LIT MA THO KELO

“An gi Sophiaa ne wasebedo e kend kuom higni mokalo 39 ka ne tuo moro ogoyo Sophia motho. Osiepega nokonya ahinya, kendo natemo matek mondo abed modich. Kata kamano, kuom higa mangima nawinjoga awinja ka gima piny ochama. ne an gi lit ahinya e chunya kod parruok mang’eny. Kata obedo ni nyaka chop sani higni adek osekalo, kuyo kod lit mang’eny pod loyaga kinde ka kinde.”​—Kostas.

Be isegalalo watni kata osiepni moro e tho? Ka en kamano, nyalo bedo ni in bende inyagori gi kuyo mana kaka Kostas. Achiel kuom gik madongo ma nyalo miyo ng’ato obed gi kuyo kod parruok mang’eny, en sama watne kata osiepne moro ma nohero ahinya otho. Josomo molony e weche mag kuyo oyie gi wachno. Sula moro ma nogo e gaset miluongo ni The American Journal of Psychiatry nowacho niya: “Tho weyoga bugo moro maduong’ ma ok nyal pong’, kendo oweyoga ng’ato gi lit mang’eny ahinya.” Ng’at ma nigi lit kamano e chunye nyalo penjore niya: ‘Abiro bedo gi lit ma kama nyaka karang’o? Be abiro bedo mamor kendo? Ang’o ma nyalo konya mondo anyagra maber gi kuyo ma an-go?’

Dwoko mag penjogo iwuoyoe e gasedni. Sula ma luwo biro wuoyo kuom pek minyalo romogo ka po ni watni kata osiepni moro nyocha otho. Sula mamoko bende biro nyisi gik minyalo timo mondo ilo kuyo kod lit minyalo bedogo.

Wageno ni sula ma luwogi biro hoyo ng’ato ang’ata ma sani okuyo nikech olalo watne kata osiepne moro e tho, kendo okenge michiwo e sulago biro konye nyagore maber.