Rwakruok Koda Bidhruok Maber

RWAKRUOK koda bidhruok mar dendi nyiso ji gik mang’eny kuomi. Kata obedo ni Jehova neno chuny ng’ato, dhano to jong’ado wach kaluwore gi “kit nenruok ma oko.” (1 Sam. 16:7) Ka iler kendo ibidho dendi maber, yot mondo jomoko ong’ad ni in ng’at momiyore luor, kendo ginyalo hero winji. Rwakruokni e yo mowinjore bende biro miyo jowinjoni opak riwruok mar Joneno kendo gimi Nyasaye milamo luor.

Puonj Monego Itigo. Muma ok oketo chike mang’eny kuom wach rwakruok koda bidhruok. Kata kamano, omiyowa puonj maok kal tong’ manyalo konyowa ng’ado weche e yo maber. Mise machiko puonjgi duto en ni ‘watimo duto ni duong’ mar Nyasaye.’ (1 Kor. 10:31) Gin puonj mage motudore gi wach rwakruok koda bidhruokwa?

Mokwongo, Muma jiwowa ni dendwa gi lepwa obed maler. E Chik ma nomiyo Jo-Israel machon, Jehova noketo chike matayo weche ler. Kuom ranyisi, kane jodolo timo migepegi, ne dwarore ni giluokre kendo giluok lepgi e seche ma ne oketi sie. (Lawi 16:4, 24, 26, 28) Jokristo ok ni e bwo Chik Musa, kata kamano, puonj mayudore e chikego pod konyo kata gie kindegi. (Joh. 13:10; Fwe. 19:8) To ahinya wuon, sama wadhi kar lamo kata watiyo tij lendo, dendwa, lepwa, koda muya mawuok e dhowa, onego obed maler mondo kik wachwany jomoko. Jogo magolo twege kata matimo ranyisi e nyim kanyakla onego oket ranyisi maber e wachni. Rwakruok koda bidhruok maber nyiso ni wamiyo Jehova koda riwruok mare luor.

Mar ariyo, Muma jiwowa ni wanyag kido mag bidhruok koda paro moritore. Jaote Paulo nojiwo mon ma Jokristo “mondo obidhre . . . ka gin gi bidhruok kod ritruok. Rwakruokgi kik obed mar kado yie wich, kata rwako dhahabu, kata lulu, kata lewini ma nengogi tek; to onego girwakre gi timbe mabeyo, kaka owinjore ni mon ma wacho ni giluoro Nyasaye.” (1 Tim. 2:9, 10) Bidhruok koda paro moritore bende gin kido monego ota joma chwo e wach rwakruok.

Jal man gi paro mobidhore ok dwar chwanyo jomoko goyiem kendo ok odwar ywayo pach ji ahinya gi rwakruokne. Bedo gi paro moritore miyo ng’ato tiyo gi rieko kata miyo oneno weche e yo makare. Nikech omiyo chike Nyasaye luor, ng’at ma nigi kidogi bedo gi paro mowinjore. Bedo gi kidogi ok monwa rwakore e yo malombo wang’, to miyo warwakore maber kendo ok wakal tong’. (1 Joh. 2:16) Wadwaro tiyo gi puonjgi bed ni wan kar lamo, watiyo tij lendo, kata watiyo tije mamoko. Lepwa mag ywach kata lepwa mapile bende onego onyis bidhruok koda paro moritore. Sama wan e skul kata e tijwa mar andika, wanyalo yudo thuolo mar lendo kata kane ok wan e tij lendo. Kata ka rwakruokwa nyalo pogore gi mar dhi e chokruoge mag kanyakla, mag distrikt, koda mag alwora, pod onego warwakre e yo mochanore, maler, kendo mobidhore.

En adier ni waduto ok warwakre machalre. Ok ochikwa ni watim kamano. Ji opogore e lewni ma gihero, kendo mano en gima owinjore. Kata kamano, puonj mag Muma onego otigo seche duto.

Jaote Petro nonyiso ni bidhruok maber moloyo loso wich koda lewni, en bidhruok “maiye, mar chuny.” (1 Pet. 3:3, 4) Ka chunywa opong’ gi hera, mor, kuwe, ng’wono, koda yie mogurore motegno, magi biro bedonwa lewni mag chuny makelo ne Nyasaye duong’ gadier.

Mar adek, Muma jiwowa mondo wanon kabe rwakruok koda bidhruokwa owinjore kata ochanore maber. Bug 1 Timotheo 2:9 wuoyo kuom “lewini mowinjore.” Kata obedo ni jaote Paulo ne wuoyo kuom lep joma mine, puonjgo bende tiyo kuom joma chwo. Lewni mowinjore gin lewni maler, mochanore maber. Bed ni wan gi yuto matin kata mamalo, pod wanyalo rwakore e yo mochanore.

Achiel kuom gima ji kwongo neno e rwakruok koda bidhruokwa, en yie wiwa. Onego walos yie wiwa maber. Chik mar oganda koda kit yie wich chiko kaka ng’ato loso wiye. E bug 1 Jo Korintho 11:14, 15, wayudo puonj ma jaote Paulo nochiwo e wi wach loso wich, puonj ma nenore ni ne onywako weche ariyo mowach malogo. Kata kamano, ka ng’ato loso wiye e yo mamiyo ochalo dhako kata ochalo dichwo to ok en, mano ok owinjore gi puonj mag Muma.—Rapar 22:5.

