PEK MINYALO ROMOGO SAMA WATNI KATA OSIEPNI MORO OTHO

Kata obedo ni moko kuom joma olony e weche mag kuyo wachoga ni joma osiepegi kata watgi moro otho romoga gi weche moluwore oluwore, adiera en ni ng’ato ka ng’ato niga gi yo monyisogo lit ma en-go. Bedo ni ji nyisoga kuyo ma gin-go e yore mopogore opogore, be mano nyiso ni nitie joma ok winjga malit ahinya, kata ma temoga pando kaka giwinjo e chunygi sama osiepgi kata watgi moro otho? Ok ochuno ni obed kamano. Kata obedo ni ywak kod kuyo nyalo konyo ng’ato mondo onyagre gi lit ma tho kelo, onge yo moro sie ma ng’ato onego onyisgo kuyo ma en-go. Lit ma ng’ato nyalo bedogo luwore gi kaka nopon, kite, gik mosetimore e ngimane, kod gima ne onego ng’at mothono.

WECHE BIRO BEDO MARACH E OKANG’ MAROMO NADE?

Joma osiepgi kata watgi moro otho, ok ong’eyoga gik ma gibiro romogo sama masirano oyudogi. Kata kamano, nitie pek moko ma thoth ji romogago sama watgi kata osiepgi moro otho. Ne ane moko kuomgi:

Bedo gi chuny malit ahinya. Ng’ato nyaloga ywak sa ka sa, gombo romo gi ng’at mothono, kendo chunye nyaloga nyosore kinde ka kinde. Sama ng’ato oparo kata oleko watne moro kata osiepne moro mosetho, kinde mang’eny mano medonega lit. Mokwongo okwongo, ng’ato bwokga kendo tek yiega ni gima kamano oyude. Tiina pod paro kaka weche ne chalo ka jaode miluongo ni Timo notho apoya. Owacho kama: “Mokwongo, wachno nobwoga ahinya mi pacha olal. Ywak notama. Nawinjo marach ma kata yueyo ne ok yot. Ne tekna yie ni gima kamano otimore!”

Keto ketho kuomi, bedo gi luoro, kod mirima. Ivan wacho kama: “Kinde moko bang’ ka Eric wuodwa ma ne jahigni 24 osetho, an gi jaoda Yolanda ne wan gi kuyo mang’eny! Wachno nokawowa gi wuoro nikech ne pok wabedoga gi kuyo kaka ma ne wan-go e kindeno. Ne waketo ketho kuomwa. Ne wachako paro ni samoro nitie gima ne ok watimo ma ne nyalo reso wuodwa.” Alejandro ma bende chiege notho bang’ tuore kuom kinde malach, noketo ketho kuome. Owacho kama: “Mokwongo, naparo ni Nyasaye noyie mondo wach malitno oyuda nikech ne an ng’at marach. Kae to chunya nochako chanda nikech ne chalo ka gima naketo ketho kuom Nyasaye.” Kostas ma ne wasewuoye e sula mokalo, wacho kama: “Nitie kinde ma najabedoga gi mirima ahinya gi Sophia nikech notho. Kata kamano, wachno nochako chando chunya nikech, kuom adier Sophia ne ok dwar tho.”

Bedo gi parruok mang’eny. Nitie sama ng’ato nyalo chako paro gik ma samoro ok gin adier. Kuom ranyisi, ng’at ma watne kata osiepne otho nyalo wacho ni owinjo dwond ng’atno, onene, kata owuoyo kode. Kata, nyalo bedone matek keto pache kuom gima otimo. Kata, samoro onyalo yudo ka tekne paro gik moko. Tiina wacho kama: “Nitie sama nanyaloga goyo mbaka gi ng’ato, to apo mana ka pacha ni kumachielo! Thothne naparoga mana gik ma notimore ka ne pok Timo otho. Bedo ni ne ok anyal keto pacha kuom gima natimo, mano ne chando chunya ahinya.”

Gombo bedo kar kendi. Ng’at molalo watne kata osiepne moro e tho, nyalo winjo ka oluor sama en e gi jomamoko. Kostas wacho kama: “Ka ne an gi jomamoko manie kend, najawinjoga ka gima an mana kenda. Bende, nawinjoga kamano kata sama ne an gi joma pok odonjo e kend.” Yolanda ma en jaod Ivan wacho kama: “Ne ok adwarga goyo mbaka gi joma ne wuoyo e wi chandruoge machal gi ma ne wakaloe! Bende, ne nitie joma ma ne nyisowaga kaka nyithindgi ne dhi maber. Namorga gi joma kamago, kata kamano, ne ok yotnaga kinde duto chikonegi ita. An gi jaoda, ne wang’eyo ni ngimawa to nyaka sud asuda nyime, en mana ni ne ok wang’eyo ni ne dwarore ni wabed gi kido mar horruok mondo wanyagre maber.”

