Nonro mag Chenro mar Chokruok mar Ngimawa kod Tijwa
AGOST 3-9
MWANDU MA YUDORE E WACH NYASAYE | WUOK 13-14
“Chung’uru Motegno Mondo Une Kaka Jehova Biro Resou”
Musa Nonyiso Yie
Nyalo bet ni Musa ne ok ong’eyo ni Nyasaye ne chiegni pogo Nam Makwar mondo Jo-Israel oyud yo mar tony. Kata kamano, Musa ne ni gadier ni Nyasaye ne dhi timo gimoro mondo okony joge. Kendo Musa ne dwaro ni Jo-Israel wetene obed gadier ma kamano. Wasomo kama: “Musa nowacho ni ji, kik uluor, chunguru mos, une warruok mar Jehova, ma enotimnu tinende.” (Wuok 14:13) Be Musa ne otego yie mar Jo-Israel wetene? Ee, nimar Muma wuoyo, ok mana kuom Musa, to kuom Jo-Israel duto niya: ‘Kuom yie, ne ging’ado Nam Makwar kaka e lowo motwo.’(Jo Hibrania 11:29) Yie mar Musa ne okonye kaachiel gi ji duto ma ne opuonjore kuome.
Jehova Ng’won Kata Obedo ni En e Wuon Teko Duto
13 Som Wuok 14:19-22. Tem ane paro ni in bende ne in Ja-Israel e kindeno. Jolweny mag Farao ni ka bang’u, to Nam Makwar ni ka nyimu. Kae to Nyasaye timo gimoro makende. Bor polo ma ne tayou dok e tok ji kendo okelo ne Jo-Misri mudho mandiwa ma monogi nenou. Un to un gi ler mang’eny. Mapiyo nono ineno ka Musa rieyo lwete kochomo nam, kendo yamb ugwe mager baro nam, mi yo nwang’re e iye kanyo. Kae to ung’ado namno ka uchanoru maber kaachiel gi joodu, jambu, kod Jo-Israel weteni mamoko. Nitie gima chielo ma mako dhogi. Dier nam kama uwuothoe ok fwonyre, to be ok otimo baraf; kar mano, otwo maber ma wuothoe yot. Mano miyo kata mana joma wuotho mos manade kalo maber ma gichop loka machielo.
w09-SW 3/15 7 ¶2-3
Kik Wiyi Wil gi Jehova
Sama geche lweny mag Jo-Misri ne ok ring maber, Jo-Israel to ne oseng’ado modhi loka mar Nam Makwar. Musa ne orieyo lwete e Nam Makwar. Ka nosetimo kamano, Jehova nomiyo pi ma nogingore koni gi koni oduogo e wang’e. Pi mang’enyno noimo Farao kaachiel gi jolweny mage duto. Onge kata ng’ato achiel kuom-gi ma notony. Jo-Israel koro ne ni thuolo!—Wuo. 14:26-28; Za. 136:13-15.
Gik ma notimorego nomiyo joma nodak e alworano obedo gi luoro maduong’. (Wuo. 15:14-16) Higni piero ang’wen bang’e, Rahab ma nodak Jeriko nonyiso chwo ma Jo-Israel niya: “Kibaji osegoyowa, . . . nimar wasewinjo kaka Jehova noduononu pi Nam Makwar ka ne ua e piny Misri.” (Jos. 2:9, 10) Kata mana joma ok lam Jehova bende ne pod paro kaka noreso joge. Omiyo, wi Jo-Israel ne ok onego owil kata matin gi Jehova.
