Med Lony—Tim Dongruok

KANE eka ichako tiyo gi puonj mag Muma, yoreni mogurore ahinya mag paro, wuoyo, koda timbeni, nochako lokore mos mos. Ng’eny lokruokgi ne itimo kata kapok idonjo e Skul mar Tij Nyasaye. Gie sani nyalo bedo ni isetimo dongruok ma koro ichiwo ngimani ne Jehova. Be mano nyiso ni koro ok onego itim dongruok? Ooyo ngang’. Batiso mari en mana chakruok.

Japuonjre Timotheo noyudo en jaduong’ ma Jakristo kane Paulo onyise ni ‘opar’ matut kuom puonj koda migepe ma nomiye mag tiyo ne Nyasaye—‘oket chunye’ kuom gigo—‘mondo ji one dongo mare e yore duto.’ (1 Tim. 4:12-15) Kata obedo ni eka ichako luwo yo mar adiera kata ka isetimo kamano kuom kinde mogwaro, onego ibed gi gombo mar medo timo dongruok.

Ng’eyo kod Timo Lokruok

E Jo Efeso 3:14-19, wasomo ni jaote Paulo nolamo ni mondo Jokristo wetene ‘ong’e . . . lach, bor, dhi malo, kendo dhi matut’ mag adiera. Mondo mano onyalre, Yesu nochiwo chwo ma gin kaka mich mondo gipuonj, girie weche, kendo giger kanyakla. Paro matut pile kuom Wach Nyasaye mokudhi, koda kaka itayowa gi jopuonj molony, nyalo konyowa ‘dongo’ e winjruokwa gi Nyasaye.—Efe. 4:11-15.

Dongo ma kamano oriwo loso ‘paro kod chuny’ obed manyien. Mano oriwo nyago paro motegno kendo mowinjore gi paro mag Nyasaye gi Kristo. Mano dwaro ni kinde duto ing’e kaka giparo, mondo eka ‘irwak dhano manyien.’ (Efe. 4:23, 24) Sama ipuonjori buge mag Injili, be ikawo weche mawuoyo kuom ngima Kristo kaka ranyisi monego iluw? Be itemo fwenyo kido sie ma Yesu nonyiso kendo timo kinda gadier mondo inyag kidogo e ngimani iwuon?—1 Pet. 2:21.

Weche miwuoyoe sama igoyo mbaka nyalo nyiso okang’ misetimogo dongruok ma kamago. Jogo moserwako dhano manyien ok go mbaka mag miriambo, ayany, weche mochido kata manyoso chuny. Kar mano, giwacho weche ‘mabeyo kendo magero . . . mondo okony joma winjo.’ (Efe. 4:25, 26, 29, 31; 5:3, 4; Juda 16) Paro ma gichiwo koda weche ma giwacho ka gin kendgi koda ei kanyakla nyiso ni adiera kelo lokruok e ngimagi.

Dongruok mari bende nyisore kuom bedo ng’at maok ‘yamo duto mag puonj tag ataga.’ (Efe. 4:14) Kuom ranyisi, itimo nade seche ma piny marachni temo pong’o pachi gi weche manyien, yorege mag timo gik moko, kata yorene mag yudo mor? Be ineno ka in gi tem mar wanyo seche ma noyudo isewalo mag timo tije Nyasaye mondo iluwgo gik ma kamago? Timo kamano nyalo thiro dongruokni e yore wach Nyasaye. Donge ber moloyo manyo thuolo mag timo tije Nyasaye kar ketho kinde?—Efe. 5:15, 16.

Kaka itudori kod jomoko bende nyalo nyiso okang’ misetimogo dongruok e winjruokni gi Nyasaye. Be isepuonjori bedo ng’ama ‘kecho ji, maweyo richo’ ne owete koda nyimine?—Efe. 4:32.

Dongruokni e timo gik moko kaka Jehova dwaro onego onere maler ei kanyakla koda e pacho. Bende mano onego onere maler e skul, kuonde ma ji nitie, koda kama itiye. (Efe. 5:21–6:9) Ka inyiso e yo momedore kido mag Nyasaye e chal ma kamagi duto, to kare dongruok mari nenore ayanga.

Ti gi Mich ma In-go

Jehova osemiyowa waduto ng’ato achiel achiel nyalo koda talanta. Odwaro ni wati gi michgo e konyo jomoko, mondo kokalo kuomwa, onyis jomoko ng’wono. Kuom wachni jaote Paulo nondiko niya: “Kaka ng’ato ka ng’ato noyudo mich mar chuny, tiurugo ng’ato ni ng’ato, kaka jorit mabeyo mag ng’wono” mag Nyasaye. (1 Pet. 4:10) Itiyo gi michni nade?

Petro medo wacho niya: “Ka ng’ato wuoyo, mondo obed kaka ng’a ma wacho weche rieko Nyasaye.” (1 Pet. 4:11) Ndikoni jiwo ting’ ma wan-go mar wuoyo e yo mowinjore chuth gi Wach Nyasaye, mondo Nyasaye oyud duong’. Yo mwawachogo wechego bende onego omi Jehova duong’. Tiegruok michiwo kokalo e Skul mar Tij Nyasaye nyalo konyi tiyo gi michni e yo ma kamano—miyo Nyasaye duong’ kuom yo ma ikonyogo jomamoko. Ka gombo ma in-go en timo kamano, ere kaka ibiro pimo dongruok mitimo e skundni?

