Iko Pach Jowinjo Ne Ndiko e Yo Maber

MUMA e mise mar puonj michiwo e chokruogewa mag kanyakla. Ndiko mag Muma bende e mise mar gik mwapuonjo sama wan e tij lendo. Kata kamano, kony ma jowinjo biro yudo kuom gik mwapuonjo luwore gi kaka waiko pachgi kapok wasomo ndiko.

Nitie gik momedore madwarore maok mana hulo ndiko kendo kwayo mondo ng’ato osome. Sama iiko pach jowinjo ne ndiko, tem timo gik moko ariyogi: (1) Mi gibed gi siso mar somo ndiko, kendo (2) nyis maler gimomiyo isomo ndikono. Nitie yore mopogore opogore minyalo timogo gik moko ariyogi.

Penj Penjo. Mani e yo maber tiyogo kapo ni jowinjo ok ong’eyo dwoko mar penjono. Tem keto penjo e yo mamiyo jowinjo opar matut. Yesu notimo kamano. Kane Jo-Farisai odhi ire e hekalu kendo oteme e lela kabe ong’eyo Ndiko, Yesu nopenjogi niya: “Uneno nadi kuom Kristo? En wuod ng’a?” Ne gidwoke ni, “Wuod Daudi.” Kae to Yesu nopenjogi niya: ‘Ka kamano, to Daudi luonge ni “Ruoth” nadi, kowacho kuom roho?’ Kosepenjo kamano, nodhi nyime hulo weche mayudore e Zaburi 110:1. Dho Jo-Farisai nomoko. Kata kamano, oganda to ne mor winjo Yesu.—Math. 22:41-46.

Sama in e tij lendo, inyalo iko pach ji ne Ndiko kitiyo gi penjo machalo kama: “Waduto wan gi nyingewa, to be iparo ni Nyasaye nigi nyinge? Wanyalo yudo dwoko e bug Zaburi 83:18.” “Be nitie kinde ma dhano duto nobed e bwo sirkal achiel? Ne ane kaka bug Daniel 2:44 dwoko penjoni.” “Be Muma wuoyo kuom gik matimore e kindewagi? Ng’i ane weche manie bug 2 Timotheo 3:1-5 ka chal gi gik mineno katimore.” “Be nitie kinde ma chandruok gi tho ok nobedie? Dwoko ma Muma chiwo nyalo yudore e bug Fweny 21:4, 5.”

Sama ng’ato golo twak, tiyo gi penjo e iko pach jowinjo nyalo miyo gine ndiko e yo mopogore, kata mana ndiko ma ging’eyo. Be ibiro konyogi timo mano? Mano biro luwore gi kabe penjo mipenjogo mulo weche machandogi kata ooyo. Kata ka en wach ma jowinjo ohero, pachgi nyalo tangni kapo ni isomo ndiko ma gisebedo ka gisomo nyading’eny. Mondo imi pachgi kik tangni, par ahinya kaka inyalo miyo twagi omorgi.

Ti gi Chal Moro. Inyalo wuoyo kuom pek moro kae to inyis ndiko malero kaka inyalo lo pekno. Kik imi jowinjo obed gi paro ni ndikono biro loyonegi chandruogno ka hono. Thothne ndiko konyo mana e okang’ moro. Kata kamano, inyalo kwayo jawinjo ni sama isomo ndiko, otem neno puonj ma ndikono chiwo kuom kaka onyalo nyagore gi chandruogno.

E yo ma kamano bende, inyalo nyiso puonj moro mamulo tim maber, kae to iti gi wach moro manie Muma manyiso kaka luwo puonjno en tim rieko. Kapo ni ndiko moro ma jowinjo somo oting’o puonj ariyo (kata mokalo kanyo) motudore gi gimiwuoyoe, jogol-twak moko hinyo kwayo jowinjo mondo ofweny puonjgo. Kapo ni winjo tiend wach moro bedo matek ne jowinjo moko, inyalo yawo pachgi kuom nyisogi yore mopogore ma ji nenogo wachno, kae to iti gi ndiko mondo iler wachno e yo makare.