Nono Puonj Manie Wach Nyasaye
it-E-1 1117
Ndara, Yo
Chakre chon, nderni kaachiel gi yore mathoth moriwo nyaka mago ma ne itiyogo e kinde ohala, ne tudo taonde ma ne nitie Palestina. (Kwa 20:17-19; 21:21, 22; 22:5, 21-23; Jos 2:22; Bur 21:19; 1Sa 6:9, 12; 13:17, 18; som KING’S ROAD.) Ndara ma ne itiyogo ahinya ne en ma ne wuok Misri kadhi Palestina e taonde mag Gaza gi Ashkelon kendo ne ogondore kodhi yo Megido. Ndarano ne dhi nyaka Hazor, man yo nyandwat mar Nam Galili, kae to nodhi nyaka Damaski. Ndara ma ne kadho e piny Jo-Filistia e ma ne en yo machiegnie moloyo ma ng’ato ne nyalo ago Misri ma ochop e Piny ma Nosingi. Kata kamano, Jehova ne otayo Jo-Israel ma giluwo yo moro machielo mondo kik chunygi tho ka Jo-Filistia omonjogi.—Wuo 13:17.
it-1-E 782 ¶2-3
Wuok
Jo-Israel nong’ado Nam Makwar gi kanye?
Ka Jo-Israel nochopo Etham man “e bath thim,” Nyasaye nochiko Musa ni “gilokre mondo gidhi gigo kambi e nyim Pihahiroth . . . but nam.” Mano ne dhi miyo Farao opar ni “Jo-Israel rundore arunda e thim.” (Wuo 13:20; 14:1-3) Jotim nonro ma ne paro ni Jo-Israel notiyo gi yo mar el Haj wacho ni wach motigo e dho Hibrania ni “gilokre” tiende ng’eny. Onyalo bedo “baro” kata “lokruok,” kata kamano, tiende sie en dok chien kata tiyo gi yo machielo. Omiyo, giwacho ni ka Jo-Israel nochopo yo nyandwat mar Gulf of Suez, ne gilokore ma gilworo nyaka yo wuok chieng’ mar gode mag Jebel ʽAtaqah, ma gin gode man yo podho chieng’ mar Gulf of Suez. Oganda maduong’ kaka mar Jo-Israel ne ok nyal yudo yo maber ma ne ginyalo ringoe mapiyo ka ng’ato lawogi kowuok yo nyandwat, nikech ne gidhi chomo mana nam.
Mano bende e gima Jo-Yahudi ma nodak e kinde Jokristo mokwongo lero. (Som PIHAHIROTH.) Kata kamano, yo ma ilerogo wachno winjore gi kaka ilere e Muma kata obedo ni jotim nonro mang’eny to ok oyie gi parono. (Wuo 14:9-16) Nenore ni kama Jo-Israel ne ong’adogo Nam Makwar ne ni mabor gi kama giko Gulf of Suez chopoe (yo podho chieng’ mar Nam Makwar) ma Farao gi jolweny mage ne ok nyal lworo nyaka tung’ mondo giyud Jo-Israel loka komachielo.—Wuo 14:22, 23.
AGOST 10-16
MWANDU MA YUDORE E WACH NYASAYE | WUOK 15-16
“Pak Jehova gi Wer”
w95-SW 10/15 11 ¶11
Ang’o Momiyo Onego Imi Nyasaye Madier Luor Sani?
11 Jehova ne oketho jolweny mag Jo-Misri to mano nomiyo jotichne omiye duong’ kendo nyinge nolandore ahinya. (Joshua 2:9, 10; 4:23, 24) Ee, nyinge noyudo duong’ moloyo nyiseche mag miriambo mag Jo-Misri nikech nyisechego ne ok oresogi. Geno kuom nyiseche manono kod dhano nomiyo giyudo wich-kuot maduong’. (Zaburi 146:3) Kare mano e momiyo Jo-Israel nowero wende mag pako Nyasachgi kendo manyiso luor ma ne gimiye nikech ne oresogi!
w95-SW 10/15 11-12 ¶15-16
Ang’o Momiyo Onego Imi Nyasaye Madier Luor Sani?
