Nonro mag Chenro mar Chokruok mar Ngimawa kod Tijwa
AGOST 6-12
MWANDU MA YUDORE E WACH NYASAYE | LUKA 17-18
“Go Erokamano”
nwtsty weche mag timo nonro e Luk 17:12, 14
jodhoho apar: E ndalo ma ne indiko Muma, nenore ni jodhoho nohero chokore kanyachiel kata dak kanyachiel mondo gikonyre mayot e kindgi. (2Ru 7:3-5) Chik Nyasaye ne dwaro ni jodhoho odag mabor gi jomamoko. Bende, jadhoho nonego okwer jomamoko kik sud bute, kokok niya: “Ok aler, ok aler.” (Law 13:45, 46) Mano e momiyo ka ne jodhohogo odhi kama Yesu ne nitie, ne gichung’ mabor matin.—Som weche mag timo nonro e Mat 8:2 kod Glosari e nwt, “Leprosy; Leper.”
unyisru e nyim jodolo: Nikech Yesu Kristo ne ni e bwo Chike Musa ka ne en piny, nong’eyo ni jood Harun e ma ne gin jodolo, omiyo nonyiso jodhoho ma nochango ni gidhi ir jodolo. (Mat 8:4; Mar 1:44) Ka luwore gi Chike Musa, jadolo e ma ne nyaka yang ni jadhoho ochango adier. Kae to ng’at mochangono ne onego odog e hakalu mondo oter winy ariyo mangima ma ikwano kaka winy maler, yiend mataragwe kata sida, kitamba makwar, gi hesobu.—Law 14:2-32.
w08-SW 8/1 14-15 ¶9-10
Ang’o Momiyo Onego Wabed Joma Goyo Erokamano?
Be Yesu nofwayo afwaya ka ne jodhoho mamoko ok oduogo goyo erokamano? Muma dhi nyime wacho kama: “Nikech mano, Yesu nopenjo niya: ‘Donge ji apar duto nodoko maler, koso? To kare jomamoko ochikoka ni kanye? Onge kata ng’ato achiel kuomgi moseduogo mondo omi Nyasaye duong’, mak mana jal moa e oganda machieloni?’”—Luka 17:17, 18.
Ok ni jodhoho ochiko mamokogo ne gin joma richo, ooyo. Ne gisenyiso ni ne gin gi yie kuom Yesu kendo timo kaka Yesu nonyisogi, moriwo nyaka dhi Jerusalem e nyim jodolo. Kata obedo ni ne gimor ahinya gi gima Yesu notimonegi, ne ok gidok ir Yesu mondo gigone erokamano achiel kachiel. Mano ne ok omoro Kristo. To nade wan? Sama ng’ato otimonwa gimoro maber, be wagoyonega erokamano mapiyo kata ndikone ote moro machuok ma wagoyonego erokamano?
Nono Puonj Manie Wach Nyasaye
nwtsty weche mag timo nonro e Luk 17:10
ma kayiem nono: Inyalo loke aching’ ni, “ma onge tich.” Yesu ok ne wach e ngerono ni wasumbni, tiende ni jopuonjrene, okwanre kaka joma onge tich. Ka luwore gi weche molworo ndikono, “ma kayiem nono” nyiso ni wasumbni ne ok dhi ting’ore malo kata dwaro pak. Jotim nonro moko wacho ni wechego tiendgi gin, “wan awana wasumbni, omiyo, onge tiende dhialowa.”
nwtsty weche mag timo nonro e Luk 18:8
yie ma kama: Yesu ne ok wuo kuom yie mapile, to nowuoyo kuom yie moro sie, yie ma chal gi mar chi liel ma notiyogo e ngero. (Luk 18:1-8) Mano oriwo bedo gi yie ni lamo nyalo konyo kendo ni Nyasaye biro golo gik maricho ma itimo ne jotichne, kendo tieko joma timo gigo. Nenore ni Yesu ne ok odwoko penjo ma nopenjo e wi yie nikech samoro nodwaro ni penjono okony jopuonjrene onon kit yie ma ne gin-go. Yesu nogoyo ngero mar lamo kod bedo gi yieno e sa mowinjore ahinya nikech noyudo owuoyo e wi tembe ma jopuonjrene ne dhi romogo.—Luk 17:22-37.
