Luw Ranyisi mar Yesu mar Bedo Jakinda e Tij Lendo

1. Ere kaka jotich Jehova opogore gi jomamoko ma luongore ni Jokristo?

ACHIEL kuom gik ma pogoga Joneno mag Jehova gi jomamoko ma luongore ni Jokristo en kindaa ma gin-go e tij lendo. (Tito 2:14) Kata kamano, seche moko inyaloga winjo ka tij lendo ok mori. Samoro isegawinjo mana kaka jaduong’-kanyakla moro ma jakinda ma nowacho kama: “Seche moko awinjoga mana ka ok adwar dhi lendo.”

2. Gin ang’o ma samoro nyalo dwoko kindawa e tij lendo chien?

² Seche moko wanyalo bedo ma mor timo tije mamoko mag Nyasaye to ok wabed mamor sama wan e tij lendo. Nikech ang’o? En nikech sama watimo tije kaka mago, kuom ranyisi, gero utewa mag lamo, chiwo kony e kinde masira, kata jiwo owetewa gi nyiminewa, wanenoga nyak mapiyo. Wamorga tiyo kanyachiel gi owetewa gi nyiminewa ka wan gi kuwe kod hera nikech wang’eyo ni gimor gi kinda ma watimo mondo wakonygi. To komachielo, samoro wasebedo ka walendo e alwora moro kuom higni mang’eny to pok wayudo nyak moro amora. Kata, wanyalo romo gi joma kwedo wach ma walando. Bende, wang’eyo ni kaka kinde medo kalo, e kaka ji mang’eny bende medo kwedo wach ma walandonegi. (Mat. 10:22) Ang’o ma nyalo konyowa dhi nyime bedo jokinda e tij lendo, to ang’o ma nyalo konyowa medo kinda e tijno?

3. Ranyisi ma Yesu notiyogo e Luka 13:6-9 puonjowa ang’o?

³ Nono ranyisi mar Yesu nyalo konyowa bedo gi kinda e tij lendo. E kinde ma ne en e piny kae, ne ok ojok gi tij lendo, kendo kaka kinde ne medo kalo, e kaka nomedo kindane e tijno. (Som Luka 13:6-9.) Mana kaka ng’at moro ma nopidho yadh ng’owo e puothe mar mzabibu kuom higni adek ka yadhno ok nyag olemo moro amora, e kaka Yesu bende nolendo kuom higni ma dirom adek ne Jo-Yahudi ma thothgi ne ok orwako wach ma nolandonegi. Kata kamano, mana kaka ng’atno ne ok ojok gi yadh ng’owono, e kaka Yesu bende ne ok ojok gi joma nolendonegi, kata dwoko kindane mar lendo chien. Kar mano, notimo duto monyalo mondo oduog chunygi.

4. Gin weche mage ang’wen ma wabiro puonjore kuom ranyisi mar Yesu?

⁴ E sulani, wabiro nono kaka Yesu nonyiso ni ne en jakinda e tij lendo, to ahinya-ahinya, e dweche auchiel mogik ma ne en-go e piny kae. (Ne weche ma lero ndiko mar Luka 10:1 e bwo wich ma wacho ni “After these things.”) E kindegi, wanyalo bedo jokinda e tij lendo ka wanono weche Yesu kod gik ma notimo. We wanon ane ranyisi mar Yesu e weche ang’wen ma luwogi: (1) Noketo pache e tij Jehova, (2) nowinjo tiend weche ma nokor kendo kawo okang’ ma ne dwarore ka luwore gi wechego, (3) nogeno Jehova mondo okonye, kendo (4) nosiko ka en gi paro mowinjore kong’eyo ni nitie joma ne nyalo winje.

NOKETO PACHE E TIMO DWACH JEHOVA

5. Ere kaka Yesu nonyiso ni noketo pache e timo dwach Nyasaye?

⁵ Yesu nolando wach Pinyruoth gi kinda nikech nong’eyo ni mano e gima Nyasaye ne dwaro ni otim. (Luka 4:43) Noketo tij lendo e mobed mokwongo e ngimane. Kata e kinde ma nochiegni tho, “nowuotho e dala ka dala kod gweng’ ka gweng’ kopuonjo” jomamoko wach maber. (Luka 13:22) Bende, notiego jopuonjre mamoko mondo gin bende giland wach maber mana kaka en bende notimo.—Luka 10:1.

