Program mar Timo Dongruok Ibed Jagol-Twak Kendo Japuonj Molony

KATA bed ni hiki tin kata ng’eny, in dichwo kata dhako, programni nyalo konyi imed ng’eyo wuoyo maber, kendo ibed japuonj molony e puonjo Wach Nyasaye.

Jarit-skul biro chano ne jogo mosedonjo e Skul mar Tij Nyasaye migepe. Ite adek maluwo nigi fom mari moting’o puonj mag lony. Namba mokwan godo puonj mag lonygo bende ema otigo e nyiso kaka giluwore e buk. E moro ka moro kuom puonj mag lonygo, ibiro yudo weche malero kaka inyalo lony maber e wuoyo koda e puonjo, kendo ng’eyo gimomiyo wechego dwarore. Bende ibiro yudo weche machiko kaka inyalo chopo gima dwarore.

Rangi mopogore opogore manie fom moting’o puonj mag lony, nyiso lony minyalo tigo e migepe motudore gi (1) somo e nyim ji, (2) ranyisi mitimo gi ji ariyo kadhi nyime, kata (3) twak migolo e kanyakla. Jarit-skul biro miyi lony monego itiegrie. Ber ka itiegori e lony achiel kapok idhi e machielo. Timo tiegruok momiyi e giko mar lony biro konyi. Ka onenore maler ni isetiyo maber gi lony ma ne omiyi, jata skul biro miyi lony machielo mondo itiegrie.

Kapo ni migawo mari onego otim e yor ranyisi, biro dwarore ni iyier chal migolego. Chal migologo twak ochan e ite mar 82, kata kamano, inyalo tiyo gi chal moro maonge kanyo. Jata-skul nyalo kwayi mondo iti gi chal moro mar golo twak mondo ibed gi lony, kata onyalo weyo iyier kendi chal midwaro.

Somo bugni kendo timo tiegruok moketi kata ka ok en ikruok mitimo ne migawo mar skul, biro konyi ahinya e timo dongruok. Samoro inyalo puonjori lony achiel juma ka juma.

Kata bed ni isegolo migepe e skul kuom kinde maromo nade, kata iselendo kuom higini adi, pod nitie thuolo mar timo dongruok. Mad tiegruok miyudo e Skul mar Tij Nyasaye okonyi chuth!