15 Ka dine bed ni wan kor Musa, wan bende dine wawer niya: “A Jehova, be nitie nyasaye moro amora ma chalo kodi? Ere ng’a maler moloyi? In e Ng’at monego omi luor kendo opak gi wer, Ng’at ma timo honni miwuoro.” (Wuok 15:11) Chakre kindeno, ji osebedo ka wacho weche ma chalo gi mago. E buk mogik mar Muma, jaote Johana wuoyo kuom grup matin mar Jokristo mowal kowacho kama: “Ne giwero wend Musa misumba Nyasaye gi wend Nyarombo.” Wendno ne wacho nang’o? “A Jehova Nyasaye Manyalo Duto, tijeni dongo kendo beyo miwuoro. A Ruoth mochwere, yoreni nikare kendo gin adier. A Jehova, en ng’a ma ok nyal luori kendo miyo nyingi duong’, nikech in kendi e ma imakori chuth gi jogi?”—Fweny 15:2-4.
16 E kindegi bende, nitie jotich Nyasaye ma ogeno ahinya tije mag Jehova kaachiel gi buchene duto mong’ado. Adiera osemiyo ji mawuok e ogendni mopogore opogore obedo thuolo ka gibedo mopogore gi piny marachni nikech ging’eyo kendo gitiyo gi chike makare mag Nyasaye. Higa ka higa, nitie ji mathoth ma weyo bedo mag piny ka giriwo lwedo riwruok mar oganda Jehova. Machiegnini, ka Nyasaye osetieko dinde mag miriambo kod gik moko duto maricho, joge biro dak e piny manyien nyaka chieng’.
it-2-E 454 ¶1
Thum
Thoth Jo-Israel ne werga e grube grube. Grup achiel ne nyalo wer to machielo olo, kata ng’at achiel ne nyalo wer to jomamoko olo. E Muma, iluongo gima kamano ni ‘olo wer.’ (Wuo 15:21; 1Sa 18:6, 7) Kamano e kaka ondik moko kuom ndiko mag zaburi, kaka Zaburi 136. Yo ma ilerogo kaka grube ariyo mag jower ne wer e kinde Nehemia ka ne iwalo ohinga mar Jerusalem nyiso maler ni jower ne otiyo gi yorno sama ne giwer.—Neh 12:31, 38, 40-42; som SONG.
it-2-E 698
Janabi ma Dhako
Miriam e dhako mokwongo ma Muma wuoyo kuome kaka janabi ma dhako. Nenore ni Nyasaye ne omiye ote moko, samoro e yor wer. (Wuo 15:20, 21) Mano e momiyo Muma nyisowa ni Miriam kaachiel gi Harun ne openjo Musa niya: “Donge wan bende osewuoyo kodwa?” (Kwa 12:2) Jehova owuon kokalo kuom janabi Mika nowacho ni nooro “Musa, Harun, gi Miriam” mondo gitelne Jo-Israel ka giwuok Misri. (Mik 6:4) Kata obedo ni Nyasaye notiyo gi Miriam e yo ma kamano, winjruok ma ne Musa nigo gi Jehova ne tut ahinya moloyo mar Miriam. Ka ne ochako dwaro migepe mang’eny moloyo ma Nyasaye nomiye, Nyasaye ne okume.—Kwa 12:1-15.
Nono Puonj Manie Wach Nyasaye
w11-SW 9/1 14
Be Ing’eyo?
Ang’o momiyo Nyasaye ne omiyo Jo-Israel aluru e thim?
Ka ne Jo-Israel wuok Misri, Nyasaye nomiyogi ring aluru nyadiriyo.—Wuok 16:13; Kwan 11:31.
Aluru gin winyo matindo tindo ma borgi nyalo romo sentimita 18 (inj 7) kendo pekgi nyalo bedo gram 100. Ng’enygi yudore Asia ma yo imbo kod Europe. Nikech gin winy mohero dar, ndalo koyo gidhiga North Africa kod Arabia. Sama gidhi, gikaloga e dho wedhe mag Nam Mediterania kendo gikalo ma gichop e thim mar Sinai.