AGOST 13-19
MWANDU MA YUDORE E WACH NYASAYE | LUKA 19-20
“Puonjri Kuom Ngero mar Mina Apar”
Ngero mar Mina Apar
Yesu wacho kama: “Ng’at moro moa e anyuola ma nigi huma nodhi wuoth e piny moro mabor mondo okete kaka ruoth eka oduog.” (Luka 19:12) Wuoth ma kamano nyalo kawo kinde malach. Adiera en ni, Yesu e ‘ng’at moa e anyuola ma nigi huma’ modhi wuoth e ‘piny mabor’ ma en polo, kuma Wuon mare biro ketee kaka ruoth.
E ngerono, ka ‘ng’at moa e anyuola ma nigi humano’ pok owuok, oluongo wasumbnine apar kae to omiyo moro ka moro kuomgi mina mar fedha konyisogi niya: “Timuru ohala nyaka chop aduog.” (Luka 19:13) Mina mar fedha gin pesa ma ni malo ahinya. Mina achiel en pesa michulo ng’ato bang’ tiyo e puodho kuom dweche adek.
Jopuonjre nyalo fwenyo ni gin e ma gichal gi wasumbni apar miwuoyoe e ngerono, nimar Yesu osegapimogi gi jokeyo. (Mathayo 9:35-38) En adier ni pok onyisogiga ni gikel cham ma gikayo. Kar mano, tich monego giti ma chalo gi tij keyo en konyo ji mondo obed jopuonjre ma nyalo donjo e Pinyruodh Nyasaye. Jopuonjrego tiyo gi mwandu ma gin-go mondo gikonygo joma nyalo yudo pok mar Pinyruoth.
Ngero mar Mina Apar
Ka jopuonjre nyalo fwenyo ni gin e ma gichal gi wasumbni mosetiyo maber gi mwandugi ka gimiyo jomamoko bedo jopuonjre, ginyalo bedo gadier ni Yesu biro mor kodgi. Kendo ginyalo bedo gadier ni Yesu biro guedho kinda ma kamano. En adier ni ngima jopuonjre Yesu ok chalre, kendo nyalo kod thuolo ma gin-go bende opogore. To e ma pod Yesu midhi ket mondo ‘obed ruoth,’ biro fwenyo kendo guedho kinda ma ginyiso e loko ji obed jopuonjrene.—Mathayo 28:19, 20.
Ngero mar Mina Apar
Misumbano ne ong’adne bura marach nikech ne ok otimo ohala mondo omed mwandu mag ruodhe. Joote geno neno ka Yesu locho e Pinyruodh Nyasaye. Omiyo, nenore ni ginyalo fwenyo ni wach mowacho e wi misumba mogikno nyiso ni ka ok ginyiso kinda ma dwarore, mano biro monogi donjo e Pinyruoth.
Nono Puonj Manie Wach Nyasaye
nwtsty weche mag timo nonro e Luk 19:43
chiel mar yien ma wiyegi bith: Chakre Mathayo nyaka Fweny, kae kende e ma otiye gi wach Grik ma khaʹrax. Diksonari moro lero ni tiende en “luth mabor ma wiye bith kata yiende mochielgo kamoro” kendo ni en “kama jolweny ochielo gi ludhe-ludhe mondo gigeng’ree ne jowasigu.” Weche Yesugo notimore e higa mar 70 ka ne Titus otayo jolwenj Jo-Rumi mi giloso chiel molworo Jerusalem. Titus ne dwa timo gik moko adek. Mokwongo ne en geng’o ne Jo-Yahudi kik ringi, mar ariyo ne en lombogi mondo gigo badgi piny, kae to mar adek ne en ni kech okagi sama odinnegi mondo gigo badgi piny ne Jo-Rumi. Mondo ne jolwenygo yud yiende ma gilosogo chielno, ne gitong’o yiende ma ne ni e gwenge mokiewo gi Jerusalem.
nwtsty weche mag timo nonro e Luk 20:38
e wang’e jogo duto ngima: Muma wacho ni Nyasaye neno joma ok luw chikene kaka joma otho kata obedo ni pod gingima. (Efe 2:1; 1Ti 5:6) Kamano bende, Nyasaye neno jotichne mosetho kaka joma ngima nikech en gadier chuth ni obiro chierogi.—Rum 4:16, 17.
