Ere Kaka Dwakony Joma Obiro e Rapar?
1. Neno mane maduong’ ma ibiro chiwo e Mach 22, 2008?
1 Chieng’ tarik 22, Mach, 2008, tara mag ji e piny mangima ibiro tim nigi neno maduong’ ahinya. Joma biro e Raparno nowinj wach hera maduong’ ma Jehova nonyiso e chiwo rawar ne dhano. (Joha. 3:16) Gibiro puonjre kuom wach Pinyruoth to kod kaka Jehova biro konyore kode e chopo dwaro mare ne piny duto. (Math. 6:9, 10) Gibiro neno herawa giwegi kod kaka oganda Nyasaye oriwore kendo nwang’o mor kuom kaka warwako welo.—Zab. 133:1.
2. Ere kaka wanyalo konyo jopuonjre mag Muma mobiro e Rapar?
2 Jopuonjre mag Muma: Jomoko kuom jowinjo biro bedo joma nyocha eka oa chako puonjruok mar Muma kodwa. Konygi mondo ging’e owete gi nyimine. Wach negi kaka chokruok mitimo e juma chalo, kendo iwuoth kodgi matin kinyisogi alwora mar Od Romo. Jagol-twak biro jiwo joma kamagi e twak mondo otim dongruok e wach Nyasaye. Inyalo tiyo gi weche mowacho mondo ijiwgo jopuonjreni.
3. Ang’o ma inyalo tim mondo ojiwgo jolendo ma osedok chien to obiro e Raparni?
3 Jolendo Mosedok Chien e Tij Lendo: Jomoko ma nobi e Rapar gin joma osedok chien e tij lendo. Kaw thuolo mondo imosgi gi ilo. Kik ipenjgi kata wacho weche manyalo miyo gine wich kuot. Kinde machuok bang’ Rapar, jodongo onego olim jalendo moro amora mosedok chien to obiro e Rapar, puogi kuom kinda margi mar chopo, gwelgi kendo e chokruok machielo mar kanyakla.
4. Ere kaka ng’ato ka ng’ato kuomwa nyalo konyo welo?
4 Welo: Moko kuom joma obiro nyalo bedo joma wang’erego kata joodwa ma wan wawegi wagwelo. Moko to nyalo bedo ni ne onwang’o kalatas mar gwelo ji e kampen makende. Ka ineno ji ma ok ing’eyo, kaw thuolo mondo ihulri nigi kendo irwakgi. Nyalo bedo ni pok gisegadhi e chokruokwa moro amora. E seche ma iwuoyo kodgi inyalo temo ng’eyo kaka dirom kodgi. Ka ilimogi iwuon kata goyo nigi simo ndalo matin bang’ Rapar, inyalo temo jiwogi mondo gimed puonjre kendo ichiw negi thuolo mar puonjruok Muma.
5. Ang’o ma wanyalo wacho mondo wachak puonjruok mar Muma?
5 Weche mowachi e twak mar Rapar inyalo tigo e chiwo bug Muma Puonjo seche ma idok limogi. Kuom ranyisi, jagol-twak mar Rapar biro somo Isaiah 65:21-23. Ka idok limogi, inyalo muloe wach twagno kae to iwacho kama, “We mondo anyisie gweth mamoko ma rawar biro kelo.” Bang’e to inyalo nyisogi ite mag 4-5 e bug Muma Puonjo. Kata inyalo wacho kama, “Ji mathoth wuoro ni weche ma ne Isaiah okorogi wabiro neno kochopo karang’o.” Kae to inyise paragraf 1-3 manie sula mar 9. Yo machielo en ni inyalo mana nyise wach moro ma jagol-twak mar Rapar ne owacho, chiwne bug Muma Puonjo, kae to inyise kaka itimo puonjruok.
6. Thuolo mage ma wan-go ka wawinjo chik ma Yesu ne ochiwo ni mondo watim nyasi mar paro thone?
6 We mondo ng’ato ka ng’ato kuomwa otem manyo thuolo mar konyo jopuonjre mag Muma, jolendo modok chien e tij lendo, kod welo mabiro bedo jowinjo. (Luka 22:19) Jehova biro gwedho gadier gimoro amora ma watimo momedre e tijwa mar lando Pinyruoth.