Kaluwore gi The New Westminster Dictionary of the Bible, aluru “fuyoga matek nikech odhi kama yamo tere; kata kamano, ka yamo oloko ma koro ok kuth kochomo kama gidhiye, giol ahinya kendo giduto ginyalo lwar piny ma ging’eng’.” Nyaka giyue kuom odiechieng’ achiel kata ariyo e ka ginyalo dhi nyime gi wuodhgi. Omiyo, jodwar ne nyalo makogi mayot. E higni mag 1900, Misri ne uso chiegni aluru milion adek higa ka higa mondo ji ochamgi.
Kinde ma Jo-Israel ne chamo aluru ne gin kinde ma koyo ok ne ng’ich ahinya. Kata obedo ni e kindeno aluru ne fuyo nyading’eny e alwora mar Sinai, Jehova e ma “notugo yamo mokelo aluru” e kambi mar Jo-Israel.—Kwan 11:31.
w06-SW 1/15 31
Penjo Moa Kuom Josombwa
Mapiyo bang’ ka ne Nyasaye osereso Jo-Israel ma giwuok Misri, ne gichako ng’ur e wi chiemo. Omiyo, Jehova nomiyogi manna. (Wuok 12:17, 18; 16:1-5) E kindeno, Musa nonyiso Harun niya: “Kaw agulu mondo iolie omer achiel mar manna kae to ikete e nyim Jehova mondo ukane ne tiengeu duto.” Imedo lernwa niya: “Harun noketo aguluno e nyim Sandug Chik [ma ne en sanduk makende mikanoe weche mogen ahinya] mana kaka Jehova nochiko Musa.” (Wuok 16:33, 34) Kata obedo ni Harun ne okawo manna moketo e agulu, ne nyaka orit mondo Musa olos Sandug Singruok nikech kanyo e ma ne idhi kanie manna-go kod kite ma nondikie Chik.
AGOST 17-23
MWANDU MA YUDORE E WACH NYASAYE | WUOK 17-18
“Chwo Mobolore Tiego Jomamoko Kendo Gimiyogi Migepe”
Musa Nonyiso Hera
Musa nohero Jo-Israel wetene. Jo-Israel nong’eyo ni Jehova tiyo gi Musa mondo otagi, omiyo ne gitero ne Musa chandruogegi. Wasomo niya: ‘Ji nochung’ ka gilworo Musa nyaka a okinyi nyaka odhiambo.’ (Wuok 18:13-16) Par ane kaka Musa ne jony kuom winjo odiechieng’ mangima chandruoge ma Jo-Israel ne kelone! Kata kamano, Musa ne mor konyo jogo nikech ne oherogi.
w03-SW 11/1 6 ¶1
Geno Jomamoko Miyo Wabedo Mamor
Magi ne gin chwo ma ne onyiso ni gin gi kido mabeyo ka pok ne omigi migepe migeno. Ne gisenyiso maler ni giluoro Nyasaye; ne gimiyo Jachuech luor mowinjore kendo ne ok gidwar timo gima nyalo chwanye. Ji duto ne nyalo neno ni chwogi ne temo matek mondo girit chike Nyasaye. Ne gisin gi mibadhi, to mano ne en gima nyiso ni ne ok ginyal tiyo marach gi teko ma ne gin-go. Ne ok ginyal timo gima ne nyalo miyo jomoko owe genogi, kaka timo gik ma ne kelonegi ber gin giwegi kata timo gima kelo ber ne joodgi gi osiepegi kende.
w02-SW 5/15 25 ¶6
Jomakare Itayo gi Timbe Matir
Musa bende ne en ng’at mobolore. Kinde ma tich nohewe, jaduong’ne miluongo ni Jethro nomiye paro moro maber. Nonyise ni oyier chwo moko mowinjore mondo okonye tich. Musa norwako paro ma ne omiyeno nikech en bende ne oneno ka tich ohewe gadier. (Wuok 18:17-26; Kwan 12:3) Ng’at mobolore ok tamrega miyo jomoko migepe kata ok oluor ni onyalo lalo migape ka opogo tich ne chwo mamoko mowinjore. (Kwan 11:16, 17, 26-29) Kar mano, ogombo mondo okonygi gimed timo dongruok e weche Nyasaye. (1 Timotheo 4:15) Donge mano bende e gima onego watim?
