Dhi Nyime Timo Kinda e Tij Lendo

LANDO wach maber e tich maduong’ie mogik ma sani itimo e piny mangima. Ka in jatich Jehova, onge kiawa ni ineno tij timo ji jopuonjre kaka thuolo makende ahinya. Wang’eyo ni seche moko jopainia gi jolendo romo gi pek moko ma nyalo dwoko chien kinda ma gin-go e tij lendo.

Jolendo moko ok yud weg udi sama gilendo ot ka ot. En adier ni thoth ji ok yudrega pacho. To seche moko kata ka weg udi nitie, yo ma girwakogo wach nyalo nyoso chunyi kendo samoro giger. Jolendo moko to yudo ka gin gi alwora maduong’ ma nigi nyak mathoth, kata kamano gibedo maluor ni ok gibi tieko lendo e alworano kaka dwarore. Jolendo moko to osebedo ka lendo kuom higni mang’eny moloyo kaka ne giparo to mano osenyoso chunygi.

Be onego okawwa gi wuoro ni jotich Jehova romo gi pek ma nyalo miyo kinda ma gin-go e tij lendo odog chien? Ooyo. Be ng’ato ang’ata kuomwa onego opar ni lando ote Nyasaye ma reso ngima ji ne dhi bedo ma yot e pinyni motel ne gi “Ng’at Marach,” Satan Jachien?—1 Joh. 5:19.

Kata bed ni ikalo e pek mane sama ilendo, bed gadier ni Jehova biro konyi loyogi. Kata kamano, inyalo timo ang’o mondo imed bedo gi kinda e tij lendo? We wanon ane yore ma nyalo konyowa.

KONY JOMA POK OLONY AHINYA E TIJ LENDO

Higa ka higa, ibatiso ji gana gi gana mondo gibed Joneno mag Jehova. Kapo ni nyocha eka obatisi kinyisogo chiwruokni ne Nyasaye, nyaka bed ni imor ahinya gi kony miyudo koa kuom joma osebedo ka lendo kuom kinde malach moloyi. To kapo ni isebedo kilando wach Pinyruoth kuom higni mathoth, donge nyalo bedo maber ka itiego joma pod nyien?

Yesu nong’eyo ni nonego ota jolupne mondo gibed joland-injili molony, kendo nonyisogi kaka onego gitim tijno. (Luka 8:1) Ndalowagi bende, dwarore ni otieg jolendo manyien mondo gin bende gibed molony.

Kik wapar apara ni jalendo manyien biro bedo gi lony mar puonjo ji mana nikech olendoga. Dwarore otiege e yo mang’won kendo e yor hera. Tiegruok ma kamano oriwo nyiso jalendo manyienno kaka onyalo (1) iko weche mochako wuoyogo gi ji kendo nwoyo kaka onyalo tiyo kodgi, (2) chako kendo goyo mbaka gi wuon ot kata ng’at ma kalo, (3) chiwo gasede kod buge, (4) dok limo joma orwako wach, kod (5) chako puonjruok Muma gi ng’ato. En adier ni nyak biro bedoe ka jalendo manyienno neno kendo luwo yore ma jalendo molony ma tiege tiyogo. (Luka 6:40) Jalendo manyienno biro bedo mamor ka oyudo jalendo moikore winje kendo konye e chal moro amora ma oromogo. Bende onyalo bedo mamor ka ipwoye kuom gima otimo kendo inyise paro moko manyien.​—Ekl. 4:9, 10.

GO MBAKA GI JALENDO WADU

Kata obedo ni inyalo timo kinda ahinya wuoyo gi weg udi, nitie kinde moko ma mbaka ma igoyo gi jalendo wadu e ma nyalo jiwie moloyo. Par ni Yesu nooro jopuonjrene ka gin “ji ariyo-ariyo” sama gidhi lendo. (Luka 10:1) Kane gilendo kanyachiel, ne giyudo thuolo mar jiwore giwegi. Kuom mano, sama ulendo, mano miyou thuolo mar ‘jiwruok e kindu.’​—Rumi 1:12.

Gin gik mage ma unyalo wuoyo kuomgi? Dibed ni achiel kuomu nigi wach moro maber ma noneno e tij lendo? Dibed ni ne ipuonjori wach moro maber e puonjruokni iwuon kata e puonjruok maru mar joot? Be nitie gimoro maber ma ne ojiwi e chokruok? Nyalo bedo ni jalendo ma opogigono ok ithor lendogo pile. Be ing’eyo kaka noyudo adiera? Ang’o momiyo nobedo gadier ni ma e riwruok mar oganda Jehova? Gin migepe kata lony mage ma nosebedogago? In bende inyalo nyise gik mosetimoreni kitiyo ne Nyasaye. Kata bed ni tij lendo ne chalo nade, bedo gi ng’at mulendogo miyou thuolo mar ‘geroru.’​—1 Thes. 5:11.

PUONJRI MA OK IBARI

Mondo wasik ka wan gi kinda e tij lendo nyaka wapuonjre wawegi ma ok wabare. “Jatich mogen kendo mariek” chiwonwa puonj modhuro e weche mopogore opogore ma nyalo konyowa. (Math. 24:45) Omiyo gik ma wanyalo tiyogo e puonjruok weche Nyasaye ng’eny matamre gi nono. We wane ane gima wanyalo puonjore sama watimo puonjruok marwa wawegi. Ang’o momiyo tij lando wach maber mar Pinyruoth en tich maduong’ e ngimawa? Sanduk manie ite mar 16 nyiso weche moko ma nyiso gimomiyo en kamano.