AGOST 20-26
MWANDU MA YUDORE E WACH NYASAYE | LUKA 21-22
“Resruoku Okayo Machiegni”
Kaka Pinyruodh Nyasaye Biro Tieko Jowasike Duto
9 Ranyisi malich ma biro nenore e polo. Yesu nokoro niya: “Ibiro lok wang’-chieng’ obed mudho kendo dwe ok nochiw ler mare, mi sulwe biro lwar koa e polo.” Mano nyiso ni ji ok bi dwaro ni otagi gi jotend dindegi kata manyo ler irgi nikech biro yudo ka ji osechayogi. Be dibed ni Yesu ne wuoyo bende kuom gik malich ma ji ne dhi neno gi wang’gi ka timore e kor polo? Samoro. (Isa. 13:9-11; Joel 2:1, 30, 31) Ji biro timo ang’o ka gineno gigo ka timore? Gibiro ‘chandore malit’ nikech “ok gining’e gima ginyalo timo.” (Luka 21:25; Zef. 1:17) Kuom adier, jowasik Nyasaye duto te, bed ni gin ‘ruodhi mag piny gi wasumbni,’ ‘chunygi biro a nikech luoro kendo nikech gik ma biro timore e piny,’ kendo gibiro manyo kuonde ma ginyalo pondoe. Kata kamano, ok gibi yudo kama ginyalo pondoe ne mirimb Ruodhwa.—Luka 21:26; 23:30; Fwe. 6:15-17.
‘Hera Manie Kindu Kaka Owete Omed Dhi Nyime’
17 “Wabed gi chir maduong’.” (Som Jo-Hibrania 13:6.) Geno Jehova miyo wabedo gi chir kata bed ni waromo gi pek ma chalo nade. Chirni miyo wabedo gi paro mowinjore. Hera manie kindwa kaka owete kaachiel gi bedo gi paro mowinjore kamano, biro miyo wagerre kendo waho Jokristo wetewa. (1 The. 5:14, 15) Kata mana e kinde ma weche nobedie matek miwuoro e kinde masira maduong’, wabiro ‘chung’ tir kendo ting’o wiwa malo,’ ka wang’eyo ni resruokwa okayo machiegni.—Luka 21:25-28.
“Resruoku Okayo Machiegni”!
13 Joma nigi kido ka mag diek biro timore nade bang’ fwenyo ni “kethruok mochwere” ochomogi? Gibiro ‘goyo korgi gi kuyo maduong’.’ (Mat. 24:30) Kata kamano, owete Kristo kaachiel gi Jokristo ma riwogi lwedo biro timo ang’o e kindego? Ka gin gi yie kuom Jehova Nyasaye kod Wuode Yesu Kristo, gibiro luwo chik ma Yesu nochiwo kama: “Sama gigi ochako timore, chung’uru tir kendo uting’ wiu malo nikech resruoku okayo machiegni.” (Luka 21:28) Kuom adier, wabiro bedo mamor ka wan gadier ni ibiro reswa.
Nono Puonj Manie Wach Nyasaye
nwtsty weche mag timo nonro e Luk 21:33
Polo gi piny biro kalo: Ndiko mamoko wacho ni polo gi piny biro siko nyaka chieng’. (Cha 9:16; Za 104:5; Ekl 1:4) Weche ma Yesu nowachogo ne gin kaka ngero ma nyiso ni kata gimoro timre ma piny gi polo kal, weche Yesu to nyaka chop e wang’e kak. (Pim gi Mat 5:18.) Kata kamano, polo gi piny miwuoye kae nyalo bedo ni e ma iluongo bende ni “polo machon gi piny machon” e Fwe 21:1.
wechena ok nokal ngang’: Ndikono tiyo gi “ok” kod “ngang’” kanyachiel mondo ojiw ni weche Yesu biro siko nyaka chieng’.
