Somo mar 4

Jachien En Ng’a?

Satan Jachien noa kanye? (1, 2)

Satan wuondo ji nade? (3-7)

Ang’o momiyo nyaka itam Jachien? (7)

1. Tiend wach “Jachien” en ng’ato mawacho miriambo maricho kuom ng’ato machielo. “Satan” en jasigu kata jakwede. Magi gin nyinge momi jasik Nyasaye maduong’. Ndalo mokwongo, ne en malaika makare e polo ka ne en gi Nyasaye. Kata kamano, bang’e nokawore ni oduong’ kodwaro ni mondo olame kar lamo Nyasaye kaka dwarore.—Mathayo 4:8-10.

2. Malaikano, Satan, ne owuoyo gi Hawa kotiyo gi thuol. Kowachone miriambo, nomiyo Hawa otamore winjo chik Nyasaye. Kamano Satan nomonjo “Loch” Nyasaye, ma en e Ng’a Ma Malo Chutho. Satan nogoyo kiawa ka Nyasaye locho e yo mowinjore kendo maber ne joge. Kendo Satan nogoyo kiawa ka nitie ng’ato moro amora ma nyalo siko ka en ratiro kuom Nyasaye. Kane otimo kamano, Satan owuon nolokore jasik Nyasaye. Mano emomiyo noluonge ni Satan Jachien.—Chakruok 3:1-5; Ayub 1:8-11; Fweny 12:9.

3. Satan temo wuondo ji mondo ji olame. (2 Jo Korintho 11:3, 14) Yo achiel mowuondogo ji en din mar miriambo. Ka din puonjo miriambo kuom Nyasaye, mano nyiso ni otimo dwaro mar Satan. (Johana 8:44) Ji mantie dinde mag miriambo nyalo paro ni gilamo Nyasaye maradier. Kata kamano kuom adier gitiyo ni Satan. Satan “e nyasach pinyni.”—2 Jo Korintho 4:4.

4. Timbe juok en yo machielo ma Satan keto godo ji e lwete. Ginyalo dwaro kony mag jochiende mondo oritgi, mondo gihiny jomoko, mondo okor negi wach, kata timo honini. Satan e teko marach mamiyo ji timo timbegi. Omiyo kik watim timbe juok ka wadwaro miyo Nyasaye mor.—Rapar mar Chik 18:10-12; Tich Joote 19:18, 19.

5. Satan bende wuondo ji ni ogandagi ber ahinya moloyo oganda moko kendo owoundo ji mondo gilam riwruok mag kedo ni piny. Jomoko paro ni pinygi kata ogandagi ber moloyo mamoko. Kata kamano mani ok en adier. (Tich Joote 10:34, 35) Jomoko ogeno kuom riwruok mag kedo ni piny mondo otiek chandruok mag dhano. Kuom timo kamano gitamore Pinyruodh Nyasaye. Pinyruodh Nyasaye kende e manyalo tiekonwa chandruok.—Daniel 2:44.

6. Yo machielo ma Satan wuondogo ji en temogi kod gombo mag richo. Jehova wachonwa mondo wawe timbe mag richo nikech ong’eyo ni gibiro hinyowa. (Jo Galatia 6:7, 8) Jomoko nyalo dwaro mondo iriwri kodgi e timo timbego. Kata kamano, ng’e ni Satan ema dwaro mondo itim timbego.—1 Jo Korintho 6:9, 10; 15:33.

7. Satan nyalo kelo ni sand kata akwede mondo iwe Jehova. Jomoko mihero nyalo kecho ahinya nikech ipuonjori Muma. Jomoko nyalo nyieri. Kata kamano, ng’a nomiyi ngima? Satan dwaro mondo iluor mondo kik ipuonjri ing’e Jehova. Kik iwe Satan loyi! (Mathayo 10:34-39; 1 Petro 5:8, 9) Kuom kwedo Jachien, inyalo moro Jehova kendo nyisoni iyie gi loch Mare.—Ngeche 27:11.

[Picha manie ite mar 9]

Din mar miriambo, timbe juok, kendo tim oganda lalo ji

[Picha manie ite mar 9]

Tam Satan kidhi nyime gi puonjruok kuom Jehova