Wuoyo gi Ilo

WUOYO gi ilo konyo miyo twak obed gi ndhadhu. Kata obedo ni weche mabeyo mag puonjo dwarore, golo twak e yo moil ema biro miyo imak pach jowinjo. Bed ni iwuok e oganda mane, kata kiti chalo nade, inyalo puonjori wuoyo gi ilo.

Wuo gi Chuny Madwarore. Kane Yesu wuoyo gi chi Jo-Samaria, Yesu nowacho ni jogo malamo Jehova nyaka tim kamano “e chuny kendo e adiera.” (Joh. 4:24) Onego gilame nikech hera ma gin-go e chunygi kendo e yo mowinjore gi adiera manie Wach Nyasaye. Ka ng’ato ohero Nyasaye gadier e okang’ ma kamano, mano biro nenore e yo mowuoyogo. Obiro bedo gi siso mar wuoyo gi jomoko e wi gik mabeyo ma Jehova osechiwonwa nikech oherowa. Kaka wang’e nyiso, ranyisine mag del, koda dwonde biro nyiso gadier kaka owinjo e chunye.

Ang’o manyalo miyo jagol-twak mohero Jehova kendo man gadier gi gima owacho, kik owuo gi ilo? Iko gima obiro wacho kende ok oromo. Wach mowuoyoe nyaka donjne chuth, kendo omul chunye. Wakaw ni wich modwaro wuoyoe en wach misango mar rawar mar Yesu Kristo. Sama jagol-twak golo twagni, ok onego oket mana weche twak e wiye, to chunye bende onego opong’ gi mor kuom kaka misango mar Yesu konye en owuon kaachiel gi jowinjone. Dwarore ni oket e paro mor mowinjo e chunye kuom mich majaberni ma Jehova Nyasaye kod Kristo Yesu nochiwo. Dwarore ni opar geno majaber ma misangono chiwo ne dhano mondo giyud ngima—mor mochwere maonge tuoche e piny ma nobed paradis! Omiyo, dwarore ni oket chunye e twagno.

Kuom wach jandiko Ezra, ma ne en japuonj e Israel, Muma wacho ni ‘noketo chunye mar dwaro chik Jehova, mar timogo, kendo mar puonjo Israel.’ (Ezra 7:10) Ka wan bende watimo kamano—ok iko mana weche kende, to chunywa bende—weche mwawacho biro wuok e chunywa. Lero adiera e yo ma kamano nyalo konyo kamaduong’ e miyo joma wawuoyogo onyag hera madier ne Wach Nyasaye.

Ng’e Chal mar Jowinjo. Gimoro machielo maduong’ manyalo konyi wuoyo gi ilo en bedo gadier ni weche mibiro wuoyoe gin madhi konyo jowinjo. Mani nyiso ni sama iiko twak, ok onego iik mana weche mabeyo ma ibiro wacho, to bende onego ikwa Jehova otayi tiyo kodgi e konyo jowinjo. (Zab. 32:8; Math. 7:7, 8) Non mondo ing’e gimomiyo dwarore ni jowinjo ong’e wechego, kaka wechego biro konyogi, kendo kaka inyalo chiwo wechego e yo mabiro miyo girwak puonjgo.

Non weche midhi wuoyoe nyaka iyud wach moro miilgo ma diher nyiso jomoko. Ok ochuno ni obed wach moro manyien, kata kamano, inyalo lero wachno e yo mopogore gi mapile. Onge gima moni wuoyo gi ilo madier sama igolo twak, kapo ni gima iiko biro konyo jowinjoni tego winjruokgi gi Jehova, hero gigo ma Jehova chiwonegi, ng’eyo kaka ginyalo nyagore maber gi chandruok ma giyudo e piny marachni, kata konyogi bedo molony e tij lendo.

To nade ka migawo mari en mar somo e nyim ji? Mondo itim kamano gi ilo, dwarore ni itim mathoth moloyo mana somo weche kare kendo somogi kanyachiel kaka dwarore. Non weche mibiro somogo adimba. Kapo ni ibiro somo kamoro e Muma, timne nonro. Bed gadier ni iwinjo tiend weche midhi somo. Non kaka wechego nyalo konyi kod jowinjoni, kendo somgi giwuog e yo madhi konyo jomawinji.

Be dibed ni itimo ikruok mar dhi e tij lendo? Kal e wi wach midhi wuoyoe koda Ndiko michano tiyogo. Par bende gima ni e pach ji gie sano. Gin weche mage moseland machiegni e gige fwambo weche? Gin chandruoge mage ma giromogo? Sama iikori maber nyiso ji kaka Wach Nyasaye nyalo konyogi loyo chandruoge ma giyudo, ibiro bedo gi siso mar nyisogi wechego kendo wuoyo gi ilo biro bedoni mayot.

Nyis Ilo Kuom Wuoyo gi Jing’o. Ilo nenore maler sama igolo twak gi jing’o. Mano onego onere e wang’i. Onego onere ni in gadier, to ok ni ichuno weche.

Paro makare dwarore. Jomoko il gi gimoro amora. Nyalo dwarore ni okonygi ng’eyo ni ka ng’ato il mokalo tong’, jowinjo biro keto pachgi kuome kar keto pachgi kuom gima owacho. To komachielo, onego ojiw joma oluoro wang’ ji mondo giwuo e yo mathuolo.

Ilo en gima landore. Ka ing’iyo jowinjo e yo makare kendo igolo twak ka iil, jowinjoni bende biro bedo moil. Apollo ne owuoyo gi jing’o kendo iwacho ni ne en jagol-twak mong’ith. Ka irieny gi roho mar Nyasaye, twak migolo kijing’ biro miyo jowinjoni okaw okang’.—Tich 18:24, 25; Rumi 12:11.

Nyiso Ilo Mowinjore ne Weche Miwuoyoe. Tang’ kik inyis ilo mokalo tong’ e twak duto mamiyo jowinjoni ol. Ok gibi rwako jip moro amora midwaro ni gikawie okang’ nikech giol. Mano nyiso gimomiyo dwarore ahinya ni iik weche mabiro miyi thuolo mar wuoyo e yore mopogore opogore. Tem mondo kik iwuo e yo manyiso ni gik miwacho ok odonjoni. Ka iyiero weche miwuoyoe adimba, ibiro bedo gi ilo mar gologi. Kata kamano, weche moko dwarore ni owach gi ilo moloyo, kendo weche ma kamago onego oke e yo mariek e twak duto.

To moloyo, puonj madongo onego ogol gi ilo. Twagi nyaka bed gi puonj madongo mijiwo. Nikech magi e weche maloso mise twak, gihinyo bedo puonj midwaro ni ojiw jowinjo. Nikech koro isemiyo jowinjoni obedo gadier kuom wechego, dwarore ni ijiwgi gikaw okang’ kinyisogi ber mar tiyo gi wechego. Ilo minyiso biro konyi mulo chuny jowinjo. Wuoyo gi jing’o ok onego ochun ngang’. Onego ng’ato obed gi gimomiyo owuoyo kamano kendo weche mowuoyoe biro chiko kaka otimo mano.