Solomon Ruoth Mariek

SOLOMON bedo ruoth ka en rawera. Ohero Jehova, kendo otiyo gi puonj maber ma ne Daudi wuon mare omiye. Jehova mor ahinya gi Solomon, omiyo otieno moro openje e lek kama: ‘Solomon, en ang’o ma didwar ni mondo amiyi?’

Kuom mano, Solomon dwoko ni: ‘Jehova Nyasacha, podi an rawera matin ahinya, kendo ok ang’eyo locho. Kuom mano, miya rieko mar locho e wi oganda mari e yo makare.’

Jehova mor kod gima Solomon kwayo. Kuom mano, koro owachone niya: ‘Nikech isekwayo rieko to ok ni mondo idag aming’a kata mwandu, abiro miyi rieko moloyo ji duto ma osedak. Kata kamano, abiro miyi kata mago ma ok ikwayo, mwandu koda duong’.’

Bang’ kinde matin, mine moko ariyo biro ir Solomon ka gin gi wach e kindgi. Achiel kuomgi wacho ni, ‘Wadak gi dhani e ot achiel. Ne anyuolo nyathi ma wuowi, to ndalo ariyo bang’e en bende ne onyuolo nyathi ma wuowi. Koro, otieno moro nyathine ne otho. To kane anindo, ne opielo nyathine mothono e buta, ma okawo nyathina. Kane achiew ma ang’iyo nyathi mothono, ne aneno ni ok en nyathina.’

Dhako machielono to dwoko ni: ‘Ooyo! Nyathi mangimano en mara, motho to en mare!’ Dhako mokwongo-cha dwoko ni: ‘Ooyo! Nyathi mothono mari, mangima to mara!’ Mani e kaka minego wuoyo. Ang’o ma Solomon biro timo?

Ooro mondo okelne ligangla, to ka osekelne, owacho ni: ‘Poguru nyathi mangima e diere, mondo umi ng’ato ka ng’ato nus mare.’

‘Ooyo!’ min nyathi madier yuak. ‘Asayou, kik uneg nyathino. Miyeuru dhani!’ Kata kamano dhako machielo-cha to wacho ni: ‘Kik umi ng’ato ang’ata kuomwa; dhiuru nyime ung’ade nyadiriyo.’

Gikone, Solomon koro wacho kama: ‘Kik uneg nyathi! Miyeuru dhako mokwongo. En e min nyathi madier.’ Solomon ng’eyo mano nikech min nyathi ohero nyathi ahinya, kendo oyie chiwe ne dhako morono mondo kik neg nyathi. Ka ji winjo kaka Solomon oyalo wachno, gimor bedo gi ruoth mariek kamano.

E kinde ma Solomon locho, Nyasaye gwedho ji komiyo lowo golo ngano mang’eny, kod chamb shayiri, mzabibu, olemb ng’owo kod chiemo mamoko. Ji rwako lewni mabeyo, kendo gidak e ute mabeyo. Nitie gik mang’eny mabeyo ahinya moromo ji duto.