Jo-Gibeon ma ne Riek

OGENDINI mang’eny mag Kanaan koro ikore mar kedo gi Jo-Israel. Giparo ni ginyalo loyogi. Kata kamano, jo manie dala man machiegni mar Gibeon ok par kamano. Giyie ni Nyasaye konyo Jo-Israel, kendo ok gidwar kedo gi Nyasaye. Be ing’eyo gima Jo-Gibeon timo?

Ging’ado paro ni, gibiro timore ka joma odak mabor ahinya. Kuom mano, moko kuomgi rwako lewni moti kod wuoche morumo. Gikawo ogunde moti to giyieyo e pundegi, kendo gikawo makate mosebudho motwo. Bang’e gidhi ir Joshua, kendo giwachone ni: ‘Waa e piny mabor ahinya, nikech ne wawinjo humb Nyasachu, Jehova. Ne wawinjo gik moko duto ma ne otimonu e piny Misri. Kuom mano, jotendwa ne onyisowa ni waikre gi chiemo mar dhi e wuoth mondo wabi wanyisu ni: ‘Wayie bedo wasumbini magu. Kuom mano, yie watim kodu winjruok mar kuwe. Unyalo neno kaka lepwagi oti nikech wuoth mabor, kendo makatiwa osebudho kendo otwo.’

Joshua gi jotelo mamoko yie gi wach Jo-Gibeon. Kuom mano, gisingore ni ok gibi kedo kodgi. Kata kamano, ndalo adek bang’e, gifwenyo ni Jo-Gibeon kara odak mana e gweng’ machiegni.

‘Ang’o momiyo ne unyisowa ni ua e piny mabor ahinya?’ Joshua penjogi.

Jo-Gibeon dwoko ni: ‘Ne watimo kamano nikech nonyiswa ni Jehova Nyasachu ne osingo ni Musa ni enomiu pinyni duto mar Kanaan. Kuom mano, ne waluor ni ne udhi negowa.’ Kata kamano, Jo-Israel rito singruok margi, kendo ok gineg Jo-Gibeon. Kar timo mano, gilokogi wasumbinigi.

Ruodh Jerusalem osin nikech Jo-Gibeon otimo singruok mar kuwe gi Jo-Israel. Kuom mano, onyiso ruodhi mamoko ang’wen: ‘Biuru ukonya goyo lweny gi Jo-Gibeon.’ To mano e gima ruodhi abichgo timo. Be Jo-Gibeon ne otiyo gi rieko maber kane gitimo kuwe gi Jo-Israel, ma koro miyo ruodhi abichgi obiro mondo oked kodgi? Wabiro neno mano.