Be Muma Oyie gi Wach Bedo Jadoho?

Dwoko ma Muma Chiwo

Kuom kinde moko, Nyasaye noyie ne joma chwo mondo obed gi mon mang’eny. (Chakruok 4:19; 16:1-4; 29:18-29) Kata kamano, Nyasaye ok nochako tim mar bedo gi mon mang’eny. Nochueyo ne Adam dhako achiel kende.

Nyasaye nomiyo Yesu thuolo mar nyiso dwaro ma ne en-go nyaka a chakruok ni dichwo obed gi dhako achiel kende. (Johana 8:28) Kane openj Yesu penjo moro e wi kend nowacho kama: “Ng’at ma nochueyogi a chakruok, nochueyogi dichwo gi dhako mi nowacho niya: ‘Nikech mano, dichwo nowe wuon mare gi min mare, mi nopadre gi chiege, kendo ji ariyogo nobed ringruok achiel.’”—Mathayo 19:4, 5.

Achiel kuom jopuonjre Yesu nowacho kama kitaye gi roho maler: “Ber mondo dichwo ka dichwo obed gi chiege owuon kendo dhako ka dhako obed gi chwore owuon.” (1 Jo-Korintho 7:2) Muma bende wacho ni dichwo moro amora ma Jakristo momi migepe e kanyakla onego obed “chwor dhako achiel.”—1 Timotheo 3:2, 12.