6. Ere kaka tij lendo otudore gi migepe mamoko ma wanyalo bedogo e tij Nyasaye? (Ne picha bende.)

⁶ E kindewagi bende, tich maduong’ ma Jehova gi Yesu dwaro ni watim en lando wach maber. (Mat. 24:14; 28:19, 20) Migawo moro amora ma wan-go e tij Jehova otudore gi tij lendo. Kuom ranyisi, sama wagero ute mag lamo kata tiyo e Bethel, wasiro tij lendo. Sama wakonyo joma oyudo masira, wamiyogi thuolo mar dok e ngimagi mapile mondo gidhi nyime gi chenrogi mag lamo moriwo nyaka tij lendo. Ka waketo e paro ni tich maduong’ ma Jehova dwaro ni watim en tij lendo, wabiro time ma ok wabare. Jaduong’-kanyakla moro miluongo ni János ma wuok Hungary wacho kama: “Ajaketoga e paro ni nikech tij lendo e tich maduong’ monego watim, onge tich moro amora monego okaw kare.”

7. Ang’o momiyo Jehova dwaro ni wadhi nyime lando wach maber? (1 Timotheo 2:3, 4)

⁷ Wanyalo bedo gi kinda e tij lendo ka waneno ji kaka Jehova nenogi. Wadwaro ni ji mang’eny kaka nyalore owinj wach maber kendo gipuonjre adiera. (Som 1 Timotheo 2:3, 4.) Nikech tij lendo nyalo reso ngima ji, Jehova dwaro ni wamed lony e tijno. Kuom ranyisi, brosua mar Her Ji—Konygi Gibed Jopuonjre, nigi weche moko ma nyalo konyowa chako mbaka gi ji ka dwarowa maduong’ en lokogi gibed jopuonjre. Ka joma walendonegi ok orwako wach sani, pod ginyalo yudo thuolo mar timo kamano e kinde ma biro ka pok masira maduong’ ochopo e gikone. Samoro gima wawachonegi sani e ma biro chwalogi mondo girwak wach maber e kindego. To mano nyalo timore mana ka wadhi nyime lendo.

NOKAWO OKANG’ KA LUWORE GI KAKA WECHE MA NOKOR NE CHOPO

8. Gin weche mage ma nokor ma Yesu nong’eyo ma nokonye tiyo gi thuolone e yo maber?

⁸ Yesu nong’eyo kaka weche ma nokor e Muma ne dhi chopo. Nong’eyo ni nodhi lando wach maber mana kuom higni adek gi nus kende. (Dan. 9:26, 27) Nong’eyo bende weche ma nokor e wi kinde ma nodhi thoe kod yo ma nodhi thogo. (Luka 18:31-34) Yesu noyie mondo weche ma nong’eyogo okonye tiyo gi thuolone e yo maber. Nikech mano, nolendo gi kinda mondo otiek tich ma nomiye chuth.

9. Ere kaka weche ma nokor e Muma nyalo chwalowa mondo walend gi kinda?

⁹ Ka wang’eyo weche ma nokor kod kaka gichopo, mano biro konyowa lendo gi kinda. Wang’eyo ni ndalo modong’ nok. Wang’eyo bende ni gik ma timore sani kod kido ma dhano nigo chopo weche ma nokor e Muma ma ne dhi nyiso ni wan e ndalo mag giko. Kuom ranyisi, wang’eyo ni Loch mar Ingresa gi Amerka kod Russia gi pinje ma riwe lwedo chopo weche ma nokor e wi ruoth ma milambo kod ma nyandwat ma ne dhi yware “e kinde giko.” (Dan. 11:40) Wang’eyo bende ni Loch mar Ingresa gi Amerka e ma ochung’ ne tiende sanamu maduong’ miwuoyoe e Daniel 2:43-45. Mana kaka weche mokor nyiso, wan gadier ni machiegnini, Pinyruodh Nyasaye biro tieko sirkende duto mag dhano. Weche ma nokor ma waneno ka chopo bende konyowa ng’eyo ni wan e giko mar ndalo mag giko, kendo mano chwalowa mondo walend gi kinda.

