Jochiende Gin Jonek!
Satan gi jochiende kwiny kendo gin jo ma kelo chandruok. E ndalo machon Satan ne onego jamni gi jotich mag Ayub ng’ama noyie kuom Nyasaye. Bang’e nonego nyithind Ayub apar kane omiyo “yamo maduong’ ” oketho ot mane gintie. Bang’ mano Satan nogoyo Ayub gi ‘buche malit chakre e mor tiende nyaka chopi e pat wiye.’—Ayub 1:7-19; 2:7.
E ndalo Yesu, jochiende nomiyo jo moko bedo momo kendo muofni. (Mathayo 9:32, 33; 12:22) Ne gi thago ng’at moro mane gimiyo ng’ano ong’olore gi kite. (Mariko 5:5) Ne gimiyo nyathi moro ogoyo nduru, ma gidieme piny, ‘ma gimiyo no kirni matek.’—Luka 9:42.
E ndalo mokalo, jochiende nomiyo jo moko tuoche to jo moko to negigoyo gi kirni
Kawuono, Satan gi jochiende pod mana jonek kaka chon. Adier, timbegi maricho osemedore chakre chieng’ mane owitgi oko mar polo. Weche moa e piny mangima nyiso kaka gi ger adier. Gigoyo jo moko gi tuoche. Jo moko gi thago gotieno, ka gi mono gi nindo kata miyo gi leko lek malich. Jo moko bende gidwanyore go e yor terruok. To jo moko bende podi gimiyo doko joneko, jonek, kata negore kendgi.
Ndalo gi jochiende miyo jo moko bedo makwiny; githago jo moko gotieno, ka gimiyo gi leko lek malich
Lintina, modak e piny Suriname, wacho ni jachien, kata roho marach, nonego jo odgi 16 kendo nosande gi goch kod paro kuom higni 18. Kaka gigi ne otimore ne owuon, owacho ni jochiende “ohero sando joma gimako maok ohero timbego nyaka jogo tho.”
To Jehova nyalo rito jotich ne kuom lwenje mag Satan.—Ngeche 18:10.