Oger ne Jehova Hekalu

Ka Solomon ne osebedo ruoth, Jehova ne openje niya: ‘Diher ni amiyi ang’o?’ Solomon nodwoke niya: ‘Pod atin ahinya, kendo ok ang’eyo gik mang’eny. Akwayi ni imiya rieko mar tayo jotichni.’ Jehova nonyise niya: ‘Nikech ikwayo rieko, abiro miyo ibed mariek moloyo ji duto e piny. Bende, abiro miyi mwandu mathoth. Kendo ka iluwo chikena, ibiro dak higni mang’eny.’

Solomon ne ochako gero hekalu. Notiyo gi dhahabu, fedha, bepe, kod kite. Chwo gi mon mang’eny ma ne nigi lony mopogore opogore ne okonyo e gero hekalu. Bang’ higni abiriyo, ne otiek ger hekalu, kendo koro nonego wale ne Jehova. E hekaluno ne nitie kendo mar misango, kendo ne oket misengini e wi kendono. Solomon ne ogoyo chonge piny e nyim kendono, mi olemo kama: ‘A Jehova, kata obedo ni hekalu ma wageronini tin malich kopime kodi, kendo berne bende orem, wakwayi ni iyie ayiea gi yo ma watiyonigo, kendo iwinj lamo magwa.’ Be Jehova ne mor gi hekaluno kod lamo ma Solomon nochiwo? Ee, en kamano nikech ka ne Solomon otieko atieka lemo ni i, mach noa e polo mowang’o misengni ma ne ochiw. Ka Jo-Israel noneno mano, ne gimor sidang’.

Rieko ma Ruoth Solomon ne nigo nolandore e Israel duto kod e pinje mamoko maboyo. Ji ne dhiga ir Solomon mondo okonygi e chandruokgi. Kata mana ruodh Sheba, ma ne en ruoth ma dhako nodhi ire mondo oteme gi penjo moko matek. Ka nowinjo yo ma Solomon ne dwokogo penjoge, nowacho kama: ‘Ne awinjo awinja riekoni e dho ji, to ne ok ang’eyo ni kare iriek moloyo kaka ne giwacho. Koro to ayie. Jehova Nyasachi oseguedhi ndi.’ Ngima ne dhi ne Jo-Israel maber ahinya, kendo ne gidak gi mor. Kata kamano, weche ne chiegni lokore.