10. Gin yore mage mamoko ma weche ma nokor e Muma nyalo miyo wamed kindawa e tij lendo?

¹⁰ Weche ma nokor e Muma bende konyowa ng’eyo ote monego waland gi kinda. Nyaminwa Carrie modak e piny Dominican Republic wacho kama: “Paro apara e wi singo mabeyo mag kinde ma biro, chwalaga mondo aland ne ji wach maber gi kinda.” Omedo wacho kama: “Ka aneno chandruoge ma dhano kaloe sani, mano konya fwenyo ni singogo ok konya mana an kenda, to ginyalo konyo jomamoko bende.” Weche mokor e Muma konyowa ng’eyo ni Jehova sirowa e tijni, kendo mano miyo wadhi nyime timo tijno gi kinda. Nyaminwa Leila modak Hungary wacho kama: “Ndiko mar Isaya 11:6-9 jiwaga mondo aland wach maber kata ne joma nenore ni ok bi rwako wachno. Ang’eyo ni Jehova nyalo konyo ng’ato ang’ata ma tim lokruok.” To owadwa moro miluongo ni Christopher modak Zambia wacho kama: “Mana kaka iwachonwa e Mariko 13:10, wach maber ilando e piny ngima, kendo amor ahinya bedo achiel kuom joma chopo ndikono e kindegi.” Gin weche mage ma nokor e Muma ma jiwiga mondo ilend gi kinda?

NOGENO KUOM JEHOVA MONDO OKONYE

11. Ang’o momiyo ne dwarore ni Yesu ogen kuom Jehova mondo okonye dhi nyime lendo gi kinda? (Luka 12:49, 53)

¹¹ Yesu nogeno kuom Jehova mondo okonye dhi nyime lendo gi kinda. Notiyoga gi rieko sama nowuoyo gi ji nikech nong’eyo ni wach maber ma nolando ne nyalo kelo akwede kod pogruok e kind ji. (Som Luka 12:49, 53.) Jotend din ma nodak e kindego ne ok ohero wach ma nolando, to mano nomiyo gitemo nyading’eny mondo ginege. (Joh. 8:59; 10:31, 39) Kata kamano, Yesu nodhi nyime yalo wach maber nikech nong’eyo ni Jehova ne ni kode. Nowacho kama: “Ok an kenda, to Wuora ma ne oora ni koda. . . . Ne ok ojwang’a, nikech kinde duto atimo gik ma more.”—Joh. 8:16, 29.

12. Ere kaka Yesu noiko jolupne mondo gidhi nyime lendo kata obedo ni ne ginyalo romo gi akwede?

¹² Yesu noparo ne jopuonjrene ni ne dwarore ni gigen kuom Jehova mondo okonygi. Kinde ka kinde, nojaparonegi ni Jehova ne dhi konyogi kata sama ne giromo gi akwede. (Mat. 10:18-20; Luka 12:11, 12) To nikech nong’eyo ni ji mang’eny ne dhi kwedo wach ma ne gilando, nonyisogi ni gibed motang’. (Mat. 10:16; Luka 10:3) Nowachonegi ni kik gichun ji gi ote ma ne gilando. (Luka 10:10, 11) Bende, nonyisogi ni ka po ni isandogi, to giring gidhi kamachielo. (Mat. 10:23) Kata obedo ni Yesu ne en jakinda kendo nogeno Jehova, notang’ mondo kik odonj e weche ma ne nyalo hinyo ngimane.—Joh. 11:53, 54.

13. Ang’o momiyo inyalo bedo gadier ni Jehova biro konyi?

¹³ E kindegi bende, sama waromo gi akwede, dwarore ni wakwa Jehova mondo okonywa dhi nyime lendo gi kinda. (Fwe. 12:17) Ang’o momiyo inyalo bedo gadier ni Jehova biro konyi? Ne ane weche ma Yesu notiyogo e lamo ma yudore e Johana sula mar 17. Yesu nokwayo Jehova mondo orit jootene, kendo Jehova notimo mana kamano. Bug Tich Joote wacho kaka Jehova nokonyo joote lando wach maber gi kinda kata obedo ni nisandogi ahinya. E lamono bende, Yesu nokwayo Jehova mondo orit joma ne dhi keto yie kuom wach ma joote ne dhi landonegi, to mano oriwo nyaka in. Jehova pod dhi nyime dwoko lamono kendo obiro konyi mana kaka nokonyo joote.—Joh. 17:11, 15, 20.