Nyis ni Wecheni Wuok e Muma. Kapo ni isemiyo jowinjo siso mar winjo wich midwaro wuoyoe kendo isewacho yore moko ma ji nenogo wachno, inyalo iko pachgi ne ndiko mana kuom wacho ni: “Ne ane gima Wach Nyasaye wacho e wi wachni.” Mano nyiso gimomiyo weche midwaro somo inyalo kaw kaka adier.

Jehova notiyo gi chwo kaka Johana, Luka, Paulo, kod Petro e ndiko buge moko mag Muma. Kata kamano, ne gin mana jondiko; Jehova e Wuon wach. To ahinya, sama iwuoyo gi joma ok puonjre Muma, iko pachgi ne ndiko kiwacho ni: “Wach Nyasaye wacho kama” mulogi moloyo wacho mana ni: “Petro nondiko” kata ni “Paulo nowacho.” Ber ng’eyo ni kinde moko Jehova nonyiso Jeremia mondo ochak lando ote ma nomiye gi wechegi: “Winjuru wach Jehova.” (Yer. 7:2; 17:20; 19:3; 22:2) Kapok watieko wuoyo, onego watem nyiso ni gima nie Muma en wach Nyasaye, bed ni ne watiyo kata ok watiyo gi nying Jehova sama ne waiko pach ji ne ndiko.

Ng’e Weche Molworo Ndiko Misomo. Onego ing’e weche molworo Ndiko moro seche ma iiko pach ji ne ndikono. Seche moko inyalo wuoyo achiel kachiel kuom weche molworo ndikono; to seche moko nitie yore ma weche molworo ndikono chiko gima ibiro wacho. Kuom ranyisi, sama idwaro nyiso weche ma Ayub jal ma noluoro Nyasaye nowacho, kata kidwaro nyiso weche ma johoch ma miriambo nowachone, be ibiro iko pach jowinjo e yo machal? Luka ema nondiko bug Tich Joote, kata kamano, nondiko weche sie ma joma moko nowacho, ji kaka Jakobo, Petro, Paulo, Filipo, Stefano, malaike, koda weche mag Gamaliel gi mag Jo-Yahudi mamoko ma ne ok gin Jokristo. Ibiro nyiso ni ng’ano ma ne owacho weche mi hulogo? Kuom ranyisi, bug Zaburi ok oting’o mana weche Daudi kende, to Suleman bende ok ema nondiko bug Ngeche duto. Bende, ber ng’eyo ni jal ma nondiko bug Muma ne wuoyo gi ng’a, kendo ni ne owuoyo e wi wach mane.

Wuo Kuom Chal ma ne Nitie. Mani konyo ahinya kapo ni inyalo nyiso ni chal ma ne nitie e kinde ma ne indiko wach moro e Muma, chalo gi mago ma uwuoyoe. Seche moko, lero chal ma ne nitie dwarore mondo tiend ndiko owinjre. Kuom ranyisi, kapo ni idwaro tiyo gi Jo-Hibrania 9:12, 24 e golo twak mawuoyo kuom rawar, inyalo yudo ni ber kwongo lero gima ot ma iye mar tabernakel en, ma kaluwore gi ndikono, ochung’ ne kama Yesu nodonjoe kodhi e polo. To kik iwuo ahinya kuom chal ma ne nitie e yo ma mayo ndiko midwaro somono teko.

Mondo imed lony e iko pach ji ne ndiko, non ine gima jogol-twak molony timo. Ng’e yore mopogore opogore ma gitiyogo. Non gimomiyo yorego tiyo maber. Sama iiko twegeni, yier ndiko moting’o puonj madongo, kae to ine gima ndiko ka ndiko onego ochopi. Chan adimba kaka ibiro iko pach ji ne ndiko ka ndiko mondo yo ma ndikogo konyogo oyangre maler. Bang’e, dhi nyime timo kamano ne ndiko duto mitiyogo. Kaka imedo lony e timo kamano, ibiro yudo ni gima ijiwo ahinya en Wach Nyasaye.