Riwruok Margi e Piny Mangima Kendo Kaka Gitiyo

NITIE yore mang’eny ma itayogo tij lendo madhi nyime e pinje ma okalo 230. Bura Maduong’ ma yudore e ofis maduong’ manie Brooklyn, New York ema ochung’ ne tije duto mag lendo. Burano ni kod jogo ma gi oro higa ka higa kuonde ma opogore opogore e piny mangima, mondo ginon wach tijni kaachiel kod jogo ma ochung’ ne tijno kuondego. Nitie Komiti mag Ofise Matindo mar ji adek kata nyaka abiriyo ma ochung’ ne tij lendo kuonde ma ofise matindogo yudore. Moko kuom ofisego ni kod masinde mag loso buge, kendo moko kuomgi goyo buge e okang’ mamalo. Kuonde ma ofisego orito, opogi e distrikt kendo distriktgo bende opogi e alwora ma opogore opogore. Alwora ka alwora nyalo bedo kod kanyakla madirom 20. Jarit mar distrikt, timo limbe ne alwora ma opogore opogore mayudore e distrikt mare. Chokruoge ariyo madongo mag alwora itimo e higa ka higa. Bende nitie jarit mar alwora, en olimo kanyakla duto mayudore e alwora mare diriyo e higa, ka okonyo Joneno mayudore e kanyaklago kuom tij lendo e gweng’ ma gidakie.

Kanyakla machokore e Od Romo manie gweng’i, ema osiro tij lando wach maberni kama idakie. Kanyakla ka kanyakla ni kod gwenge ma opognegi. Gwengego imiyo Joneno matemo limo kendo wuoyo gi ji e udi kata mier mayudore e gwengego. Kanyakla ka kanyakla nyalo bedo gi Joneno ma kwan gi nyalo chopo kata 200, kendo gin kod jodongo ma tiyo tije ma opogore opogore e iye. Ng’ano malando wach maberni en ng’ama ogen ahinya kod riwruok mar Joneno mag Jehova. Janeno ka Janeno, tiyo tij lando ne ji wach mar Pinyruodh Nyasaye, obed ni otiyo e ofisgi maduong’, e ofisegi matindo, kata ei kanyakla moro amora.

Ripode mag tijni ioro ne ofis maduong’, kendo ka osechokgi duto, to irwakogi e buk mawuok higa ka higa ma iluongo ni Yearbook. Bende giwuok e gaset mar Watchtower mar Februar 1 e higa ka higa. Buge ariyogi oting’o ripode mag higa ka higa manyiso okang’ ma tij lando wach Jehova kod Pinyruodhe e bwo Kristo Yesu osechope. E higini ma osekalo machiegini, ji madirom 14,000,000 ma oting’o Joneno kod ji mamoko ma ohero, osebedo ka chokore e Rapar mar tho Yesu higa ka higa. Joneno mag Jehova tiyo gi seche 1,000,000,000 e lando wach maber, kendo gibatiso ji ma okalo 300,000 e higa ka higa. Buge ma gichiwo ne ji chopo tara gi tara.