Jehova Chiwo Chike Mage

WECHE madirom ariyo bang’ wuok Misri, Jo-Israel chopo e Got Sinai ma bende iluongo ni Horeb. Mani e kama Jehova ne owuoyoe kod Musa e bungu ma liel. Ji dak kanyo kuom kinde manok.

Seche ma ji rito e tie got, Musa dhi e wi got. Malo e wi got kuno, Jehova nyiso Musa ni odwaro mondo Jo-Israel owinj dwonde, kendo gibedne oganda moyiedhi. Musa kaduogo piny, onyiso Jo-Israel gima Jehova owacho. Ji wacho ni gibiro timo kaka Jehova dwaro, nikech gidwaro bedo joge.

Koro Jehova timo gima iwuoro. Omiyo iro wuok e wi got, kendo polo mor matek. Kendo owuoyo gi ji ni: ‘An e Jehova Nyasachu ma ne ogolou e piny Misri.’ Kendo ogolo chik ni: ‘Kik ulam nyiseche moko mak mana an.’

Nyasaye miyo Jo-Israel chike mamoko ochiko. Luoro omako ji ahinya. Ginyiso Musa ni: ‘In ema mondo iwach kodwa nikech waluor ni ka Nyasaye oloso kodwa to wanyalo tho.’

Bang’e Jehova nyiso Musa niya: ‘Bi ira malo e got. Abiro miyi kite ariyo mopadore kama andikoe chikena ma adwaro mondo ji orit.’ Kuom mano, Musa kendo dhi e wi got. Obedo kuno odiechieng’ gotieno kuom ndalo 40.

Nyasaye miyo ogandane chike mang’eny. Musa ndikogi piny. Nyasaye kendo miyo Musa kite ariyo mopadore kande. Nyasaye owuon ondiko e kitegi chike 10 ma ne owacho ni ji duto. Iluongogi ni Chike Apar.

Chike Apar-go gin chike madongo ahinya. Kata kamano, chike Nyasaye mamoko ma omi Jo-Israel, bende beyo. Achiel kuomgi en ni: ‘Nyaka iher Jehova Nyasachi gi chunyi duto, gi pachi duto kendo gi tekoni duto.’ To moro en ma: ‘Nyaka iher wadu kaka iherori iwuon.’ Yesu Kristo wuod Nyasaye ne owacho ni chike ariyo madongo-gi, ema ne Jehova omiyo ogandane ma Jo-Israel. Bang’e wabiro puonjore gik mang’eny kuom Wuod Nyasaye koda gi puonj mage.