Nono Puonj Manie Wach Nyasaye
‘Kik Lueti Nyosre’
14 Harun kod Hur nosiro luet Musa aching’ ka ne gin e lweny. Kata kamano, wan to ok ochuno ni wasir luet jomoko aching’, to wanyalo mana manyo yore mag konyogi. Wanyalo konyo jomage? Jomoti, joma tuore, joma yudo akwede mawuok kuom joodgi, joma chunygi ool, kata joma wedegi kata osiepegi otho. Bende wanyalo jiwo rowere ma jomoko temo chuno mondo otim gik maricho kata mondo gimany ngima maber e pinyni kokalo kuom somo ma malo, pesa, kata tich. (1 The. 3:1-3; 5:11, 14) Many yore ma inyalo nyisogo ni idewo jomoko gadier ka in e Od Romo, e tij lendo, sama uchiemo kanyachiel, kata sama igoyo ne ng’ato simo.
it-1-E 406
Buge Manie Muma
Onge kiawa ni weche ma ne Musa ondiko ne owuok kuom Nyasaye kendo ne ginyiso kaka lamo madier onego obed. Musa ne ok oyiero owuon mondo obed jatend Jo-Israel nikech mokwongo ne otamore timo migawono. (Wuo 3:10, 11; 4:10-14) Nyasaye e ma ne otiego Musa kendo miye teko mar timo honni ma kata mana ajuoke mag Farao ne oyie ni Nyasaye e ma ne ooro Musa. (Wuo 4:1-9; 8:16-19) Omiyo, Musa ne ok oketore owuon mondo en e ma owuo e lo Jo-Israel. Kar mano, Musa ne oyie winjo kaka Nyasaye ne chike kendo Nyasaye notelone gi roho maler mondo owuo e wi ndiko moko manie Muma kae to ondikgi.—Wuo 17:14.
AGOST 24-30
MWANDU MA YUDORE E WACH NYASAYE | WUOK 19-20
“Kaka Chike Apar Konyi”
w89-SW 11/15 4 ¶12
Chike Apar Nyalo Konyi Nade?
Chike ang’wen mokwongo nyiso migawo ma wan-go e nyim Jehova. (Mokwongo) Nyasaye pod dwaro ni en kende e ma walame kendo watine. (Mathayo 4:10) (Mar Ariyo) Jotichne ok onego olam sanamu. (1 Johana 5:21) (Mar Adek) Onego wati gi nying Nyasaye e yo mowinjore kendo wamiye luor. (Johana 17:26; Jo-Rumi 10:13) (Mar Ang’wen) Onego wati gi ngimawa e timo dwach Nyasaye. To mano oriwo nyaka yueyo, kata bedo gi “yueyo mar sabato.”—Jo-Hibrania 4:9, 10.
w89-SW 11/15 4 ¶13-14
Chike Apar Nyalo Konyi Nade?
(Mar Abich) Chik ma wacho ni nyithindo onego omi jonyuolgi luor e ma miyo joot dak gi kuwe kendo kelo gueth mag Jehova. Mano kaka “chik mokwongo ma nigi singo” miyo wabedo gi geno! Chikno ok wach mana ni ‘weche biro dhinwa maber’ to omedo bende ni ‘wanadag e piny aming’a.’ (Jo-Efeso 6:1-3) Nikech koro wadak e “ndalo mag giko” mar piny marachni, winjo wach biro konyo jomatindo mondo gibed gi geno mar dak nyaka chieng’.—2 Timotheo 3:1; Johana 11:26.
Ka wahero jirendewa, ok wabi timonegi gik maricho kaka (Mar Auchiel) nek, (Mar Abiriyo) chode, (Mar Aboro) kwelo, kod (Mar Ochiko) hango wach. (1 Johana 3:10-12; Jo-Hibrania 13:4; Jo-Efeso 4:28; Mathayo 5:37; Ngeche 6:16-19) To nade gombo manie chunywa? Chik (Mar Apar) kwerowa ni kik wagomb gige jomoko kendo oparonwa ni gombo manie chunywa onego obed makare e wang’ Jehova.—Ngeche 21:2.
