Nyaroya Molos gi Dhahabu

AYE! Koro ji timo ang’oni? Gilamo nyaroya! Gitimo kama nang’o?

Ka ji neno ni Musa odeko ahinya e wi got, giwacho ni: ‘Wakiya gima otimore ni Musa. Kuom mano, we walosuru nyasaye mondo otelnwa ka golowa e pinyni.’

Harun owadgi Musa ne owachonigi niya: ‘En kamano. Koro, goluru dhahabu duto ma un-go mondo ukelgi ira.’ Ka ji osetimo kamano, Harun lenyo dhahabugo, kendo ochweyo nyaroya. Ji koro wacho ni: ‘Mani e Nyasachwa ma ne ogolowa Misri!’ Bang’e Jo-Israel timo nyasi maduong’, kendo gilamo nyaroya molos gi dhahabu.

Jehova ka neno mano, mirimbe bedo mager. Kuom mano, owacho ni Musa niya: ‘Lor piyo mondo idhiyo. Ji timo timbe maricho ahinya. Wigi owil kod chikena, kendo gilamo nyaroya molos gi dhahabu.’

Musa lor piyo koa e got. To ka ochopo machiegni, mano e gima oneno. Ji wer kendo miel ka gilworo nyaroya molos gi dhahabu! Mirima omako Musa. Owito piny kite ariyo mopadre mondikie chike, kendo gibarore matindo tindo. Bang’e, okawo nyaroyano molos gi dhahabu, kendo olenye. Gikone, orege ka mogo.

Ji otimo gima rach ahinya. Koro Musa nyiso chwo moko mondo okaw ligangla maggi. Musa wacho niya: ‘Ji maricho ma ne olamo nyaroya molos gi dhahabu nyaka tho.’ Kuom mano, jogi nego ji 3,000! Donge mani nyisowa ni onego wabed motang’ mondo kik walam nyiseche manono to mak mana Jehova kende?