Tem Fwenyo Gik Manyien Sama Ipuonjori

Sama waikore timo puonjruok, wanyalo penjore kama: ‘Gin ang’o ma ageno puonjora?’ Kata kamano, onego wabed motang’ mondo kik gik ma wageno puonjore odin pachwa ma monwa fwenyo puonj moro manyien ma Jehova dwaro ni wang’e. Ere kaka wanyalo fwenyo gik manyien sama wapuonjore?

Kwa Nyasaye mondo omiyi rieko. Kwa Jehova mondo okonyi fwenyo gima odwaro ni ipuonjri gie sechego. (Jak. 1:5) Kik imakri mana gi puonj miseng’eyo.—Nge. 3:5, 6.

Yie mondo teko ma Muma nigo oti e ngimani. “Wach Nyasaye ngima.” (Hib. 4:12) “Wach Nyasaye” ngima kendo onyalo loko pachwa kod timbewa sa asaya ma wasome, to mana ka wasome ka wan gi paro mar puonjore gimoro manyien.

Cham chiemb chuny duto ma Jehova oketo e mesane. Sama wachamo chiemb chuny ma Jehova omiyowa, wachalo joma nie “nyasi mopong’ gi chiemo mamit.” (Isa. 25:6) Kik iyier chamo “chiemo” mineno ni mitni, to mamoko modong’ to iweyo. Kichamo kit chiemo duto ma Jehova miyowa, ibiro yudo ber mathoth kendo ibiro bedo mamor.