Sandug Penjo

◼ Rwakruok mane mowinjore sama walimo ute mitiye kod milame Jehova?

Kuonde duto e piny mangima, Ute Romo, Ute Chokruok Madongo, Bethel, kod ofise gin kuonde mowal ne tij Jehova. Gin kuonde mobidhore, maler, kendo mochan maber, kendo nikech mano, gin kuonde monego omi luor. Mano opogore ahinya gi gik matimore e piny ma Satan oteloeni. Jogo malimo kuonde mitimoe tij Jehova onego onenre ka jo Jehova matimo dwarone.

Kaka Jokristo, “wanyisore kaka jotich Nyasaye” e weche duto, moriwo lewni mochanore maber, kod rwakruok mowinjore. (2 Kor. 6:​3, 4) Owinjore bende ni wasik ka wan gi timbe mabeyo. Kinde duto dwarore ni lepwa kod rwakruokwa obed manyiso bidhruok kod luor mowinjore gi jotich Jehova Nyasaye. Mae dwarore ahinya seche ma walimo ofis maduong’ mar Joneno mag Jehova mani New York kata ofise moko manie pinje mamoko.

E wuoyo kuom wach maduong’ momiyo lewni kod rwakruok mowinjore dwarore, bug Tengenezo Linalofanya Mapenzi ya Yehova nyiso gimomiyo onego wabed maler e del, lewni mobidhore kod rwakruok maber seche ma walendo kod seche ma wadhi e chokruok mar Jokristo. Bang’e, e ite mar 138, paragraf 3, owacho kama: “Kik wiyi wil ni, nying mar Bethel tiende en ‘Od Nyasaye.’ Kuom mano, lepwa, rwakruokwa kod timbewa seche ma walimo Bethel onego bed machal gi seche ma wadhi e chokruok e Od Romo.” Wachni onego oluw gi jolendo mag Pinyruoth malimo Bethel modak machiegni kata mabor ahinya. E timo kamano, ng’ama limo Bethel nyiso chuny mar erokamano kod luor.​—Zab. 29:2.

Rwakruokwa onego nyis ni wan joma ‘oluoro Nyasaye.’ (1 Timo. 2:​10) Lewni kod rwakruok mowinjore nyalo miyo jomoko one lamo madier mar Jehova e yo maber. Kata kamano, osenenore ni ka ji limo kuonde mitimoe tij Jehova, owete gi nyimine moko manok rwakre e yo mojwang’ore, kata rwako lewni ma ok umgi malong’o. Rwakruok ma kamano ok owinjore gi Jokristo kinde duto. Kuom wachni, kaka weche mamoko duto e ngimawa kaka Jakristo, wadwaro siko ka warito kit rwakruok malong’o manyiso pogruok e kind oganda Nyasaye gi jopiny, ka watimo duto ne duong’ mar Nyasaye.​—Rumi 12:2; 1 Kor. 10:31.

Kuom mano, seche milimo ofis maduong’ mani New York kata ofise manie pinje mamoko, obed ni ne ichano limo kanyo kata itimo limbe kuonde ma ji jalimoga mondo gine gik moko, penjri kama: ‘Be lawa gi rwakruokna nyiso bidhruok, ler, kod luor mowinjore gi kama adhi limo? Be rwakruokna nyiso luor ne Nyasaye malamo? Rwakruokna biro chwanyo jomoko?’ Kinde duto we mondo lewni kod rwakruokwa onyis “e weche duto ... ber mar puonj Nyasaye Jawarwa”!​—Tito 2:​10.