Nono weche mochan e sandugno nyalo jiwi imed lendo gi kinda. Donge inyalo kawo thuolo mondo itim nonro e weche mamoko minyalo medo e sandugno? Kae to par matut kuom wechego kaachiel gi ndiko ma sirogi. Timo kamano biro jiwi imed kinda e tij lendo.

IKRI RWAKO PARO MICHIWONWA

Riwruok mar oganda Jehova chiwonwaga puonj ma konyowa mondo wamed lony e tijwa mar lendo. Kuom ranyisi, mopogore gi lendo ot ka ot, wanyalo lendo kokalo kuom ndiko barua, goyo simo, lendo e ndara kata kuonde mamoko ma ji yudore, lendo ka wan e dijewa ma pile, kod kuonde ohala. Bende wanyalo timo chenro mondo wadhi walend e alwora ma ok thor lende.

Be iikori rwako kendo tiyo gi paro michiwonwago? Be isetemo tiyo gi moko kuomgi? Thoth joma osetemo tiyo gi parogo oseyudo mor mogundho nikech nyak ma gisebedogo. Ne ane ranyisi adek ma luwogi.

Ranyisi mokwongo en mar gima ne owuoye e Tijwa mar Pinyruoth moro ma nyiso kaka wanyalo chako puonjruok Muma gi ji. Wachno nojiwo nyaminwa moro miluongo ni April mochako puonjruok Muma gi jotich wetene adek. Ne omor ka jogo duto noyie puonjore Muma kendo ne gichako nyaka dhi e chokruoge mag kanyakla.

Ranyisi mar ariyo en mar chiwo gasedewa. Osebed kijiwowa mondo wamany jogo ma nyalo yie kawo kendo somo gasedewa ma wuoyo kuom wach moro sie. Jarit-alwora moro ma a e piny Amerka nowacho ni nochiwo gaset mar Amkeni! ma ne wuoyo e wi tael mag mtokni ne weg duke ma uso tael mag mtokni e alwora moro. Bende en kaachiel gi jaode ne gitero gaset ma wuoyo e wi “Kuwaelewa Madaktari” e ofise lakteche mokalo 100 ma yudore e alworagi. Jarit-alworano wacho kama: “Limbe kaka mago gin limbe makende ahinya nikech gimiyowa thuolo mar ng’eruok gi ji e alwora kendo konyowa nyisogi gasede koda bugewa. Bang’ ng’eyo joma yudore e alwora kaka mago, wayudo ka yotnwa mondo wadog wamanygi kendo.”

Ranyisi mar adek wuoyo e wi lendo ka watiyo gi simo. Nyaminwa moro miluongo ni Judy ne ondiko barua ne ofiswa maduong’ konyisogo kaka omor gi yo ma ne ojiwwago ni walend ka watiyo gi simo. Nowacho ni min mare ma jahigni 86 kendo mosebedo gi midekre, osebedo ka tiyo gi yorni e chiwo neno kendo min mare mor ahinya gi kaka otayo puonjruok mar Muma gi dayo ma jahigni 92!

Paro michiwonwaga e bugewa ma nyiso yore mopogore opogore mag lendo konyo ahinya. Ti gi parogo! Ginyalo konyi mondo isik ka imor kendo ka in gi kinda e tij lendo.

KET CHENRO MAR GIK MINYALO CHOPO

Nyak ma wayudo e tij lendo ok pim gi kwan mar buge kod gasede ma waweyo ne ji, kwan mar joma wapuonjorego Muma, kata ni ji adi ma wasekonyo mobedo jotich Jehova. Kuom ranyisi, gin ji adi ma ne Noa okonyo ma obedo jotich Jehova mopogore gi joode owuon? To pod ne en jalendo ma nigi kinda ahinya. Gima duong’ en ni watiyo ne Jehova gi chunywa duto.—1 Kor. 4:2.

Thoth jolendo oseyudo ni mondo gibed gi siso mar lendo, dwarore ni giket chenro mar gik ma gidwaro chopo kata timo. Gin gik mage ma ginyalo keto e chenrogi? Moko kuomgi ondik e sanduku manie bathe kae.

Kwa Jehova kony mondo iti gi yore mag lendo ma nyalo keloni mor kod nyak. Sama gik ma ne ichano otimore maber, ibiro bedo gi mor kuom neno kaka gitimore kendo chunyi biro bedo moil ni itimo duto minyalo e tij lando wach maber.

En adier ni lando wach maber nyalo bedo gi pek moko. Kata kamano, pod nitie gik minyalo timo mondo ibed jaland wach Pinyruoth man gi kinda. Go mbaka ma gerou gi jalendo wadu, tim puonjruok mari ma ok ibari, ti gi paro mag lendo ma jatich mogen miyowa, kendo ket chenro mar gik midwaro chopo. To moloyo duto, ng’e ni Nyasaye osedhiali gi thuolo makende ahinya mar lando wach maber ka in achiel kuom Jonenone. (Isa. 43:10) Mano kaka ibiro bedo mamor kuom dhi nyime lando wach maber gi kinda!