Unubed “Pinyruoth ma Jodolo”
15 Bang’ chako Chiemb Odhiambo mar Ruoth, Yesu notimo singruok moro gi jopuonjrene ma nosiko kode, kendo kinde mang’eny singruogno iluongo ni singruok mar Pinyruoth. (Som Luka 22:28-30.) Mopogore gi singruoge mamoko ma Jehova en achiel kuom joma nie singruogego, mae en singruok ma Yesu timo mana gi jolupne mowal. Kane Yesu owacho ni “kaka Wuora nosingona,” nyaka bed ni nowuoyo kuom singruok ma Jehova notimo kode mondo obed “jadolo nyaka chieng’, e kido mar Melkizedek.”—Hib. 5:5, 6.
16 Joote Yesu 11 ema ‘nosiko kode e temruok mage.’ Singruok mar Pinyruoth nomiyo gibedo gadiera ni ne gidhi bedo gi Yesu e polo ka gin ruodhi kendo jodolo. Kata kamano, ok en mana joote apar gachielgo kende ema ne dhi bedo gi thuolono. Yesu nofwenyore ne jaote Johana e fweny moro kowachone niya: “Ng’at molocho anamiye bet koda e kom duong’na, kaka an bende nalocho, kendo abet kod Wuora e kom duong’ne.” (Fwe. 3:21) Omiyo, singruok mar Pinyruoth otim gi Jokristo mowal ma kwan-gi en 144,000. (Fwe. 5:9, 10; 7:4) Ma e singruok ma miyogi thuolo mar locho gi Yesu e polo. Mano inyalo pim gi miaha mowuok e anyuola ma ji omewie kendo ma ikendo gi ruoth malocho ka mano miyo miahano thuolo mar locho kode. Mano e gimomiyo Muma luongo Jokristo mowal ni “miaha” mar Kristo, “nyako maler” ma osing ne Kristo mondo okend.—Fwe. 19:7, 8; 21:9; 2 Kor. 11:2.
AGOST 27–SEPTEMBA 2
MWANDU MA YUDORE E WACH NYASAYE | LUKA 23-24
“Ikri Weyo ne Ji Richogi”
“Ung’e Hera mar Kristo”
16 Yo machielo ma ne Yesu onyisogo e yo makare chuth hera mar Wuon mare, en ni ne ‘oikore weyo’ ne ji ‘richogi.’ (Zaburi 86:5) Mano ne onenore kata mana sama ne otho ka en e wi yadh sand. Ka koro Yesu tho tho malit kendo mar wich kuot ka ogur lwetene gi tiendene gi musmal, iparo ni nonyalo wuoyo e wi ang’o? Be dibed ni ne okwayo Jehova mondo okum joma ne nege? Mopogore gi mano, e i wechene mogik, Yesu nowacho niya: ‘Wuoro, wenegi; gikiya gima gitimo.’—Luka 23:34.
g-SW 2/08 11 ¶5-6
Be Nyasaye Nyalo Weyo ne Ji Richo Madongo?
Jehova ok ng’i mana richo ma ng’ato otimo kende, to ong’iyo nyaka paro ma ng’ato nigo kuom richono. (Isaiah 1:16-19) Kuom ranyisi, par ane joricho ariyo ma ne ogur e bath Yesu. Nenore maler ni giduto ne gitimo richo madongo nikech achiel kuomgi nowacho niya: “Wayudo gima owinjore gi gik ma ne watimo; to [Yesuni] ok notimo gimoro marach.” Weche ma jarichono nowacho nyiso ni nitie weche moko ma nong’eyo e wi Yesu. To nenore ni weche ma nong’eyogo e ma nomiyo obedo gi paro maber e wi Yesu. Mano e momiyo nokwayo Yesu niya: “Iparae e kinde midonjo e Pinyruodhi.” Kristo nodwoko kwayono nade? Nonyiso ng’atno kama: “Adier awachoni kawuononi, inibed koda e Paradiso.”—Luka 23:41-43.
