Girito ka Gin Jerusalem

JOMA nitie kae gin jolup Yesu. Giwinjo wachne, kendo gidong’ Jerusalem. To e kinde ma giduto girito kanyaachiel, koko maduong’ pong’o odno duto. Kokono chalo gi mar yamo maduong’ makudho. Kendo ligek mach chako nenore e wi jopuonjrego duto. Be inyalo neno ligek mach manie wi ng’ato ka ng’ato kuomgi? Tiend magi duto en ang’o?

En hono! Yesu osedok e polo bedo gi Wuon mare, kendo koro oolo roho maler mar Nyasaye ne jolupne. Be ing’eyo gima rohoni miyo gitimo? Giduto gichako dhum gi dhok mopogore opogore.

Ji mang’eny man Jerusalem winjo kokono machalo gi mar yamo mapek, kendo gibiro mondo gine gima timore. Jomoko kuom jogo oa e pinje mamoko to gibiro nikech nyasi mar Jo-Israel miluongo ni Pentekost. Gima welogi neno miyo giwuoro ahinya! Welogi winjo jopuonjre kawuoyo kuom gik mabeyo ma Nyasaye osetimo, kendo gitimo kamano e dhok ma welogo wacho.

Welogo wacho ni: ‘Donge jogi duto gin Jo-Galili. Ere kaka giwuoyo e dhok ma opogore opogore mag pinje ma wan wa aye?’

Petro koro chung’ mondo oler negi wechego. Oting’o dwonde malo konyiso ji kaka Yesu ne onegi, kendo ni Jehova ne ochiere koa kuom jo motho. Petro wacho ni: ‘Koro Yesu nie polo e bat korachwich mar Nyasaye. Kendo oseolo roho maler ma ne osingi. Mano e momiyo useneno kendo winjo honni-gi.’

Koro, ka Petro wacho wechegi, ji mang’eny winjo malit nikech gima ne otim ne Yesu. Gipenjo ni: ‘Ang’o ma onego watim?’ Petro nyisogi ni: ‘Onego ulok ngimau kendo mondo obatisu.’ Kuom mano, e odiechieng’no, ibatiso ji 3,000 kendo gibedo jolup Yesu.