Ndiko Barupe

BARUPE osemiyo ngima koda timbe ji gana gi gana omedo bedo mabeyo. Thoth Ndiko mag Dho-Grik mag Jokristo ne okwong ndiki kaka barupe. E kindewagi wanyalo ndiko barupe mondo wagergo joma nyocha eka obedo Jokristo, watudre gi osiepewa, wajiw owete koda nyimine ma okawo migepe moko makende, wajiw jogo makalo e chandruoge, kendo wakow weche madwarore mondo omi orit tije kanyakla.—1 Thes. 1:1-7; 5:27; 2 Pet. 3:1, 2.

Ndiko barua bende en yo maber ahinya mar lendo. Kuonde moko ji mang’eny odak e udi kata otel maok yot donjoe mondo olend kuno. Jomoko to ok yudre pacho, omiyo ok wayudgi sama walendo ot ka ot. Jomamoko to odak mabor maok yot choponegi.

Tuwo, kit yamo marach, kata chik sirkal makwero wuok oko, nyalo miyo kik iwuoth idhi mabor gi odi. Be inyalo ndiko barua mondo imed lendo ne watni kata ne ng’ato ma ne ilendone mana matin? Be dibed ni achiel kuom joma ipuonjorigo Muma odar? Ndikone barua nyalo bedo ni ema dwarore mondo odhi nyime bedo gi riyo mar puonjruok wach Nyasaye. Kata inyalo ndiko barua kitiyo gi Ndiko mijiwogo joma eka nyocha okendore, joma nyocha onyuolo nyathi, kata joma olalo joma gihero e tho.

Lendo Kitiyo gi Barua

Sama indiko barua kilendo ne ng’at ma ne pok ung’erugo, mokwongo nyise ni in ng’a. Inyalo lerone ni in achiel kuom jogo mochiwore timo tich moro mitimo e piny mangima. Ka owinjore, nyise ni in achiel kuom Joneno mag Jehova. Nyise gimomiyo indikone kar lime in iwuon. Ndik barupino mana kagima iwuoyo kode wang’ gi wang’. Kata kamano, kaluwore gi siem ma Yesu nochiwo ni, “beduru mariek kaka thuonde, kendo modembore kaka akuche,” par ahinya ni weche mage mowinjore inyis ng’atno kuomi.—Math. 10:16.

E barupino, ketie weche ma dine iwacho ne ng’atno ka dine ilime. Inyalo tiyo gi weche michakogo wuoyo mayudore e bug Kutoa Sababu mondo owinjre gi lendo mitimo, kata tiyo gi weche mag lendo mayudore e Tijwa mar Pinyruoth mogo machiegni. Inyalo penje penjo moro kae to ijiwe mondo opar kuom penjono. Jolendo moko to ohero lero mana ni wan gi program mar dwoko penjo mag Muma nono maonge chudo, kae to gindiko e baruano moko kuom wiye mag sula mawuok e buk moro mwatiyogo e timo puonjruok. Ranyisi mar barua mondiki mondo olendnego ng’ato oketi e ite mar 73. Baruano nyalo miyi riekni moko, kata kamano ber kitiyo gi weche mopogore sama indiko barupi. Ka ok itimo kamano, to ji nyalo yudo barua achielno nyading’eny.

Jomoko chich gi somo barua mabor mowuok kuom ng’at ma gikiya. Omiyo nyalo bedo gimaber ndiko barua machuok. Tieke kapok jal masomeno ool. Nyalo bedo gimaber keto ei baruano otas mar gwelo ji obi e chokruoge e Od Romo. Inyalo keto trakt, brosua, kata gaset mar Ohinga mar Jarito kata Amkeni! ei baruano, kae to inyise ni onyalo yudogi kinde ka kinde kodwaro. Kata inyalo penje kabe onyalo yie mondo olime omed wuo kode kuom weche mindikonego.

Kaka Inyalo Chano Baruano

Koro ng’i ane barua mar ranyisicha. Be ineno gik maluwogi: (1) Ondike maler, mochanore. (2) Kata ka bahasa olal, pod ng’atno biro bedo gi nying ng’at mooro baruano koda adres mare mar posta. (3) Onyis maler kendo achiel kachiel e paragraf mokwongo, gimomiyo ondik baruano. (4) Moro ka moro kuom wach maduong’ owuo kuome e paragraf mopogore. (5) Kaluwore gi tij baruano, ok ondike ka gima ng’ato ong’iyo ahinya gi nyawadgi, to onyiso luor mowinjore.

Kuom barua mindiko ne ofis, kaka ma jagoro mar kanyakla jandiko, dwarore ni oket nying kanyakla, nying koda adres mar jagoro, koda tarik. Bende onego oket nying koda adres mar ng’atno kata riwruok ma iorone baruano. Bang’ ndiko mago, dwarore ni omosgi kaka owinjore. E dhok moko, itieko barua gi weche kaka, “Mogeni chuth” kata “En an” e wi kama iketoe sei. Sei wuon onego ondik gi lwedo.

E barua moro amora mindiko, ne ni indiko weche kare, iluwo grama maber, itiyo gi nyukta kaka owinjore, kendo baruano kik nere mochido. Timo kamano biro miyo ng’at mindikoneno omi weche manie barupino luor.

Kinde duto ber keto adres mari bende kama owinjore e tok bahasa. Kineno ni tiyo gi adres mari ok owinjore sama ilendo ne joma ikiya kitiyo gi barua, penj jodongo kabe ginyalo yie mondo iti kod adres mar Od Romo. Adres mar ofis mar Watch Tower Society ok onego otigo nikech mano nyalo nyiso ni baruano owuok e ofis, to mano nyalo kelo chochruok. Kapo ni ok iketo adres mari oko mar bahasa, to iketo achiel kuom bugewa ei bahasano, mano bende nyalo miyo ng’ato opar ni ofis ema ooro baruano.

Kapo ni isoyo achiel kuom bugewa e bahasano, ne ni iketo stamp moromore gi pekne. Ka stamp ok oromo, jal ma iorone baruano ema idhi kwa mondo ochul pesa modong’, to mano nyalo chwanye mami kik orwak wecheni. Ng’e ni e pinje mathoth sama brosua kata gaset oso e bahasa, pes stamp madwarore ng’eny moloyo oro barua kende.

Ti gi Weche Mang’won

Bang’ tieko ndiko barupi, some mondo iwinj chal mar weche mindiko. Wechego winjore nade? Be ondikgi e yo mamuol kendo mariek? Hera koda muolo gin moko kuom kido ma watemo nyiso e tudruokwa gi jomoko. (Gal. 5:22, 23) Kapo ni ifwenyo ni weche mitiyogo gin manyoso chuny, kata ni iwuoyo ahinya kuom gik maricho matimore, yie ilokgi.

Barua nyalo chopo kuonde ma in ok inyal chopoe. Mano miyo barua bedo gima konyo ahinya e tij lendo. Nikech barua wuoyo e loyi kanyiso gigo miyiego, ng’i ni weche mindiko wacho ang’o, barupino chalo nade, kendo ni wechene winjore nade. Onyalo bedo ni en ema ochiwo gima dwarore e chako, e tego, kata jiwo ng’ato owuoth e yo madhi e ngima mochwere.