Bedo matuo. Thoth joma wedegi kata osiepegi otho, chiemo tamogiga nikech dhoggi bedoga marach, ginyalo dhero, kendo ok ginindga maber. Aaron paro kaka weche ne chalo higa achiel bang’ ka ne wuon-gi osetho. Owacho kama: “Ne ok anindga maber. Nachiewoga otieno kotieno e sa machal ka naparo wuonwa.”

Alejandro pod paro kaka nojawinjoga. Owacho kama: “Kinde ka kinde, najadhiga ir laktar, kendo bang’ ka nosepima, laktar ne nyisaga ni an mana kare. Nafwenyo ni kuyo ma ne an-go e ma ne miyo awinjo ka gima atuo.” Mosmos, Alejandro nochako winjo maber. Alejandro notimo maber ahinya dhi neno laktar. Kuyo nyalo miyo teko ma del nigo mar kedo gi tuoche odog piny, onyalo miyo tuo ma ng’ato nigo omedre, kata onyalo kelo tuo moro machielo e del.

Bedo gi pek e timo tije moko mochuno. Ivan wacho kama: “Bang’ tho Eric, nitie jomamoko ma ne dwarore ni wanyis wachno mopogore gi wedewa kod osiepewa. Jogo noriwo jal ma nondiko Eric tich, kod jal ma Eric nokodesa ode. Nitie fom mamoko ma bende ka luwore gi chik, ne dwarore ni wapong’. Kae to ne dwarore bende ni wanon gige Eric duto. Ne dwarore ni watim gigo duto, kata obedo ni pachwa nool kendo ne wawinjo malit ahinya e chunywa.”

Jomoko yudoga ka teknegi timo gik ma ng’at ma othono ne jatimoga. Mano e gima notimore ne Tiina. Owacho kama: “Timo jaoda e ma ne dhiga e bank, kendo notimoga nyaka gik mamoko. Koro, an e ma ne nyaka atim gigo, kendo mano nomedona parruok. Napenjoraga niya, ‘Be anyalo timo gigo duto e yo makare adier?’”

Pek ma wasewuoyego nyalo miyo kuyo onenre ka gima rach ahinya, nikech omayoga ng’ato teko, kendo okeloga lit mang’eny. Sama ng’at mwahero otho, wanyalo winjo malit ahinya, kata kamano, ng’eyo pek ma wanyalo romogo nyalo konyowa nyagore maber gi litno. Par bende ni ng’ato ka ng’ato ok bi romo gi pek ma wawuoyego duto. E wi mano, lit ma ng’ato bedogago en gima pile. Ng’eyo wachno nyalo hoyo chuny ng’at ma watne kata osiepne otho.

BE ANYALO BEDO MAMOR KENDO?

Pek minyalo romogo: Lit ma ng’ato bedogo bang’ osiepne kata watne moro tho ok bi siko nyaka chieng’, to obiro lal mosmos. Mano ok nyis ni weche biro “dok e wang’e chuth,” kata ni wi ng’atno biro wil gi ng’ate mothono chuth. Kata kamano, kuyo ma ng’ato nigo dokga piny mosmos. Kuyo nyalo tugore sama ng’ato oparo wach moro, kata sama otimo gimoro ma ne gijotimo gi ng’at mothono. Kata kamano, e gikone, thoth ji nyagorega maber mi gidog e ngimagi ma pile. Mano nyalore to ahinya-ahinya, ka po ni wede kod osiepe osiro ng’atno, kendo ka en owuon okawo okenge ma dwarore.

Kuyo nyalo kawo kinde maromo nade? Nitie joma nyalo kawo dweche moko ka pod ginyagore gi kuyo. Thoth ji to nyalo kawo higa achiel kata higni ariyo ka pok gidok e ngimagi ma pile. Jomamoko to nyalo dwarore ni omi kinde malach.a Alejandro wacho kama: “Higni adek nokalo ka pod nakuyo akuya.”

Hori mos. Kik itim gik mang’eny dichiel, kendo ng’e ni lit ma in-go ok bi siko. Kuom mano, be nitie gik minyalo timo sani mondo idwok lit ma in-go chien, kata ma nyalo konyi mondo kik ibed gi kuyo ahinya kuom kinde malach?