Nono Puonj Manie Wach Nyasaye
it-2-E 687 ¶1-2
Jadolo
Tij Dolo e Kind Jokristo. Jehova nosingo ni ka Jo-Israel ne omakore kode, ne gidhi bedone ‘oganda maler kendo ruodhi ma bende gin jodolo.’ (Wuo 19:6) Kata kamano, Harun gi nyikwaye ne onego odhi nyime gi tij dolo nyaka jadolo maduong’ ma ne okor wachne chopi. (Hib 8:4, 5) Mano ne dhi timore nyaka kinde ma singruok mar Chik ne dhi weyo tiyo kae to singruok manyien chako tiyo. (Hib 7:11-14; 8:6, 7, 13) Mokwongo kwongo, Jo-Israel kende e ma Jehova nomiyo thuolo mar bedo jodolo e bwo Pinyruodhe, kata kamano, ne oduog oyaw thuolono ne joma ok gin Jo-Yahudi.—Tic 10:34, 35; 15:14; Rum 10:21.
Jo-Yahudi matin e ma ne orwako Kristo, omiyo ne ok ginyal bedo oganda maler kendo jodolo mag pinyruoth madier. (Rum 11:7, 20) Kuom higni mang’eny, Nyasaye ne osesiemo Jo-Israel ma ne ok omakore kode. Kotiyo gi janabi Hosea nowacho niya: “Usedagi ng’eya, an bende ok abi yie ubedna jodolo; kendo nikech wiu osewil gi chik Nyasachu, an bende wiya biro wil gi nyithindu.” (Hos 4:6) Mano e momiyo Yesu ne onyiso jotelo mag Jo-Yahudi niya: “Ibiro mau Pinyruodh Nyasaye kae to imiyo oganda ma nyago olemo mag pinyruodhno.” (Mat 21:43) Nikech Yesu Kristo ne nie bwo Chik ka ne en e piny ka, ne ong’eyo ni tij dolo ma ne itimo gi anyuola mar Harun ne pod dhi nyime, to mano e momiyo nonyiso jodhoho ma nochango ni gidhi ir jodolo kendo gigol chiwo kaluwore gi chik.—Mat 8:4; Mar 1:44; Luk 17:14.
w04-SW 3/15 27 ¶1
Puonj Mayudore e Bug Wuok
20:5—Ang’o momiyo Jehova nokumo ‘nyithind ji nikech richo jonyuolgi’ nyaka e tienge maluwo? Ka ne ng’ato osebedo maduong’, ne ing’adone bura kaluwore gi timbene. Kata kamano, ka ne oganda Jo-Israel ochako lamo nyiseche manono, kum ma ne omigi ne omako nyaka tienge ma ne obiro bang’e. Kata mana Jo-Israel ma ne omakore gi Nyasaye ne yudo ka ok yotnegi luwo chike Nyasaye nikech joma ne olworogi ne ok omakore gi Nyasaye.
AGOST 31–SEPTEMBA 6
MWANDU MA YUDORE E WACH NYASAYE | WUOK 21-22
“Nyis ni Ineno Ngima Kaka Jehova Nene”
it-1-E 271
Goch
Ja-Hibrania ma ne nigi misumba ne oyiene goyo misumbaneno ka po ni misumbano wiye ne tek kata ka ne ong’anyone. Kata kamano, ka ne misumbano otho nikech gocho ma ne ogoyeno, ne nyaka kum jatendeno. Ka po ni misumbano ok notho bang’ ndalo achiel kata ariyo, mano ne nyiso ni jatendeno ne ok dwar nege. Ne en gi ratiro mar kumo misumbaneno nikech ne “ong’iewo misumbano gi pesane.” Onge ng’at ma ne nyalo gombo ketho mwandune owuon nikech en owuon e ma ne odhi wang’. Bende, ka misumbano ne otho bang’ ndalo achiel kata mokadho kanyo, ji ne ok nyal bedo gadier ka be goch ma ne ogoyego e ma okelo thone kata gimoro machielo. Omiyo, ne ok nyal kum jatend misumbano ka po ni misumbano pod ne ngima ndalo achiel kata ariyo bang’e.—Wuo 21:20, 21.
