Chieng’ Ochung’

NE ANE Joshua. Owacho niya: ‘Chieng’ chung’ achung’a!’ Kendo wang’ chieng’ chung’. Ochung’ e kor polo kuom odiechieng’ mangima. Jehova ema miyo mano timore! To we wane gimomiyo Joshua dwaro mondo chieng’ odhi nyime gi rieny.

Ka ruodhi maricho abich mag piny Kanaan ochako kedo kod Jo-Gibeon, Jo-Gibeon oro ng’ato mondo odhi okwa kony kuom Joshua. Ng’atno wacho ni Joshua kama: ‘Reti mondo ibi ireswa! Ruodhi duto mag pinyni osebiro kedo kod jotichni.’

Gie sano, Joshua gi joge mag lweny dhi. Giwuotho otieno mangima. Ka gichopo Gibeon, jolweny mag ruodhi abichgo bedo giluoro, kendo gichako ringo. Bang’e, Jehova miyo pe madongo dongo lwar koa e polo. Jolweny ma kitegi goyo ma tho, ng’eny moloyo ma inego gi jolweny mag Joshua.

Koro Joshua neno ni chieng’ chiegni podho. Mudho dhi betie, kendo ng’eny jolweny mag ruodhi abichgo nyalo tony. Mani e momiyo Joshua kwayo Jehova kendo owacho ni: ‘Chieng’ chung’ achung’a’! To ka chieng’ dhi nyime gi rieny, Jo-Israel yudo thuolo mar loyo lweny nyaka giko.

Nitie ruodhi mamoko maricho e Kanaan ma ok dwar oganda Nyasaye. Joshua kod jolweny mage kawo higini auchiel mondo giyud loch e wi ruodhi 31 mag pinyno. Ka mani osetimore, Joshua pogo piny Kanaan ne dhoudi ma podi ne onge gi lowo.

Higini mang’eny kalo, kendo gikone Joshua tho ka en jahigini mia achiel kod apar. Ka Joshua kod osiepene pod ngima, ji luwo chik Jehova. To ka jo mabeyogi otho, ji chako timo gik maricho, kendo gidonjo e chandruok. Mani e kinde ma gidwaroe kony mar Nyasaye kuom adier.