14. Ang’o momiyo wanyalo bedo gadier ni wabiro dhi nyime lendo gi kinda kata e kinde ma weche tek? (Ne picha bende.)

¹⁴ Kaka giko medo sudo machiegni, e kaka biro bedonwa matek lando wach maber. Kata kamano, Yesu nowacho ni obiro konyowa ka wadhi nyime bedo gi kinda e tijno. (Luka 21:12-15) Mana kaka Yesu kod jootene, ok wadwarga yware gi joma walendonegi, to mano e momiyo waweyoga mondo gin e ma gitim yiero ka be gibiro winjowa kata ooyo. Kata e pinje ma tijwa ogoye marfuk, owete gi nyimine pod dhi nyime lando wach maber nikech gigeno Jehova to ok tekogi giwegi. Mana kaka Jehova nomiyo Jokristo mokwongo teko mar yalo wach maber, e kaka obiro miyowa teko mar ‘yalo wachno chuth’ e okang’ modwaree. (2 Tim. 4:17) Inyalo bedo gadier ni kigeno kuom Jehova, to ibiro dhi nyime lando wach maber gi kinda.

NOSIKO KA EN GI PARO MOWINJORE

15. Ang’o ma nyiso ni Yesu ne nigi paro mowinjore e tij lendo?

¹⁵ Yesu nosiko ka en gi paro mowinjore e wi tij lendo. Mano nokonye bedo mamor gi tijno kendo dhi nyime time gi kinda. Kuom ranyisi, ka ne higa mar 30 dhi ka rumo, Yesu nopimo joma ne nigi riyo mar winjo wach maber gi puodho mochiek kendo moromo keyo. (Joh. 4:35) Higa achiel kama bang’e nonyiso jopuonjrene niya: “Tij keyo duong’.” (Mat. 9:37, 38) Kinde moko bang’e, nojiwo wachno kendo kowacho niya: “Tij keyo duong’ . . . Omiyo, kwauru Ruodh keyo mondo oor jotich e keyone.” (Luka 10:2) Yesu ne ok oyie mondo gimoro amora omone fwenyo joma ne nigi riyo mar winjo wach maber, kendo nobedoga mamor ka girwako wachno.—Luka 10:21.

16. Ere kaka ngeche moko ariyo ma Yesu nogoyo konyowa bedo gi paro mowinjore e tij lendo? (Luka 13:18-21) (Ne picha bende.)

¹⁶ Yesu nojiwo jopuonjrene ni gibed gi paro mowinjore e wi tij lendo, to mano ne dhi miyo gibed gi kinda e tijno. Kuom ranyisi, ne ane ngeche moko ariyo ma nogoyo. (Som Luka 13:18-21.) E ngero mokwongo, Yesu nowacho ni mana kaka koth karadali nyalo dongo ma bed yien maduong’, e kaka wach Pinyruoth ne idhi land e piny mangima kendo ne ok dhi geng’e. E ngero machielo, Yesu nopimo ote mar Pinyruoth gi thowi. Mana kaka thowi nyalo kuodo mogo duto, e kaka wach maber mar Pinyruoth bende nyalo miyo ji otim lokruoge moko e ngimagi ma samoro ok nyal fweny mapiyo. Yesu notiyo gi ngerogo e konyo jopuonjrene mondo ging’e ni wach maber ma ne gidhi lando ne dhi bedo gi nyak.

17. Ang’o momiyo dwarore ni wadhi nyime siko ka wan gi paro mowinjore e tij lendo?

¹⁷ Sama waneno kaka tij lendo osekonyo ji mang’eny e piny ngima, mano chwalowa mondo watime gi kinda. Higa ka higa, ji milionde mang’eny biroga e Rapar kendo puonjorega kodwa Muma. Bende, ji mang’eny itisoga higa ka higa kendo giriworega kodwa e lando wach maber. Ok wang’eyo ni gin ji adi ma pod nyalo rwako wach maber ma walando, kata kamano, gie sani wang’eyo ni Jehova choko oganda mang’ongo ma biro tony e masira maduong’. (Fwe. 7:9, 14) Jehova ma en Ruodh keyo neno kaka tij keyo pod ng’eny, omiyo, dwarore ni wadhi nyime lendo gi kinda.

18. Ang’o ma wadwaro ni ji ofweny sama ginenowa e tij lendo?

¹⁸ Jopuonjre Yesu madier osebedo ka lando wach maber gi kinda. Ka ne ji oneno chir ma joote ne wuoyogo, “ne gifwenyo ni kare yande ne gin-ga gi Yesu.” (Tich 4:13) Sama wan e tij lendo, weuru mondo jomamoko ofweny ni watimo tijno gi kinda mana kaka Yesu bende notimo!