Kar pimo dongruok mari kaluwore gi kwan mag lony e wuoyo mosenonie, kata chal mag migepe mosemiyi, par matut kuom kaka tiegruok miseyudono osemiyo yo mipakogo Nyasaye omedo bedo maber. Skundno ikowa mondo wabed gi lony momedore e tij lendo. Omiyo, penjri kama: ‘Be aikora gadier mondo ang’e gima abiro wacho e tij lendo? Be asepuonjora nyiso kido mar dewo jogo ma alendonegi? Be aketo mise mar dok timo limbe ne ji kuom weyonegi penjo mwabiro wuoyoe e limbe machielo? Kapo ni atimo puonjruok mar Muma gi ng’ato, be atimo kinda mondo abed japuonj mamulo chuny japuonjre?’

Kik ikaw ni dongruok nenore mana kuom migepe ma imiyi. Dongruokni ok nere mana kuom migawo momiyi, to kuom kaka itimo migawono. Kapo ni omiyi migawo mar puonjo jomoko, penjri kama: ‘Be ne apuonjo gi lony adier? Be natiyo gi weche momiya e yo makelo lokruok e ngima jowinjo?’

Jip mar tiyo gi mich ma in-go dwaro bende ni ikaw okang’ mar timo gigo madwarore. Be ikawo okang’ mar lendo gi jomamoko? Be imanyo thuolo mag konyo jo manyien, joma hikgi tin, kata jo matuwo manie kanyaklau? Be ichiwori mar konyo timo ler e Od Romo kata konyo e yore mopogore opogore e chokruoge mag distrikt koda mag alwora? Be inyalo chiwori kinde ka kinde mondo ibed painia makonyo? Be inyalo tiyo kaka painia mapile kata konyo e kanyakla ma jolendo tinie? Kapo ni in owadwa, be itimo kinda mondo inyag kido ma Ndiko owacho ni dwarore kuom jokony tich koda jodongo? Bedo moikore konyo kata kawo ting’ nyiso ni itimo dongruok.—Zab. 110:3.

Kaka Rieko Mwaseyudo Konyo

Kapo ni iwinjo ni irem nikech pod in Jakristo manyien, chunyi kik nyosre. Wach Nyasaye nyalo “chiwo rieko ni jo ma riekogi tin.” (Zab. 19:7; 119:130; Nge. 1:1-4) Tiyo gi puonj mag Muma miyowa thuolo mar yudo konyruok mawuok kuom rieko Jehova makare chuth, ma en rieko maloyo lony moro amora ma ng’ato yudo mana kuom timo gimoro kuom kinde malach. Kata kamano, kaka wamedo timo dongruok e tijwa ne Jehova, e kaka wamedo bedo gi lony. Wanyalo tiyo nade gi lony mwayudono e yo maber?

Nyalo bedo ni nikech ng’ato osekalo e chal mopogore opogore e ngimane, chunye nyalo wuonde ochak paro niya: ‘Aseromo gi chal ma kama kinde moro. Ang’eyo gima onego atim.’ Be paro ma kamano nyiso rieko? Ngeche 3:7 siemowa niya: “Kik ibedi mariek e paro mari iwuon.” Onge kiawa ni lony mwaseyudo onego oyaw pachwa mondo wang’e gik momedore monego wanon kuom chal mwanyagorego e ngimawa. Kata kamano, kwatimo dongruok e winjruokwa gi Nyasaye, lony mwayudo onego ogur e pachwa koda e chunywa ni gweth mag Jehova dwarore mondo eka ngimawa odhi maber. Omiyo, dongruok marwa nenore ok kuom genore wan wawegi sama wanyagore gi chal moko, to onenore kuom kaka wadhi mapiyo ir Jehova mondo ota ngimawa. Dongruok marwa nenore kuom bedo gadier ni onge gimoro amora manyalo timore ka Jehova ok oyie, kendo kuom siko gi winjruok machiegni gi Wuonwa me polo.

Sik Kihawo Gigo Man Nyime

Kata obedo ni jaote Paulo ne en Jakristo motegno kendo mowal kuom roho, nong’eyo ni ne dwarore ni “ohaw gigo man nyime” mondo eka oyud ngima. (Fili. 3:13-16) Be in gi paro machalo kamano?

Isetimo dongruok e okang’ mane? Pim dongruok mari kuom okang’ miserwakogo dhano manyien chuth, okang’ mibolorigo ne loch mar Jehova, koda okang’ mitiyogo gi mich ma in-go e miyo Jehova duong’. Kaka imedo yudo tiegruok e Skul mar Tij Nyasaye, e kaka kido mayudore e Wach Nyasaye onego onere ayanga e yo miwuoyogo koda mipuonjogo. Kinde duto sik kihawo dongruok e yore ma kamagi. Ee, yud mor kuom timo dongruok ma kamagi, kendo dongruokni biro nenore ayanga.