Par ane: Weche ma Yesu nowacho mogik ka pok otho noriwo nyaka nyiso ng’wono ne ng’at ma noseyie ni notimo richo maduong’ ma nowinjore gi tho. Donge mano en gima jiwowa! Omiyo, wanyalo bedo gadier ni Yesu Kristo kod Jehova Wuon-gi biro kecho ji duto moloko chunygi gadier kata bed ni e kinde mokalo ne gisetimo richo madongo ma romo nade.—Jo-Rumi 4:7.
“Ung’e Hera mar Kristo”
17 Ranyisi machielo ma samoro nyalo mulo chunywa moloyo e wi kaka Yesu weyo ne ji kethogi en kaka ne otimo ne jaote Petro. Wang’eyo ni Petro nohero Yesu sidang’. Otieno mogik kae to Yesu tho chieng’ Nisan 14, Petro nonyiso Yesu kama: “Ruoth, aikora dhiyo kodi e od tuech, kata kar tho bende.” Kata kamano, seche manok bang’e, Petro ne okwedo Yesu didek kowacho ni ok ong’eyo Yesu! Muma nyisowa gima notimore kane Petro okwedo Yesu mar adek: “Ruoth nolokore, nong’iyo Petro.” Ka koro Petro winjo malit ahinya nikech ketho maduong’ ma ne otimo, “nowuok oko, moywak malit.” Kane Yesu otho bang’e e odiechieng’no, nyalo bedo ni Petro ne penjore niya, ‘Be Ruoth oweyona kethona adier?’—Luka 22:33, 61, 62.
18 Ne ok okawo kinde kapok Petro oyudo dwoko mar penjono. Yesu ne ochier Nisan 16 gokinyi, kendo nenore ni chieng’onogo ne odhi ir Petro. (Luka 24:34; 1 Jo Korintho 15:4-8) Ang’o momiyo Yesu ne odewo jaote ma ne okwede malich kamano? Yesu ne dwaro nyiso Petro ma koro ne oseloko chunye ni pod nohere kendo nogene. E wi mano, Yesu notimo gima omedore mondo ojiw Petro.
Nono Puonj Manie Wach Nyasaye
nwtsty weche mag timo nonro e Luk 23:31
e kinde ma yath pod numu, . . . ka yath oner: Nyaka bed ni Yesu ne wuoyo e wi oganda mar Jo-Yahudi. Ogandano ne chalo gi yath ma pod numu mana matin nikech Yesu ne ni e diergi kendo Jo-Yahudi moko noketo yie kuome. Kata kamano, nochiegni neg Yesu kendo Jo-Yahudi ma ne jolupne ne ochiegni wal gi roho maler mondo koro gibed e kind joma iluongo ni Israel mar roho. (Rum 2:28, 29; Gal 6:16) Ka mano osetimore, oganda mar Jo-Israel masie ne dhi chalo gi yath ma oner, tiende ni ne ok gidhi bedo gi winjruok moro amora gi Nyasaye.—Mat 21:43.
nwtsty picha
Musmal Mogur e Ofunj Tielo
Picha monyis e nwt en mar gimoro molos ma nyiso kaka ne iguro ofunj tiend ji gi musmal ma borne romo inji 4 gi nus. Gino ne oyud e higa mar 1968 ka ne ikunyo gik machon yo nyandwat mar Jerusalem, kendo nenore ni osebetie chakre e kinde loch Rumi. Okonyowa ng’eyo ni ne itiyo gi musmal e guro ji e yath. Musmal monyis kanyo nyalo chalo gi ma askeche Jo-Rumi notiyogo e guro Yesu Kristo e yath. Ne oyude e i sanduk moro ma nolos gi kidi ma ne oketie choke ng’ato bang’ ka nosetow. Mano nyiso ni joma ne iguro e yath bang’e ne inyalo yik.