Kuom joma chwo, rwakruok koda bidhruok mochanore maber nyalo riwo liedo. Kuonde ma pidho yier manie dho um en gima owinjore, joma oyiero timo kamano onego one ni gilielogi maber.

Mar ang’wen, rwakruok koda bidhruokwa ok onego onyis ni wahero piny koda yorene. Jaote Johana nochiwo siem niya: “Kik uher piny, kata gik manie piny.” (1 Joh. 2:15-17) Gombo mang’eny mopong’o piny gin mag timo richo. Moko kuom gombo ma Johana wuoyoe gin gombo maricho mag ringruok koda sungo gik ma ng’ato nigo. Ndiko bende wuoyo kuom chuny mar ng’anjo kata chayo chik. (Nge. 17:11; Efe. 2:2) Gombo koda chuny ma kamagi janenore e yo ma ji rwakorego kendo bidhorego. Nikech mano, rwakruok koda bidhruok margi nyalo bedo mokalo tong’, makelo gombo mag terruok, mojimbore, mojwang’ore, kata moywothore. Kaka jotich Jehova, watamore luwo rwakruok maok nyis kit Jokristo.

Kar luwo yore mag piny e wach rwakruok gi bidhruok, donge diber moloyo ka waluwo ranyisi mabeyo mag chwo gi mon ma gin Jokristo motegno e kanyakla! Yawa matindo magombo golo twak e nyim ji e kinde mabiro nyalo puonjore kuom ng’iyo rwakruok mag joma osetimo dongruok e golo twege e nyim ji gie sani. Waduto wanyalo puonjore kuom ranyisi mag jogo mosenano kuom higini mang’eny e tij lendo.—1 Tim. 4:12; 1 Pet. 5:2, 3.

Mar abich, sama wayiero gima owinjore, ber mondo waket e paro ni kata “Kristo bende ne ok otimo gi ma nohero.” (Rumi 15:3) Gima ne duong’ e ngima Yesu ne en timo dwaro mar Nyasaye. Bende, Yesu noneno ni konyo jomoko ne duong’ moloyo timo gima more. Kuom wach rwakruok kod loso del, ang’o monego watim kapo ni nitie gima nyalo miyo joma walendonegi otamre winjowa? Luwo ranyisi mar bolruok ma Kristo noketo nyalo konyowa timo yiero maber. Jaote Paulo nochiwo puonj monego otawa: “Ok watim gimoro ma chwanyo ng’ato.” (2 Kor. 6:3) Nikech mano, wabiro weyo yore mag loso wich kata gik bidho del manyalo miyo jomoko otamre rwako wach mwalandonegi.

Yo mar Chung’ Koda Bet. Rwakruok koda bidhruok maber bende oriwo chung’ koda bet e yo mowinjore. En adier ni waduto ok wachung’ kata bet e yo machal kendo ok watem luwo yo moro sie mar timo kamano. Kata kamano, ber ng’eyo ni kaluwore gi Muma, chung’ tir nyiso ni ng’ato omiyore luor kendo okawo weche e yo maber. (Lawi 26:13; Luka 21:28) Kata kamano, nyalo dwarore ni owadwa kata nyaminwa moro osirre kuom gimoro nikech ok onyal chung’ tir nimar osebet kotiyo kokulore kuom higini mang’eny, oseti, kata otuwo. To kuom jogo manyalo chung’ tir, timo kamano sama giwuoyo gi jomoko en gima ber mondo kik gichiw paro ni ok gidew kata ni ok gimor gi gima giwacho. Kamano bende, ok rach ka jagol-twak teno lwete kadichiel e rachungi migoloe twak, kata kamano, jowinjo kawe maber moloyo ka ok otimo kamano.

Gige Lendo Mochanore Maber. Ok rwakruok koda bidhruokwa kende ema onego obed maler kendo mochanore, to gigewa mag lendo bende onego obed mochanore kendo maler.

Ng’i ane kaka Muma mari chalo. Ok en gima yot pile ne ji duto yudo Muma manyien sama margi oseti. To kata ka wasebedo gi Muma kuom kinde malach maromo nade, onego onere ka buk moserit maber.

En adier ni nitie yore mang’eny mag keto buge e bag mar lendo, kata kamano, onego oketgi e yo mochanore. Be iseneno ka kalatese lwar kawuok e Muma mar jalendo sama odwaro somo Ndiko ne wuon ot, kata samoro kane owadwa moro golo twak ne kanyakla? Donge mano ne ochocho pachi? Ka kalatese mikano e Muma bedo gik machocho ji, ber kanogi kamachielo mondo gigeni obed mochanore maber. Ng’e bende ni kuom oganda moko, keto Muma kata buge mag din piny e dier ot, ikwano kaka tim achaye marach ahinya.

Rwakruok koda bidhruok maber en gima onego wakaw mapek. Bende omulo kaka jomoko nenowa. To moloyo duto, wakawo wachno mapek nikech gombowa en ni ‘e weche duto wami ji one ber mar puonj Nyasaye Jawarwa.’—Tito 2:10.