PENJO MA ROWERE OHERO PENJORE
Ere Kaka Muma Nyalo Konya?—Kare mar 2: Ket Somo Muma Obed Mamit
Rawera moro miluongo ni Will wacho kama: “Somo Muma nyaloga bedo ma ok mit, ka ok ing’eyo yo maber mar some.”
Be diher ng’eyo gima inyalo timo mondo somo Muma obed mamitni? Sulani biro konyi.
Tem ketori e chal mar joma iwuoyo kuomgi e Muma
Sama isomo, tem paro kaka gik moko ne chal. Inyalo timo kama:
Yier sula moro e Muma ma diher somo. Inyalo yiero somo gimoro ma notimore kata sula moro e buge Injili, kata inyalo yiero mondo isom achiel kuom weche moket e somo Muma e yor drama ma yudore e jw.org.
Som sulano. Inyalo some kendi, kata inyalo some matek kanyachiel gi osiepeni kata joodu. Ng’ato achiel nyalo somo weche ma lero gik ma timore e sulano to jomamoko nyalo somo kuonde ma ji mopogore opogore wuoyoe.
Tem ane tiyo gi achiel kuom paro ma luwogi kata mamoko:
Gor pichni ma lero gik ma timore e sulano. Kata inyalo goro pichni mang’eny mopang e yo maber ma nyiso kaka gik moko notimore maluwore luwore. Inyalo ndiko weche moko matin e picha ka picha mondo ilergo gima timore e pichnigo.
Gor gik mopogore opogore. Kuom ranyisi, sama isomo sula ma wuoyo e wi ng’at ma ne nigi yie motegno, tem manyo tudruok ma nitie e kind kido ma ng’atno ne nigo kod gik ma notimo momiyo noyudo gueth.
Lok weche ma isomogo mondo gibed ka gima ilandogi. Inyalo temo ka gima in e ma ilendo kichiwo ripot e yore mopogore opogore. Bende, inyalo time ka gima iwuoyo gi joma nie sulano kod joneno ka ipenjogi penjo moko.
Ka achiel kuom joma nie sulano notimo yiero moro marach, tem paro kaka weche dine obedo ka dine otimo yiero maber. Kuom ranyisi, par ane kaka Petro ne okwedo Yesu. (Mariko 14:66-72) Petro dine otimo ang’o mondo kik okwed Yesu?
Ka po ni in gi lony moromo, inyalo yiero mar ndiko siganano kitiyo gi weche misomo e sulano. Ndik nyaka puonj ma ng’ato nyalo yudo e sulano.—Jo-Rumi 15:4.
Inyalo somo Muma e yo machalo ka gima ineno gi wang’i gik ma timore!
Tim nonro!
Sama inono e yo matut gik ma sula moro wuoyoe, inyalo yudo puonj moko mabeyo. E wi mano, seche moko weche moko manie Muma bedoga gi puonj maduong’.
Kuom ranyisi, pim ane Mathayo 28:7 kod Mariko 16:7.
Ang’o momiyo Mariko nowacho ni Yesu ne dhi fwenyore ne jopuonjrene “kod Petro”?
Gima nyalo konyi: Mariko ne ok oneno achiel kachiel gik ma notimorego; nenore ni Petro e ma nonyise wechego.
Puonj mopondo: Ang’o momiyo wanyalo wacho ni Petro ne owinjo maber ka ne onyise ni Yesu ne dwaro romo kode? (Mariko 14:66-72) Ere kaka Yesu nonyiso gadier ni ne en osiep Petro? Ere kaka inyalo luwo ranyisi mar Yesu mondo ibed osiep madier ne jomoko?
Somo Muma bedo mamit sama itemo mondo iketri e chal mar sula misomo kendo itimo nonro!