Piny Manyien Chiegni!

Wanabed gi sirkal achiel mokwako piny ngima

Machiegnini, ka sirkand Nyasaye manie polo ochako locho e wi dhano duto, piny biro bedo kama ber ma ji nyalo dakie gi mor ka gitimo tije ma kelonegi mor lilo. Nyasaye oseketo Yesu mondo oloch e wi piny. Yesu opogore gi joloch ma ndalowagi ma ok dew kata ji. Hera e kido ma biro tayo lochne, kendo obiro bedo Ruoth mang’won, ma kecho ji, kendo ma ng’ado bura makare.​—Isaya 11:4.

Winjruok nobedie e piny ngima

Joma odak e piny ok nobed gi pogruok e kindgi mana nikech kuma ne giponie kata dhoot ma giaye. Dhano duto biro bedo gi winjruok. (Fweny 7:9, 10) Dhano duto modak e piny biro hero Nyasaye kod dhano wetegi, kendo gibiro tiyo kanyachiel e loso pinyni obed kama ber kaka Nyasaye ne dwaro chakre chon.​—Zaburi 115:16.

Gik ma timore e alwora ma hinyo ji ok nobedie

Kinde ma Pinyruodh Nyasaye biro locho e piny, Jachuech biro chiko kor lwasi e yo makare. (Zaburi 24:1, 2) Ka ne Yesu okueyo yamo mager e kinde ma ne en e piny ka, nonyiso ni Nyasaye osemiye teko mar tieko gik ma timore e alwora ma hinyo ji. (Mariko 4:39, 41) E bwo loch Kristo, onge ng’at ma biro dak gi luoro koparo ni masiche kaka mago nyalo timore. E kinde loch Pinyruodh Nyasaye, wabiro bedo gi kuwe e kindwa gi le, kendo onge joma notim gimoro amora ma ketho piny.​—Hosea 2:18.

Tuoche ok nobedie, kendo chiemo nobed mang’eny

Ji duto biro bedo gi ngima makare chuth. Onge ng’at ma nobed matuo, moti, kata ma biro tho. (Isaya 35:5, 6) Ji biro dak e ngima maber kendo maler ma chal gi ma jonyuolwa mokwongo nodakie e puodho mar Eden. Chiemo nobed mang’eny kendo piny nonyag maber mana kaka ne timorega e puodho mar Eden. (Chakruok 2:9) Mana kaka e kinde Jo-Israel machon, ji duto ma biro dak e Paradiso noyud ‘chiemo moromogi.’​—Tim Jo-Lawi 26:4, 5.

Piny nobed gi kuwe madier kod arita maber

E bwo loch mar Pinyruodh Nyasaye, ji duto biro bedo gi kuwe e kindgi kendo gibiro bedo mang’won gi jowetegi. Lwenje, loj agoko, kod dhier ok nobedie kendo. Muma singo kama: “Ng’ato ka ng’ato nobed e tiend yadhe mar mzabibu kod mar ng’ope, onge ng’at ma biro bwogogi.”​—Mika 4:3, 4.

Ji nobed gi udi mabeyo kod tije ma kelo mor

Ji duto biro bedo gi ute ma gidakie ma onge luoro moro amora ni inyalo golgie, kendo gibiro timo tije ma kelonegi mor. Mana kaka Muma osingo, jogo ma biro dak e piny manyien ‘ok noti kayiem nono.’​—Isaya 65:21-23.

Ji nopuonjre e wi gik mabeyo mogik

Muma singo kama: “Ng’eyo mar Jehova nopong’ piny duto.” (Isaya 11:9) Joma nodag e piny manyien biro siko ka gipuonjore kuom rieko mar Jehova Jachuechgi kod gik mabeyo ma nochueyo. Ok gibi tiyo gi rieko ma giyudo e loso gige lweny kata e hinyo jowetegi. (Isaya 2:4) Kar mano, gibiro puonjore dak gi kuwe e kindgi kendo rito pinyni.​—Zaburi 37:11.

Wanayud ngima mochwere

Jehova nochueyo pinyni e yo maber ma miyo wanyalo dak gimor pile ka pile. Odwaro ni dhano odag e piny nyaka chieng’. (Zaburi 37:29; Isaya 45:18) Mondo dwacheno ochopi, “obiro tieko tho chuth.” (Isaya 25:8) Muma singo kama: “Tho ok nobedie kendo, kata kuyo, kata ywak, kata rem ok nobedie kendo.” (Fweny 21:4) Nyasaye biro miyo dhano duto thuolo mar dak nyaka chieng’. Mano oriwo jogo ma biro tony kiketho piny marachni, kod ji mang’eny ma ibiro chier e piny manyien. ​—Johana 5:28, 29; Tich Joote 24:15.

Kata mana gie sani, ji tara gi tara e piny ngima osechako ikore ne dak e piny manyien ma koro okayo machiegni. Kata obedo ni pod gin dhano morem, gitemo ahinya mondo gibed joma Nyasaye diher ni odag e piny mosingo. Gitimo mano e yo mane? En kokalo kuom puonjruok e wi Jehova Nyasaye kod jal ma nooro, Yesu Kristo.​—Johana 17:3.

Puonjri weche momedore mondo ing’e kaka inyalo tony sama iketho pinyni, kendo idag e piny manyien mabiro. Yie mondo Joneno mag Jehova opuonji Muma nono ma onge chudo kitiyo gi buk miluongo ni Inyalo Dak gi Mor Nyaka Chiengʼ!