Penjo Moa Kuom Josombwa

2 Jo-Thesalonika 3:14 wacho ni nitie joma onego watang’-go. Be jodongo e monego onyis kanyakla ni gitang’ gi ng’ato, koso mano okang’ ma ng’ato ka ng’ato owuon e monego okaw?

Jaote Paulo nondiko ne Jokristo ma ne ni Thesalonika niya: “Ka nitie ng’at ma ok luw weche ma wasechikou e baruani, tang’uru ahinya gi ng’at ma kamano.” (2 The. 3:14) Chon, jodong-kanyakla e ma ne kawoga okang’ mar nyiso kanyakla mondo otang’ gi ng’ato. Ka nitie Jakristo moro ma ne tamorega luwo puonj mag Muma kata bang’ kosemiye siem nyading’eny, jodongo ne nyaloga golo twak ma konyo kanyakla ng’eyo ni nitie ng’at monego gitang’-go. Bang’ mano, kanyakla ne dhi weyo riwore gi ng’atno e weche mamoko, mak mana ka obiro e chokruok kata e tij lendo.

Kata kamano, dwarore ni otim lokruok e wi wachno. Paulo nochiwono paro ma ng’ato ka ng’ato ma Jakristo e monego okawie okang’ ka luwore gi chal mantie. Omiyo, onge tiende mondo jodongo ogol twak ka ginyiso kanyakla mondo gitang’ gi ng’ato. Ang’o momiyo otim lokruogno? Wanon ane weche molworo ndiko ma Paulo nowuoyeno.

Paulo nofwenyo ni nitie joma ne “wuotho e yo ma ok owinjore” e kanyakla mar Thesalonika. Nosemigi siem nyading’eny, kata kamano, ne gitamore winjo siem. E limbene motelo, noyudo osenyisogi kama: “Ka ng’ato ok dwar tiyo, ng’atno ok onego ochiem.” Kata kamano, nitie joma ne pod otamore tiyo mondo giyud kaka de gikonyre kata obedo ni ne gin gi nyalo mar timo kamano. Bende, joma kamago ne donjorega e weche jomamoko. En okang’ mane ma Jokristo nonego okaw ka joma kamago ne ni e kindgi?—2 The. 3:6, 10-12.

Paulo nowacho kama: “Tang’uru ahinya gi ng’at ma kamano.” E dho Grik, wach molok kae ni tang’, nyiso fwenyo ng’at ma ok owinjore, kendo tang’ kode mondo timbege kik mieni, kata ketone alama. Paulo nochiwo parono ne kanyakla mangima to ok mana ne jodong-kanyakla kende. (2 The. 1:1; 3:6) Omiyo, ka Jakristo moro ofwenyo ni nitie ng’at ma wuotho e yo ma ok owinjore, en e monego okaw okang’ mar ‘weyo riwore’ gi ng’at ma kamano.

Be mano nyiso ni nonego one ng’at ma kamano kaka ng’at mogol e kanyakla? Ok en kamano nikech Paulo nomedo kama: “Udhi nyime rieye kaka owadwa.” Omiyo, Jokristo pod ne nyalo riwore gi ng’at ma kamano e tij lendo kata e chokruoge, kata kamano, ne ginyalo yiero weyo ma ok giriwore kode e weche ma ok otudore gi lamo kuom ranyisi e budho moro. Nikech ang’o? Paulo nowacho kama: “Mondo oyud wich-kuot.” Ka ne gitang’ gi ng’at ma kamano, mano ne nyalo miyo oyud wich-kuot kendo ne nyalo chwale mondo olok yorene.—2 The. 3:14, 15.

Ere kaka Jokristo ma kindewagi nyalo tiyo gi puonjno? Mokwongo, mana kaka Paulo nolero, dwarore ni wanon mondo wabed gadier ni timbe mag ng’atno gin timbe ma “ok owinjore.” Paulo ne ok wuo e wi weche ma ng’ato e ma nigi ratiro mar timoe yiero ka luwore gi chunye motieg gi Muma. Bende, ok nowuo kuom joma ochwanyowa. Paulo ne wuoyo e wi joma noyiero timo gik ma ok owinjore goyiem, kata bang’ ka osemigi siem nyading’eny.

E kindewagi bende, ka wafwenyo Jakristo ma nyiso chuny ma kamano,a wan e ma wabiro yiero ka be ok wabi riwore kode e weche ma ok otudore gi lamo, kuom ranyisi, bedo kode e budho moro. Nikech mano en yierowa wawegi, ok wabi nyiso jomamoko wachno mopogore gi joodwa ma wadakgo. Kata kamano, pod wanyalo dhi nyime riwore kode e chokruok kata e tij lendo. Ka oloko yorene, wanyalo kete thuolo kendo, kendo riwore kode e weche mamoko bende.