Tim Dongruok e Tij Lendo
1 Wuonwa manie polo mor sama jotichne timo dongruok e adiera. Mano oriwo dongruok kaka jalendo mar wach maber mabedo motegno kendo molony. Paulo ne ojiwo jarit ma Timotheo mondo odhi nyime kochiwore mondo omi ji one dongruok mare e yore duto. (1 Timo. 4:13-15) Waduto onego watem timo dongruok e tijwa mar lendo kata jogo kuomwa ma gin jolendo molony.
2 Ket Chenro Midwaro Chopo: Timo dongruok dwaro ni ng’ato oket chenro mare owuon modwaro chopo. Gin chenro mage ma wanyalo keto magwa wawegi? Wanyalo temo mondo wabed molony moloyo kuom tiyo gi liganglawa mar roho, ma en Muma. (Efes. 6:17) Nyalo bedo ni nitie yor lendo moro ma dwarore ni watimie dongruok moloyo, kaka lendo e lela, gi simo, kata lendo kuonde ohala. Bende wanyalo timo dongruok moloyo e dok limo joma walendonegi. Chenro machielo maber ahinya mwanyalo chopo nyalo bedo timo dongruok e chako kod timo puonjruok Muma gi ji.
3 Chenro Mantie Makonyo: Chokruok mag kanyakla, to moloyo Skul mar Tij Nyasaye kod Chokruok mar Tijwa, ochan mondo okonywa timo dongruok kaka jolendo. Kaka wamedo kinda e ikruok kod dhi e chokruogegi kaachiel kod tiyo gi puonj ma wayudo koumgi, e kaka konyruok ma wayudo nobed mang’eny.—2 Kor. 9:6.
4 Bende dwarore ni wakonyre ng’ato gi ng’ato e timo dongruok. (Nge. 27:17) Winjo maber yor lendo ma jolendo wetewa lendogo biro konyowa timo dongruok. E wi mano, jarit mar puonjruok-buk marwa nyalo timo chenro mondo okonywa wawegi. Mano kaka en gweth bedo gi painia kata jalendo moro molony ma konyowa bedo gi nyak maber kendo yudo mor moloyo e tij lendo! Be nitie jalendo manyien e grup marwa mar puonjruok-buk? Kamoro wanyalo kawo thuolo mar gwele mondo olend kodwa.
5 Tich maduong’ moloyo ma itimo e kindegi en tij lendo mar Jokristo. Seche ma wachiwo ne Jehova “misango ma en pak,” wadwaro chiwone kar nyalowa maber moloyo. (Hibr. 13:15) Ka watimo kinda e timo dongruok e tij lendo, wabiro bedo jotich ‘ma wigi ok kuodi, ka wapuonjo kare wachno mar adiera.’—2 Timo. 2:15.