Isa 43:10; Hib 6:10) E wi mano, omiyowa rohone maler mondo okonywa chopo tij lendo. Omiyo, kwa Jehova mondo omiyi mor, ma en achiel kuom olembe mag roho maler. (Gal 5:22) Onyalo konyowa loyo parruok ma wan-go mi walend gi chir. (Tic 4:31) Wabiro yudo mor sama walendo kata obedo ni ji rwako wach e yore mopogore opogore e alworawa.—Eze 3:3.
Igombo ni ibed gi paro mane e wi tij lendo? Inyalo nyiso nade mor ma in-go?
NE VIDIO MA WIYE WACHO NI REGAIN JOY THROUGH STUDY AND MEDITATION, KAE TO IDWOK PENJO MALUWOGI:
Ang’o momiyo onego waket puonjruok wach Nyasaye obed mokwongo kata obedo ni walendo kuom seche mang’eny dwe ka dwe?
Wanyalo luwo ranyisi mar Maria e yo mane?
Iparoga matut e wi wach Nyasaye e seche mage?
Ang’o ma moriga sama ilando wach maber?