Ngima e Piny Manyien Mokuwe
Ka irango picha mantie e trakt ni, iwinjo nade? Bende chunyi gombo kuwe, mor, kod mewo ma nenore kanyo? Adier nyaka bedi ni chunyi gombo to yie ni gigo biro bedo e piny, en mana lek kata mana paro apara?
Kamoro ji mang’eny paro kamano. Gik matimore kawuono gin lweny, ketho chik, kech, tuoche, tiyo—mana ka wawuoyo e matin kuom gigo. Kata kamano nitie gi momiyo pod wanyalo bedo gi geno. Ka Muma ng’iyo nyime kuom ndalo ma biro, owacho kuom “kaka singruokne [Nyasaye] obet, warito polo manyien, gi piny manyien, ka ma wach makare odakie.”—2 Petro 3:13; Isaya 65:17.
“Polo manyien” gi “piny manyien,” kaluwore gi Muma, ok gin polo manyien mochue moting’o gik ma nenore kata ok en piny mochue manyien. Piny gi polo abidha nochue maonge rach moro, kendo Muma nyiso ni gibiro siko nyaka chieng’. (Zaburi 89:36, 37; 104:5) “Piny manyien” biro bedo ji makare modak e piny to “polo manyien” biro bedo pinyruoth makare mar polo, kata loch mabiro locho e wi ji modak e piny. To bende owinjore adier yie ni nyalo bedoe “piny manyien,” kata piny mangima manyien maber ahinya?
Koro, pare adier ni gik mabeyo machalo kamano ne gin achiel kuom dwaro mar Nyasaye mokwongo e piny ni. Noketo ji ariyo mokwongo e Paradis mar Eden e piny ma omiyogi tich maber ahinya: “Nyuoluru, kendo medreuru, upong’ piny, kendo ubedi gi loch kuome.” (Chakruok 1:28) Ee, Nyasaye ne dwaro mondo ginyuol nyithindo mondo bang’e giyar Paradis mar gi e wi piny mangima. Kata ka achien ne giyiero mondo giketh chik Nyasaye, ma ginyiso ratiro ni ok giwinjore bedo mangima nyaka chieng’, dwaro mar Nyasaye mokwongo ne ok olokore. To dwaro mare nyaka timre e piny manyien!—Isaya 55:11.
Kuom adiera, kinde ma ilamo Lamo mar Ruoth, Kata Wuonwa, ka ilamo mondo Pinyruodh Nyasaye obi, ilamo mondo loch mare mar polo ogol chuth richo e piny kendo olochi e wi pinyno manyien. (Mathayo 6:9, 10) To wanyalo bedo gi adiera ni Nyasaye biro duoko lemono, nikech Wachne singo kama: “Jo matir ginicham piny, mi ginidagie nyaka chieng’.”—Zaburi 37:29.
Ngima e Piny Manyien mar Nyasaye
Pinyruodh Nyasaye biro kelo gik mabeyo makelo ohala e piny ma onge gimoro amora ma wanyalo pimogo, kokelo gimoro amora maber ma Nyasaye nedwaro mokwongo mondo joge obed mamor e piny. Achaya gi chayo ji mamoko ok nobedie kendo, e ka bang’e ng’ato ang’ata man e piny nobed osiep maradier ni ji duto. E Muma, Nyasaye singore ni ‘obiro miyo luenje rum nyaka giko piny.’ “Oganda ok noting’ ligangla noganda machielo, kendo ok ginipuonjre wach lueny nyaka chieng’.”—Zaburi 46:9; Isaya 2:4.
Piny mangima gikone ibiro losi mondo ochal kaka paradis manenore kaka puodho. Muma wacho: “Thim kod piny mowe nomor; mi gweng’ motuwo ma onge gi moro motwi noil, mi maua kaka ondanyo nobedie. . . . Ni mar sokini noburre e thim, aore nobedi e piny motuwo. Ka ma nitie kwoyo maliet, yau nobedie, sokini nobedi e lowo machando pi.”—Isaya 35:1, 6, 7.
Onge gimabiro geng’o mondo kik wabed gi mor e piny Paradis. Ji ok nowinj kech kendo nikech chiemo onge. ‘Piny nochiegi,’ Muma wacho kamano. (Zaburi 67:6; 72:16) Ji duto nomor gi olemb tijegi giwegi, mana kaka Jachwechwa singore: “Ginipidh puothe mag muzabibu, ginicham olembgi . . . ginichuo, to ng’at machielo ok nochamgo.”—Isaya 65:21, 22.
E piny Nyasaye manyien, ji ok nochak odire kendo ei gedo madongo man gi udi matindo tindo ei gi kata ute moger maricho richo ni jochan nikech Nyasaye osechano kama: “Kendo giniger udi, ginidagie. . . . Giniger udi, to ng’at machielo ok nodagie.” Muma bende singo kama: “Ok giniti nono.” (Isaya 65:21-23) Kuom mano ji biro tiyo tije makelo yuto mabeyo, kendo ma romo ji. Ngima ok nojog ji.
Bang’e Pinyruodh Nyasaye bende biro duoko winjruok mokuwe mane nitie e puoth Eden e kind le, kendo e kind le kod ji. Muma wacho: “Kendo ondiek sidhe, nodag gi nyarombo, kendo kwach nonind kod nyadiel; kendo roya kod nyathi sibuor kod dhiang’ mamiyo nobedi kaachiel; to nyathi notelnigi.”—Isaya 11:6-9; Hosea 2:18.
Parie, e piny Paradis tuoche duto gi del monyosore bende ibiro changi! Wach Nyasaye miyowa geno kama: “Kendo japiny ok nowachi, Atuwo.” (Isaya 33:24) “Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie, nikech gik machon osekadho.”—Fweny 21:4.
Kaka Wachno Nyalo Timoreni
Adieri singogi mag Nyasaye kuom pinye manyien makare nyaka bed ni omako chunyi. To kata obedo ni jo moko paro ni yudo gwethgo ni ber ahinya ma ok nyal timore adier, ok gibeyo ahinya ma ok ginyal wuok e lwet Jachwechwa ma wuon hera.—Zaburi 145:16; Mika 4:4.
Adieri, nitie gik madwarore mondo watim ka wadwaro dak e Paradis mabiro e piny nyaka chieng’. Yesu nonyiso dwaro maduong’, kowacho kama ka nolamo Nyasaye: “Mani e ngima mochwere, ni ging’eyi, in Nyasaye makende maradier, kod jal ma nioro, Yesu Kristo.”—Johana 17:3.
Kuom mano ka wadwaro dak adier e piny manyien mar Nyasaye, mokwongo nyaka wang’e ni ang’o ma Nyasaye dwaro kendo mondo watim dwarono. Nikech en gima adier: “Piny kadho, gi gombone: to ng’a ma timo gi ma Nyasaye dwaro osiko nyaka chieng’,” mondo obed gi mor nyaka chieng’ e gweth ma Jachwechwa ma wuon hera biro olonwa.—1 Johana 2:17.
Ka ok onyisi e yo machielo, ndiko duto mokonyruokgo kani oa e The Bible in Luo, mar higa mar 1968.