Be Ikawo Ngima ka Gima Duong’ Kaka Nyasaye Kawe?
16 Kata ngima nyathi ma pok onyuol en gima duong’ e wang’ Nyasaye. E Israel machon, ka ng’ato ne ohinyo dhako mapek mi dhakono kata nyathine otho nikech mano, Nyasaye ne neno ng’at mokethono kaka jal moneko kendo ne dwarore ni ochul “ngima kar ngima.” (Wuok 21:22, 23) Kuom mano, par ane kaka Jehova winjo koneno kigolo ich mag nyithindo mang’eny ahinya ma pok onyuol, migolo nikech ng’ato dwaro mor mare owuon kod bedo thuolo e timo timbe anjawo.
Jehova Dwaro ni Warit Ngimawa Maber
Chikno bende ne itiyogo kuom wuon jamni mohinyo ng’ato. Kapo ni dhiang’ ne ochwowo ng’ato mi onege, ne dwarore ni wuon-go oneg dheno mondo orit ngima jomoko. Nikech ne ok onyal chamo ring dheno kata use ne jomoko, nego dheno ne dhi miyo olal mwandune. To bang’ ka dhiang’ osehinyo ng’ato to wuon dheno ok otweye mogeng’e kik ohiny ng’ato kendo, ang’o ma ne dhi timore? Kapo ni bang’e dheno onego ng’ato, dheno kaachiel gi wuon-go, ne onego onegi. Chikno ne miyo ng’ato opar matut kapo ni ne en gi tim mar weyo aweya jamni mage.—Wuok 21:28, 29
Nono Puonj Manie Wach Nyasaye
Ang’o Momiyo Onego Ichiwri ne Jehova?
4 Chiwruok mar Jokristo en gima onego okaw gi pek. Ok en gima iwacho awacha. To ere kaka chiwruok konyowa? E yor ranyisi, we wanon ane kaka chiwruok ma dhano timo e kindgi konyo. Ranyisi achiel en mako osiep. Mondo omi ibed gi osiep, nyaka iyie kawo ting’ ma bedo e osiep kelo. Mano dwaro chiwruok—kiwinjo ka in-gi chuny mar rito osiepno. Osiep mong’ere ahinya ma ilero ei Muma en mar Daudi kod Jonathan. Ne gitimo singruok mar osiep e kindgi. (Som 1 Samuel 17:57; 18:1, 3.) Kata obedo ni osiep ma ji chiwore e okang’ ma kamano ok yot neno, osiep mang’eny dhi maber sama ng’ato ka ng’ato ochiwore gi chunye duto ne nyawadgi.—Nge. 17:17; 18:24.
5 Chik ma ne Nyasaye omiyo Jo-Israel konyowa ng’eyo kaka chiwruok ne konyo. Kane misumba dwaro siko gi ruodhe modak godo maber, ne onyalo timo singruok masiko e kinde gi ruodheno. Chik wacho kama: “To ka misumbano owacho ratiro, An ahero ruodha, gi chiega, kod nyithinda; ok nawuogi mar bedo thuolo: eka ruodheno nokele e nyim Nyasaye, nokele e dhoot kata e sis dhoot; kendo ruodhe notuch ite gi riwi; to enotine nyaka chieng’.”—Wuok 21:5, 6.
it-1-E 1143
Tung’
Weche ma yudore e Wuok 21:14 nyiso ni kata mana jodolo bende ne inego ka ne gineko, kendo ni mako tunge kendo mar misango ne ok nyal reso ng’ato ang’ata moneko goyiem.—Pim gi 1Ru 2:28-34.